என்ன படிக்கலாம்?

மேஷ ராசியிலேயே பரணி நட்சத்திரக்காரர்கள் எந்தவொரு விஷயத்திற்கும் உடனடியாக ரீயாக்ட் செய்வார்கள். கோடு போட்டால் ரோடு போடும் குணத்தை பள்ளிப் பருவத்திலேயே காணலாம். இந்த நட்சத்திரத்தை சுக்கிரன் ஆள்கிறார். எனவே எப்போதும் பரபரப்பும் துறுதுறுப்பும் இருக்கும். படிப்பை விட ஆடல், பாடல், கதை என கலைகளில் ஆர்வம் காட்டி ஜெயிக்கவும் செய்வார்கள். இந்த நட்சத்திரத்தில் பிறந்த குழந்தைகளின் ஜாதகத்தில் சுக்கிரன் நன்றாக இருந்தால் வாழ்க்கை ரம்யமாகச் செல்லும். ‘‘பையன் படிக்கவே வேணாம். அவன் கிட்ட இருக்கற திறமைக்கு எதிர்காலத்துல பெரிய பாடகராவோ, நடிகராவோ வந்துடுவான்’’ என்று பள்ளிப் பருவத்திலேயே சொல்லி விடுவார்கள். சுக்கிரன் மறைந்தாலோ, அல்லது பலவீனமாக இருந்தாலோ கொஞ்சம் குழம்பியபடி இருப்பார்கள். கூடா பழக்கத்தால் பாதை மாறுவார்கள். குடும்பக் கஷ்டம் தெரியாமல் வளர்வார்கள். விவரம் தெரியாமல் ஏதாவது வில்லங்கத்தில் சிக்கிக் கொள்வார்கள்.

பரணி நட்சத்திரத்தின் முதல் பாதத்தில் பிறந்தவர்களுக்கு ஏறக்குறைய 19 வயது வரை சுக்கிர தசைதான் நடக்கும். கௌரவமாக மதிப்பெண் எடுப்பார்கள். எப்போதும் நண்பர்களால் சூழப்பட்டு இருப்பார்கள். சின்ன வயதிலேயே பிரபலமாக முயற்சிப்பார்கள். தடங்கல் இல்லாமல் படிப்பு நகரும். பள்ளியில் எல்லாப் போட்டிகளிலும் இவர்கள் பெயர் இருக்கும். எல்லாவற்றையும் தெரிந்து கொள்ளத் துடிப்பார்கள். எதையும் மிகைப்படுத்திப் பார்க்கும் குணமும் இருக்கும். 10ம் வகுப்பு படிக்கும்போது நிறைய நண்பர்கள் இருப்பார்கள். பிறகு காதலால் கவனம் சிதறும். எனவே, ஜாக்கிரதையாக இருங்கள். பெற்றோர் சரியான வழிகாட்ட வேண்டும். ஏனெனில், இந்த காலகட்டம்தான் சுக்கிர தசையின் இரண்டாம் பாகமாக இருக்கும். சுக்கிரன் அதீதமாக ஆளுவார். ஹார்மோன்களின் கலாட்டா மிதமிஞ்சியிருக்கும். கல்லூரியில் இரண்டாம் வருடம் படிக்கும்போது சூரிய தசை தொடங்கும். கொஞ்சம் நிதானம் பெறுவார்கள். அரசியல், நிர்வாகம் சார்ந்த படிப்புகளைத் தேர்ந்தெடுக்கலாம். மருத்துவத் துறையில் கண், நரம்பு, முகம் சம்பந்தமான துறை சரியாக வரும். எம்.பி.ஏ. படிப்பில் ஹெச்.ஆர். துறை ஏற்றது. பொறியியல் எனில் சிவில் நல்ல எதிர்காலத்தைக் கொடுக்கும்.


இரண்டாம் பாதத்தில் பிறந்தவர்களிடம் சூட்சும புத்தி அதிகம் இருக்கும். சிறிய வயதிலிருந்தே எதிலும் வேகம் காட்டுவார்கள். நாலு பேருக்கு முன்னால் அடித்தாலோ, திட்டினாலோ தாழ்வு மனப்பான்மைக்குள் சிக்கிக் கொள்வார்கள். கணக்கு எப்போதும் சவாலாக இருக்கும். ஆசிரியர் சரியாக சொல்லித் தரவில்லை என அவ்வப்போது நண்பர்களிடம் சொல்லிக் கொண்டே இருப்பார்கள். ஆசிரியரைப் பொறுத்து அந்தந்த பாடங்களில் கவனம் காட்டுவார்கள். யாரேனும் ஒருவரை முன்மாதிரியாகக் கொண்டு வளர்வார்கள். 12 வயது வரை சுக்கிர தசை நடப்பதால் பள்ளிப்பருவம் மறக்க முடியாததாக இருக்கும். ஐந்தாம் வகுப்பு படிக்கும்போது கல்வித் தடை வந்து நீங்கும். ஹாஸ்டலா, வீடா என்று வீட்டிலுள்ளோர் குழப்புவார்கள். 13 வயது முதல் சூரிய தசை நடக்கும்போது உலக அனுபவங்களும், ஒரு பெரிய மனுஷத்தனமும் வரத் தொடங்கும். ‘‘விளையாட்டுப் பிள்ளையா இருந்தான். அப்படியே மாறிட்டானே’’ என்று வியப்பார்கள். பள்ளியிலும், கல்லூரியிலும் பொருளாதாரம், புள்ளியியல் போன்ற படிப்புகளைத் தேர்ந்தெடுங்கள். அதேபோல கட்டிட திட்ட வரைபடத் தயாரிப்பு, ஆர்க்கிடெக்ட், விஸ்காம் போன்றவையும் வளமான எதிர்காலம் தரும். கலைத்துறை எனில் ஓவியம் மிக நன்று.

மூன்றாம் பாதத்தில் பிறந்தவர்களிடம் அழகும் அறிவும் சேர்ந்திருக்கும். எல்லோரும் விரும்பும் பிள்ளையாக இருப்பார். பேசுவதே பாடுவது போலிருக்கும். சிறிய வயதிலேயே மேடைகளில் அசத்துவார்கள். வயதுக்கு மீறி பல விஷயங்களைப் பேசுவதால், அதிகப் பிரசங்கி என்று பெயர் வாங்குவார்கள். 4ம் வகுப்பு படிக்கும்போதே சூரிய தசை தொடங்கி விடும். குடும்பம் கொஞ்சம் கஷ்டத்தில் தள்ளாடும். படிப்பும் கொஞ்சம் பாதிக்கும். புத்தகக் கல்வியை விட வாழ்க்கைக் கல்வியைத்தான் நன்றாகப் படிப்பார்கள். ‘‘படித்துதான் பெரிய ஆளாகவேண்டும் என்பதில்லை’’ என்று அடிக்கடி கூறுவார்கள். கலைத்துறை மீது எப்போதும் ஒரு கண் இருக்கும். ஃபேஷன் டெக்னாலஜி, விஸ்காம், டி.எஃப்.டெக். போன்ற படிப்புகள் எதிர்காலத்தை பிரகாசமாக்கும். இசைப்பள்ளியில் படித்து அங்கேயே ஆசிரியராகும் வாய்ப்பும் கிடைக்கலாம். இந்து சமய அறநிலையத்துறை சார்ந்த அரசு வேலையும் கிடைக்கும். கட்டிடப் பணிகளில் கோயில், பூங்கா போன்றவை சிறப்பு தரும்.


நான்காம் பாதத்தில் பிறந்தவர்கள் பிடிவாதக்காரர்களாக இருப்பார்கள். சராசரியாகத்தான் படிப்பார்கள். பள்ளியில் சேர்த்த உடனேயே சுக்கிர தசை முடிந்து சூரிய தசை ஆரம்பித்து விடும். ‘‘ஸ்கூலுக்கு ஒழுங்கா வர்றான்; போறான். அதுல ஒண்ணும் குறை இல்லை. ஆனா, மார்க் மட்டும் வரமாட்டேங்குது’’ என்பார்கள். நோட்டுக்கு அட்டை போடுவது முதல் வகுப்பறை ஒழுக்க நியதிகள் வரை எதிலுமே குறை கூற முடியாது. பத்தாம் வகுப்பில் மரியாதைக்குரிய மதிப்பெண் பெறுவார்கள். பன்னிரெண்டாம் வகுப்பை விட கல்லூரியில் சிறந்து விளங்குவார்கள். ‘‘இன்னும் பத்து மார்க் கூட எடுத்திருந்தா அந்த கோர்ஸ் கிடைச்சுருக்கும்’’ என்பதுபோல பல விஷயங்கள் இவர்களை விட்டு நழுவும். ஆனாலும் சிவில், எலெக்ட்ரானிக்ஸ் எடுத்துப் படிக்கலாம். மருத்துவத்தில் ஆர்த்தோ, பல், பிளாஸ்டிக் சர்ஜரி போன்ற படிப்புகள் ஏற்றதாகும். நிர்வாகம் சார்ந்த இளங்கலை படிப்பு பெரிய பதவி வரை கொண்டு போய் நிறுத்தும். அதனால் கவனமாக தேர்ந்தெடுத்துப் படிக்க வேண்டும்.

பரணி நட்சத்திரத்தில் பிறந்தவர்கள் வலிமை மிகுந்த அம்பாள் சந்நதியோடு, சரஸ்வதி தேவி வீற்றிருக்கும் தலத்திற்குச் சென்று வணங்குவது கல்வித் திறனை பெருக்கும். மேலும், சைவக் குருக்களோ அல்லது ஆச்சார்யர்களோ தரிசித்து பேறு பெற்ற தலமாக இருப்பின் புத்தியின் தீட்சண்யம் இன்னும் கூடும். அப்படிப்பட்ட தலமே வேதாரண்யம் ஆகும். இங்குள்ள ஈசனுக்கு வேதாரண்யேஸ்வரர் என்றும், அம்பாளுக்கு யாழைப்பழித்த மொழியம்மை என்றும் பெயர். இத்தலத்து அம்பாளின் வாக்கானது தன் வீணையின் நாதத்தை விட அழகானதும், ஈடு இணையற்றும் இருப்பதால் சரஸ்வதி இங்கு வீணையில்லாது வீற்றிருக்கிறாள். நாகை மாவட்டத்திலுள்ள இத்தலத்திற்கு சென்று அம்பாளையும், சரஸ்வதியையும் தரிசித்து வாருங்கள். சம்பந்தப் பெருமானும், திருநாவுக்கரசரும் பதிகம் பாடித் திறந்த திருக்கதவை தரிசியுங்கள். உங்களுக்குள்ளும் ஒரு விவேகக் கதவு திறப்பதை உணர்வீர்கள்.

கார்த்திகை நட்சத்திரத்தில் பிறந்தவர்களிடம் சூரியனின் முழுசக்தியும் வெளிப்படும். செவ்வாய், மற்றும் சுக்கிரனின் சக்தியும் இணைந்து வருவதால், மிடுக்கும் வசீகரமும் கலந்தே இருக்கும். பத்தாம் வகுப்பிலேயே கல்லூரி முடித்த தெளிவோடு இருப்பார்கள். எல்லா விஷயங்களையும் எளிதாகவும், திட்டமிட்டும் செய்வார்கள். பள்ளிப் பருவத்திலேயே இவர்களைச் சார்ந்து நாலு பிள்ளைகள் இருப்பார்களே தவிர, இன்னொருவரை சார்ந்து இவர்கள் இருக்க மாட்டார்கள். எத்தனை நண்பர்கள் இருந்தாலும் ஓரிருவரைத்தான் அருகில் சேர்ப்பார்கள். படிப்பை விட ஒழுக்கத்திற்குத்தான் முதலிடம் கொடுப்பார்கள். அதேசமயம் படிக்கவும் செய்வார்கள். தலைவலி, பார்வைக் கோளாறு, பல்வலி போன்றவை சிறிய வயதிலேயே வந்து நீங்கும்.

முதல் பாதத்தில் பிறந்தவர்கள் பளிச் தோற்றத்துடன், மெலிந்து, உயரமாக இருப்பார்கள். சிறு வயதிலேயே கண்ணாடி அணிய வேண்டியிருக்கும். பள்ளியில் படிக்கும்போதே வகுப்புத் தலைவர் முதல் பள்ளித் தலைவர் வரை பதவிகள் வரும். நல்ல கல்வி நிறுவனத்தில் தந்தை சேர்ப்பார். மூன்றாம் வகுப்பு முதல் பத்தாம் வகுப்பு வரை சுமாராகத்தான் படிப்பார்கள். ஆனால், எல்லா வகுப்பிலும் குறிப்பிட்ட ஒரு சப்ஜெக்ட்டில் மட்டும் தொடர்ந்து நல்ல மதிப்பெண் பெறுவார்கள். அதன்பிறகு கல்லூரி முடிக்கும் வரை எல்லாவற்றிலும் முதலிடம்தான். கல்லூரியில் என்ன படிக்கிறார்களோ அதுதான் வாழ்க்கையை நிர்ணயிப்பதாக இருக்கும். நிர்வாகம், அரசியல், சிவில் எஞ்சினியரிங், எலெக்ட்ரிகல், விண்வெளி ஆராய்ச்சி குறித்த படிப்புகள் வளமான எதிர்காலம் தரும்.

இரண்டாம் பாதம் மற்றும் மூன்றாம் பாதத்துக்கு பலன்களில் மிகச் சிறிய வித்தியாசம்தான். மூன்றாம் பாதம் கொஞ்சம் மெதுவாக இருக்கும். அவ்வளவுதான். ஆனால், விவேகத்தைப் பொறுத்தவரை இருவரும் ஒன்றுதான். பள்ளியில் ஆங்கிலத்தில் சிறப்பான ஈடுபாடு காட்டுவார்கள். தனக்கென்று தனிக் கூட்டத்தை உருவாக்குவார்கள். இங்குதான் கவனமாக இருக்க வேண்டும். நண்பர்களுக்காக சில தியாகங்கள் செய்வார்கள். இதனால் பள்ளிப் படிப்பையே கோட்டை விடும் ஆபத்து உள்ளது. ஆனால், பத்தாம் வகுப்பு தாண்டி விட்டால் எந்தப் பிரச்னையும் இருக்காது. அதன்பின் கல்லூரி முடியும் வரை செவ்வாய் தசை இருப்பதால் கெமிக்கல், சிவில், எம்.பி.ஏ. போன்றவை மிகச் சிறந்த வாழ்க்கையை அமைத்துத் தரும். பொறியியல் துறையில் எலெக்ட்ரானிக்ஸ் சிறந்தது. கல்லூரியில் ஆங்கில இலக்கியத்தை ஆர்வமிகுதியால் படித்து விட்டு, பிறகு தொழிலுக்காக வேறு படிப்பையும் படிப்பார்கள். கேட்டரிங் டெக்னாலஜி தேர்ந்தெடுத்தால் ஒரு ஓட்டலுக்கே அதிபராகலாம்.

நான்காம் பாதத்தில் பிறந்தவர்கள், தங்கள் பரம்பரையில் யார் யார் என்னென்ன படித்தார்கள் என்று பார்த்து வைப்பார்கள். பதினோரு வயது வரை தாய்வழி சொந்தங்கள் இவர்களின் கல்வியில் ஆர்வம் காட்டுவார்கள். சிறு வயதிலேயே பெரிய லட்சியத்தோடு வளர்க்கப்படுவார்கள். பள்ளியிறுதியிலேயே ஐ.ஐ.டி. நுழைவுத் தேர்வு வகுப்புகளுக்குக்கூட செல்வார்கள். கல்வியில் முக்கிய கட்டமான எட்டாம் வகுப்பிலிருந்து கல்லூரி வரை படிப்பில் நம்பர் ஒன்னாக இருப்பார்கள். அரசு வேலைக்குத் தகுந்த மாதிரி படிப்பார்கள். சிலருக்கு வேலையும் கிடைத்து விடும். ஐ.ஏ.எஸ். இவர்களுக்கு வெற்றி தரும். மருத்துவத்துறையில் வயிறு, இ.என்.டி. போன்ற படிப்புகளில் சிறப்பாக செயல்படுவார்கள். படித்த கல்லூரியிலேயே பேராசிரியராக வரும் வாய்ப்பு அதிகம் உண்டு. அரசாங்கத்தில் முக்கிய பதவிகளில் அமர்ந்திருப்போரின் செயல்பாடுகளை இவர்கள்தான் தீர்மானிப்பார்கள். சொந்த ஜாதகத்தில் சூரியனும், குருவும் பலவீனமாக இருந்தால் கல்வித் தடை ஏற்பட்டு சிரமப்படுவார்கள். ஆனால், பொதுவாக கல்வி விஷயத்தில் சிறந்தே விளங்குவார்கள்.

கார்த்திகை நட்சத்திரத்தை சூரியன் ஆட்சி செய்கிறது. எனவே, சூரியன் பூஜித்த தலங்களை வணங்கினால், கல்வித்தடைகள் நீக்கும். அப்படிப்பட்ட தலமே திருக்கண்டியூர் பிரம்மசிர கண்டீஸ்வரர் ஆலயமாகும். இங்கு பிரம்மாவுக்கு தனி சந்நதி அமைந்துள்ளது. அவருடன் சரஸ்வதி தேவியும் அருள்புரிகிறார். இவ்வாறு படைப்புக் கடவுளும், கல்விக் கடவுளும் தம்பதியாக அருள் புரிவது அரிதான ஒன்று. கூடவே சூரியனும் பேறு பெற்ற இடம் என்பதால், இத்தலத்தை வணங்க கல்விச் செல்வம் பெருகும். இத்தலம் தஞ்சாவூர் - திருவையாறு பாதையில் அமைந்துள்ளது.  
இருபத்தேழு நட்சத்திரங்களில் பதிமூன்றாவது ஒளிமிகுந்த நட்சத்திரம் ரோகிணி. சந்திரன் முழுக்க முழுக்க இந்த நட்சத்திரத்தை ஆட்சி செய்வதால், கனவுகளும் கற்பனைகளும் மிகுந்திருக்கும். படிப்பை விட வகுப்பறை ஒழுக்கத்திற்கும், நோட்டுப் புத்தக அலங்காரத்திற்கும் முக்கியத்துவம் தருவார்கள். இளம் வயதிலிருந்தே உணர்ச்சிவசப்படும் குணம் இருக்கும். ரிஷப ராசிக்கு அதிபதி சுக்கிரன். ரோகிணி நட்சத்திரத்தின் அதிபதி சந்திரன்.

ரோகிணியின் முதல் பாதத்தை செவ்வாய் ஆளுகிறார். இந்த நட்சத்திரத்திலேயே மிகுந்த தைரியம் மிக்க குழந்தைகளாக விளங்குவார்கள். விளையாட்டுகளில் ஈடுபாடு காட்டுவார்கள். ஏறக்குறைய 9 வயது வரை சந்திர தசை இருக்கும். துறுதுறுப்பும் குறுகுறுப்பும் அதிகமிருக்கும். இரண்டாம் வகுப்பு படிக்கும்போதே பள்ளியில் நடத்தும் நாடகங்களில் கலந்து கொள்வார்கள். தயிர் சாதம் விரும்பிச் சாப்பிடுவார்கள். பத்திலிருந்து 16 வயது வரை செவ்வாய் தசை வரும்போது திடீரென்று வேறு பள்ளிக்கு மாறும் சூழல் வரும்.

ஏழாம் வகுப்பிலேயே என்.சி.சி. போன்ற தேசிய மாணவர் படை திட்டங்களில் சேருவார்கள். காவல்துறை, ராணுவம் போன்றவற்றின் மீது ஒரு கண் வைத்திருப்பார்கள். பத்தாம் வகுப்பில் நல்ல மதிப்பெண் பெறுவார்கள். 17 வயதிலிருந்து 35 வயது வரை ராகு தசை. 17 வயது என்பது பள்ளியிலிருந்து கல்லூரிக்கு நகரும் தருணம். பிளஸ் 2வில் அறிவியல் படித்து விட்டு, ''என்னை பி.பி.ஏ. சேர்த்து விடுங்கள்’’ என்பார்கள். சம்பந்தமில்லாது படிக்க வேண்டி வரும். ஏதேனும் ஷார்ட் டைம் கோர்ஸில் படித்து ஜெயிப்பார்கள். அதுதான் வாழ்க்கைக்கு உதவும்படியாக அமையும். ராகு தசையில் பல மொழிகளில் வல்லமை வரும். ஆனாலும் கல்லூரி என்று வரும்போது கெமிக்கல், எலெக்ட்ரிகல், விவசாயம், சிவில் என்று சேர்வது நல்லது. மருத்துவத்தில் எலும்பு, பல் சம்பந்தமான துறை கிடைத்தால் உடனே சேரலாம். வெற்றி நிச்சயம். 

ரோகிணியின் இரண்டாம் பாதத்திற்கு அதிபதி சுக்கிரன். ஏறக்குறைய 6 வயது வரை சந்திர தசை நடக்கும். 7லிருந்து 13 வயது வரை நடக்கும் செவ்வாய் தசையில் அதிர்ஷ்டக்காற்று பெற்றோர் மீது வீசும். படிப்பு சுமாராக இருந்தாலும் ஓவியம், உடையலங்காரப் போட்டி என்று வெளுத்து வாங்குவார்கள். 14 வயதிலிருந்து 31 வரை ராகு தசை நடைபெறும். அப்போது மட்டும் கொஞ்சம் ஜாக்கிரதையாகப் பார்த்துக் கொள்ள வேண்டும். சிறு சிறு கெட்ட பழக்கங்கள் தோன்றி மறையும் காலம் இது.

பத்தாம் வகுப்பு படிக்கும்போது, ‘எப்போது பள்ளி வாழ்க்கை முடியும்’ என நினைப்பது போல பிரச்னைகளால் சூழப்படலாம். அருகிலிருக்கும் புற்றுள்ள அம்மன் கோயிலுக்குச் சென்று வாருங்கள். 12ம் வகுப்பு படிக்கும்போது பொறுப்பு வந்துவிடும். இவையெல்லாமே அவரவர் சொந்த ஜாதகத்தில் ராகுவின் நிலையை வைத்தும் நடக்கும். ஆனாலும் பொதுவாகவே ராகு தசை எனில் இந்த வயதுப் பிள்ளைகள் கொஞ்சம் பேலன்ஸ் செய்துதான் செல்ல வேண்டும். கல்லூரியில் எலெக்ட்ரானிக்ஸ், ஏரோநாட்டிகல், விஸ்காம், ஃபேஷன் டெக்னாலஜி, பிரின்டிங் டெக்னாலஜி போன்றவற்றிற்கு முக்கியத்துவம் கொடுக்கலாம். மருத்துவத்துறையில் நியூராலஜிஸ்ட், முதுகுத் தண்டுவடம் சார்ந்த துறைகளில் வெகு எளிதாக நிபுணராகும் வாய்ப்பு உண்டு. 

மூன்றாம் பாதத்தை புதன் ஆளுவதால் புத்தியில் தீட்சண்யம் அதிகமாக இருக்கும். 5லிருந்து 11 வயது வரை செவ்வாய் தசை இருப்பதால் அடிக்கடி விழுந்து கொண்டே இருப்பார்கள். இவர்கள் எதிரே பெற்றோர் அடிக்கடி சண்டை போட்டுக் கொண்டிருக்கக் கூடாது. அப்படிச் செய்தால் பிள்ளைகள் ஹாஸ்டலை அதிகம் விரும்புவார்கள். ஏழாம் வகுப்பு படிக்கும்போது கல்வியில் சிறிய தடை ஏற்பட்டு விலகும். அதற்குப்பிறகு 12லிருந்து 29 வயது வரை ராகு தசை இருப்பதால் படிப்பைத் தவிர மற்ற எல்லாவற்றிலும் கவனம் கூடுதலாகவே இருக்கும். கணக்கு எப்போதுமே சவாலாக இருக்கும். பொதுவாகவே சந்திரனுடைய நட்சத்திரத்தில் சிறிய வயதில் ராகு தசை வரும்போது சிரமங்கள் இருக்கத்தான் செய்யும். இது ஒரு கிரகண அமைப்பாகும். ஏதேனும் ஒரு குழப்பமான மனோநிலை நிலவத்தான் செய்யும். மூன்றாம் பாதத்திற்கு அதிபதியாக புதன் வருவதால் புள்ளியியல், சி.ஏ, சட்டம், எம்.பி.ஏ, கம்பெனி நிர்வாகம் சார்ந்த படிப்புகள் எல்லாமுமே ஏற்றவை. மருத்துவத் துறையில் இ.என்.டி, நரம்பு, வயிறு சம்பந்தப்பட்ட படிப்புகளில் தனித்துவம் பெற முடியும்.


நான்காம் பாதத்தில் பிறந்தவர்களை சந்திரன் ஆளுகிறார். நட்சத்திர அதிபதியும் சந்திரனாக வருவதால், சந்திரனின் இரட்டிப்புத் திறன் இவர்களிடத்தில் செயல்படும். ராசியாதிபதி சுக்கிரன் சந்திரனை கூடவே ஜொலிக்க வைப்பார். 9லிருந்து ராகு தசை தொடங்கும்போதே, இவர்களது பாதத்தின் அதிபதியான சந்திரனை ராகு கவ்வும். இந்தப் பிள்ளைகளை அவர்கள் போக்கிலேயே விட்டுத்தான் பிடிக்க வேண்டும். கொஞ்சம் அதீத பிடிவாத குணத்தோடு இருப்பார்கள். மொழிப் பாடத்தில் சிறந்து விளங்குவார்கள். ராகு தசை நடைபெறுவதால் திடீரென்று தொண்ணூறு மார்க் எடுப்பார்கள். அடுத்த தடவை நாற்பதுதான் வரும். இப்படி ஏற்ற இறக்கங்கள் இருக்கத்தான் செய்யும். தியரியை விட பிராக்டிகலில் வெளுத்து வாங்குவார்கள். ஏதேனும் ஒரு சப்ஜெக்ட்டில் எப்போதுமே முதல் மாணவராக வருவார்கள். ஓரளவு நல்ல மதிப்பெண்களை எடுத்து 12ம் வகுப்பில் தேறுவார்கள். கல்லூரியில் மாஸ் கம்யூனிகேஷன், மரைன் எஞ்சினியரிங், ஆங்கில இலக்கியம், சட்டம் என்று திட்டமிட்டுப் படித்தால் போதும். 

ரோகிணி நட்சத்திரத்தில் பிறந்தவர்களுக்கு கல்வியை அருள்பவராக புதன்தான் முக்கியமாக வருகிறார். மேலும், புதனும் வித்யை அருளும் அம்பாளும் ஒரே தலத்தில் இருந்தால் அது இன்னும் நன்றாக இருக்கும். அப்படிப்பட்ட ஓர் தலமே திருவெண்காடு ஆகும். இத்தலத்தில் புதன் பகவானுக்கு தனி சந்நதி உண்டு. மேலும் இத்தல அம்பாளின் திருநாமமே பிரம்ம வித்யாம்பிகை என்பதாகும். அம்பாளின் திருப்பெயரிலேயே கல்வி அருளும் நிரம்பியுள்ளது. இந்த அம்பாளை தரிசிக்க, கல்வி கைகூடும். திருவெண்காடு எனும் இத்தலம் சீர்காழியிலிருந்து பதினைந்து கி.மீ. தொலைவில்
உள்ளது. 

மிருகசீரிஷம் நட்சத்திரத்தில் செவ்வாய் தனது முழுத்திறனையும் செலுத்தி ஆட்சி செய்கிறார். பொதுவாக செவ்வாயை சீற்றமுள்ள கிரகமாகத்தான் சொல்வார்கள் ஆனால் ராசியாதிபதியாக சுக்கிரனாக வருவதால், சீற்றத்தை ஆக்க வழியில் இவர்கள் உபயோகப்படுத்துவார்கள். பள்ளியில் வகுப்புத் தலைவராவது முதல் கல்லூரி மாணவத் தலைவராவது வரை எல்லாவற்றிலும் ஈடுபாடு காட்டுவார்கள். அறிவியல் ஈடுபாடும், கண்டுபிடிப்பு ஆர்வமும் பள்ளிப் பருவத்திலேயே வெளிப்படும். புவியியலில் சிறப்பு கவனம் செலுத்தினால், எதிர்காலத்தில் விஞ்ஞானியாகும் வாய்ப்பு இந்த நட்சத்திரத்தில் பிறந்தவர்களுக்கு உண்டு. வனத்துறை சார்ந்த வேலைகளுக்கும் அதிக வாய்ப்புண்டு.

மிருகசீரிஷம் நட்சத்திரத்தின் முதல் பாதத்தை ராசியாதிபதி சுக்கிரனும், நட்சத்திர அதிபதியான செவ்வாயும், முதல் பாதத்தின் அதிபதியான சூரியனும் ஆட்சி செய்கின்றனர். ஆறு வயது வரை செவ்வாய் தசை நடக்கும்போது உடல் பருமனாக இருக்கும். 7லிருந்து 24 வயது வரை ராகு தசை நடக்கும்போது திடீரென்று பள்ளியை மாற்றும்படியான சூழல் உருவாகும். கிட்டத்தட்ட பள்ளியின் தொடக்க காலத்திலிருந்து கல்லூரி முடியும் வரையிலும் ராகு தசை நடைபெறுவதால், பள்ளிப் படிப்போடு சேர்த்து வாழ்வின் அனுபவத்தையும் படிப்பார்கள். நண்பர்கள் வட்டம் அதிகமாவதால், படிப்பில் கவனம் சிதறும். ஒரு வகுப்பில் படிப்பதுபோல அடுத்த வகுப்பில் படிக்க முடியாமல் போகும். 12ம் வகுப்பிற்குப் பிறகுதான் கல்வியைப் பற்றிய தெளிவு கிடைக்கும். அதுவரையிலுமே சுமார்தான். கல்லூரியில் சொல்லி வைத்தாற்போல படிப்பைத் தேர்ந்தெடுத்து படிப்பார்கள். ஏனெனில், ராகு தசையின் இரண்டாம் பாகத்திற்குள் வந்து விடுவதால் ராகுவின் வீர்யம் குறையும். அதனால் கல்லூரியில் எந்தப் பாடத்தை எடுக்கிறார்களோ, அதில் டாக்டரேட் செய்து முடிப்பார்கள். பொலிட்டிகல் சயின்ஸ், எம்.பி.ஏ. படிப்பில் ஹெச்.ஆர்., அஸ்ட்ரோனமி போன்ற படிப்புகள் இவர்களுக்கு நல்ல எதிர்காலத்தைத் தரும். மருத்துவத் துறையில் நரம்பியல், மயக்க மருந்தியல் போன்ற படிப்புகளில் சிறப்பான எதிர்காலம் உண்டு. 


அடுத்ததாக வரும் இரண்டாம் பாதத்தில் பிறந்தவர்களை செவ்வாய், சுக்கிரன், புதன் கிரகங்கள் ஆளுவதால், இளம் வயதிலேயே கொஞ்சம் ஏமாளியாக இருப்பார்கள். சாதாரண பள்ளியில் சேர்த்து, பெரிய அளவில் மதிப்பெண்கள் வாங்க வேண்டுமென்று நெருக்கடி கொடுப்பார்கள். பால பருவத்திலேயே சுய கௌரவம் அதிகமிருக்கும். நாலரை வயதில் செவ்வாய் தசை நடைபெறும்போது இ.என்.டி. டாக்டரிடம் போக வேண்டியிருக்கும். காதில் பிரச்னை இருக்கும். 5லிருந்து 22 வயது வரை ராகு தசை நடைபெறுவதால் வகுப்பறையில் தனித்துவம் மிக்க மாணவனாக சுடர்விடும் அறிவோடு விளங்குவார்கள். புதன் ஆதிக்கம் மிகுந்திருப்பதால், பள்ளிப் பருவத்திலேயே தங்களை சிந்தனாவாதியாக நிலை நிறுத்துவார்கள். ஆசிரியரின் அறிவுரையும், ஊக்கமும் இருந்தால் அந்த சப்ஜெக்ட்டில் நல்ல மதிப்பெண் பெறுவார்கள். எட்டாம் வகுப்பில் படிப்பு கொஞ்சம் தடைபடும். ஆனால், 12ம் வகுப்பில் நல்ல மதிப்பெண் எடுப்பார்கள். அக்கவுன்டன்ஸி, விஸ்காம், பேங்கிங் சம்பந்தமான படிப்புகளைத் தேர்ந்தெடுத்தால், வாழ்க்கையில் வெற்றி நிச்சயம். மருத்துவம் எனில் நரம்பு, வயிறு, கண் சம்பந்தமாக படித்தால் பெரிய அளவில் புகழ் பெறலாம். எலெக்ட்ரானிக்ஸை விட எலெக்ட்ரிகல் நல்லது.

மிதுன ராசியில் மிருகசீரிஷம் நட்சத்திரத்தின் மூன்றாம் பாதத்தில் பிறந்தவர்களுக்கு, மூன்றாம் பாதத்தின் அதிபதியாக சுக்கிரன் வருகிறார். பிறந்த இரண்டரை வருடம் வரை செவ்வாய் தசை நடைபெறும். வயிற்றோட்டமும், செவ்வாயின் உஷ்ணத்தால் அடிக்கடி ஜுரம் போலவும் வந்து நீங்கும். 3 வயது முதல் 20 வரை ராகு தசை இருப்பதால் தாய், தந்தையின் வளர்ச்சி இன்னும் மேம்படும். கிட்டத்தட்ட ஒன்பதாம் வகுப்பு வரை சுமாராக படித்தவர்கள், பத்தாம் வகுப்பில் எல்லோரையும் திரும்பிப் பார்க்க வைப்பார்கள். கடைசி நேரத்தில் படிக்கும் பழக்கம் இருந்தாலும், நல்ல மதிப்பெண்கள் எடுத்து வியக்க வைப்பார்கள். 20வது வயதில் ஏராளமான திறமைகளோடு வலம் வருவார்கள். எலெக்ட்ரானிக்ஸ் அண்ட் கம்யூனிகேஷன், விஸ்காம், ஆர்க்கிடெக்ட், ஃபேஷன் டெக்னாலஜி, சி.ஏ., எகனாமிக்ஸ் போன்ற படிப்புகள் எளிதாக வெற்றி பெறச் செய்யும். மருத்துவத்தில் சர்க்கரை நோய் நிபுணராக வரவும் வாய்ப்புள்ளது. 


மிருகசீரிஷம் நட்சத்திரத்தின் நான்காம் பாதத்தில் பிறந்தவர்களுக்கு நட்சத்திர அதிபதி செவ்வாய், ராசியாதிபதி புதன். நான்காம் பாதத்தின் அதிபதியாக திரும்பவும் செவ்வாயே வருகிறது. செவ்வாய் இரண்டு மடங்கு சக்தியோடு இருப்பார். ஒரு வயது வரை செவ்வாய் தசை இருக்கும். 2லிருந்து 19 வயது வரை ராகு தசை இருக்கும். 4 வயதில் பாலாரிஷ்டம் என்று சொல்வதுபோல் உடம்பு படுத்தும். ராகு தசையின்போது புற்றுள்ள அம்மன் கோயிலுக்குச் சென்று வர, உடல்நலம் சீராகும். பெரும்பாலும் இந்த பாதத்தில் பிறந்தவர்கள் மிகச் சிறந்த விளையாட்டு வீரராகும் வாய்ப்பு உண்டு. எப்போதும் பள்ளி மைதானத்தில் பந்தை துரத்தியபடியும், ஓடியபடியும் இருப்பார்கள். மாவட்ட அளவிலாவது சிறந்த வீரராக வருவார்கள். பள்ளியில் படிக்கும்போதே பொருளாதாரம், அக்கவுன்டன்ஸி போன்ற படிப்புகளைத் தேர்ந்தெடுத்து, கல்லூரி வரை தொடர்வது நல்லது. ஆனாலும், மைக்ரோ பயாலஜி, கெமிக்கல், ஆட்டோமொபைல், எலெக்ட்ரிகல் போன்ற படிப்புகளை எளிதாக படித்துத் தாண்டலாம். அதற்கு செவ்வாய் நிச்சயம் உதவுவார்.

மிருகசீரிஷம் நட்சத்திரத்தை செவ்வாய் ஆட்சி செய்கிறது. பொதுவாகவே முருகன் மூலவராக வீற்றிருக்கும் ஆலயங்களை தரிசிப்பது கல்வியில் வேகம் கூட்டும். அதுமட்டுமல்லாது முதலிரண்டு பாதங்களும் சுக்கிரனின் ராசிக்குள் வருவதால், வள்ளிக்கென்று தனித்த சந்நதியுள்ள கோயிலை தரிசிப்பது விசேஷம். இப்படிப்பட்ட தலமே வள்ளியூர். இங்கு மூலவராக வள்ளி தேவசேனா சமேத சுப்ரமணிய சுவாமி அருள்பாலிக்கிறார். நெல்லை மற்றும் நாகர்கோவிலிலிருந்து வள்ளியூருக்கு அடிக்கடி பேருந்து வசதிகள் உண்டு.
இருபத்தேழு நட்சத்திரங்களில் ‘திரு’ என்ற இறைவனுக்குரிய அடைமொழியோடு கூடிய நட்சத்திரங்கள் இரண்டுதான். ஒன்று திருவாதிரை; மற்றொன்று திருவோணம். திருவாதிரையில் பிறந்த குழந்தைகள் சூட்சும புத்தியோடும், அதீத நுண்ணறிவோடும் இருப்பார்கள். ‘‘இந்த வயசுலயே எப்படி பெரிய மனுஷன் மாதிரி பேசறான் பார்த்தீங்களா’’ என்று வியக்க வைப்பார்கள். நட்சத்திரத்தின் அதிபதியாக ராகு வருவதால் எந்தப் பொருளை எடுத்தாலும் பிரித்துப் பார்த்து மறுபடியும் இணைக்க முயற்சிப்பார்கள். ஐந்து வயதிலேயே பத்து வயதுக்கான முதிர்ச்சி இருக்கும். வகுப்பறையில் ஆசிரியரிடம் எந்தக் கேள்வியையும் தயங்காது கேட்பார்கள். ஆனால், திடீரென்று காரணமே இல்லாது மூட் அவுட் ஆகி விடுவதும் உண்டு.

முதல் பாதத்தில் பிறந்தவர்களுக்கு ஏறக்குறைய 15 வயது வரை ராகு தசை நடக்கும். இவர்களின் சொந்த ஜாதகத்தில் ராகு நன்றாக இருந்தால், பள்ளியிலேயே முதன்மையாக வருவார்கள். விளையாட்டில் அதிக ஆர்வம் காட்டுவார்கள். ஆறாம் வகுப்பிற்குப் பிறகு எதிர்காலத்தைப் பற்றி பெற்றோர் திட்டமிடத் தொடங்குவார்கள். வேறு பள்ளிக்கு மாற்றலாமா என்றுகூட யோசிப்பார்கள். சப்ஜெக்ட்டை விட மொழியறிவு அதிகம் இருக்கும். மதிப்பெண்ணில் கூட லிமிட் வைத்திருப்பார்கள். ‘‘தொண்ணூறுமார்க் வருதா... இதுவே அதிகம்’’ என்று திருப்தி அடைவார்கள். அறிவுபூர்வமாகவும் அபத்தமாகவும் கேள்விகளைக் கேட்டபடி இருப்பார்கள்.

இந்த ராகு தசையில் சாதாரணமாகப் படித்தாலும், 16 முதல் 31 வயது வரையுள்ள குரு தசையில் கூடுதல் பொறுப்போடு நடந்து கொள்வார்கள். பள்ளியில் மதிப்பெண் குறைந்தாலும், கல்லூரியில் வெளுத்துக் கட்டுவார்கள். ராகுவின் ஆதிக்கம் அதிகமாக உள்ளதால் ஆராய்ச்சிக் கல்வியை விரும்புவார்கள். கேம்பஸ் இன்டர்வியூவில் செலக்ட் ஆனாலும், வேலை வேண்டாம் என்று சிலர் படிப்பைத் தொடர்வார்கள். சட்டம், ஆசிரியப் பணி, ஆடிட்டர் என்று போனால் சிறப்பாக வருவீர்கள். கம்ப்யூட்டரில் ஹார்ட்வேர், அனிமேஷன், ஆர்க்கிடெக்ட் போன்றவையும் ஏற்றம் தருவதாக அமையும்.

இரண்டாம் பாதத்தை மகரச் சனி ஆட்சி செய்கிறது. 12 வயது வரை ராகு தசை நடைபெறும். கிட்டத்தட்ட 4 வயது வரை குழந்தையின் உடல்நலம் குறித்து கவலைப்பட நேரும். படிப்பிலும் மெதுவாகத்தான் இருப்பார்கள். ஆறாம் வகுப்பு வரை நெருக்க வேண்டாம். அதன்பிறகு சிறப்பாகப் படிப்பார்கள். பள்ளிக்கல்வி முடிக்கும்முன்பே கல்லூரியில் என்ன படிக்க வேண்டும் என்பதை தீர்மானித்து விடுவார்கள். 13லிருந்து 27 வயது வரை குரு தசை வருவதால் எல்லாவற்றிலும் சிஸ்டமேட்டிக்காக மாறுவார்கள். கற்பனை வளம் அதிகமாக இருக்கும். வானவியல் பற்றி ஆர்வமாகப் படிப்பார்கள். பள்ளியிறுதி படிக்கும்போதே ஸ்பேஸ்கிராஃப்ட், பைலட் ஆவது பற்றிய விஷயங்களை காதில் போட்டு வையுங்கள். கனிம வளம், புவியியல் சம்பந்தமாகப் படிக்க வைத்தால் சிறப்பாக வருவார்கள். மருத்துவத்தில் ஆர்த்தோ, சரும நோய் போன்ற துறைகளைத் தேர்ந்தெடுத்தால் நல்ல எதிர்காலம் உண்டு.

மூன்றாம் பாத அன்பர்களின் அதிபதியாக கும்பச் சனி வருகிறார். ஏறக்குறைய 7 வயது வரை ராகு தசை நடக்கும். ஏதேனும் ஒரு காரணத்தால் தாய், தந்தையரை விட்டுப் பிரிந்து, பின்னர் சேர்ந்து வாழ வேண்டியிருக்கும். 8 வயதிலிருந்து 23 வயது வரை குரு தசை நடைபெறும். இந்தக் குழந்தைகள் அதிகமாக கோபப்படுவார்கள். பத்தாம் வகுப்பு வரை நன்றாகப் படித்தவர்களுக்கு, மேல்நிலை பள்ளிப் படிப்பில் கொஞ்சம் அலட்சியம் வந்து விடும். பிறகு கல்லூரியில் இரண்டாம் ஆண்டு முதல் சிறப்பாக படிக்கத் தொடங்குவார்கள். இவர்களின் நட்பு வட்டத்தை மென்மையாகக் கண்காணித்தல் நல்லது. கால்நடை மருத்துவம், விலங்கியல், தாவரவியல் போன்ற துறைகளைத் தேர்ந்தெடுப்பது சிறப்பு தரும். மருத்துவத்தில் எலும்பு, நரம்பு, மயக்க மருந்து நிபுணர் போன்றவை எனில் நல்லது.
முதல் பாதத்திற்கும், 4ம் பாதத்திற்கும் அதிபதியாக குருவே வருகிறார். ஆனால் 4ம் பாதத்திற்கு அதிபதியாக மீன குரு வருவார். 1ம் பாதத்தை விட அதிர்ஷ்டக்காற்று அதிகமாக அடிக்கும். 4 வயது வரை ராகு தசை நடக்கும். ஆனால் ராகு இவர்களுக்கு யோக ராகுவாக மாறுவார். 5லிருந்து 20 வயது வரை குரு தசை வருவதால், கல்லூரி வாழ்க்கை வரை எந்தப் பிரச்னையும் இருக்காது. எட்டாம் வகுப்பு வரும்போது மட்டும் தந்தையாரின் பணி மாற்றத்தினாலோ அல்லது வேறு காரணங்களினாலோ படிப்பு தடைபடுவதுபோல இருக்கும். ஆனால், சரியாகி விடும். பத்தாம் வகுப்பு தாண்டும்போதே ஐ.ஏ.எஸ். பற்றி காதில் போட்டு வையுங்கள். அலுவலக நிர்வாகம் சார்ந்த படிப்புகளை படிக்க வையுங்கள். பி.இ. படிப்பில் ஐடி, கெமிக்கல் போன்றவை ஏற்றதாகும். மருத்துவத்தில் ஈ.என்.டி, வயிறு, சிறுநீரகம் சம்பந்தமாக படித்தால் நிபுணராக விளங்கும் வாய்ப்பு அதிகம்.


திருவாதிரை நட்சத்திரத்தின் அதிபதியாக ராகு பகவான் வருகிறார். எனவே இவர்களிடம் பொதுவாகவே ராகுவின் ஆதிக்கம் நிறைந்திருக்கும். ராகு பகவான் பூரணமாக இவர்களை ஆள்வதால், கூர்மையான புத்தியைப் பெற நாகராஜரை வணங்குவது நல்லது. நாகர்கோவில் தலத்தில் மூலவராகவே ஐந்து தலையுடன் நாகராஜர் அருள்பாலிக்கிறார். பிறந்ததிலிருந்து ராகு தசையின் ஆதிக்கத்தில் பல வருடங்கள் இருப்பதால், நாகராஜாவை வணங்குவது நல்லதையே செய்யும்.

புனர்பூசம்தான் மிதுன ராசியில் இடம்பெற்றுள்ள சாத்வீகமான நட்சத்திரம். நட்சத்திர அதிபதியாக குருவும், ராசியாதிபதியாக புதனும், முதல் பாதத்தின் அதிபதியாக செவ்வாயும் வருகிறார்கள். பொதுவாகவே இந்த நட்சத்திரத்தில் பிறந்தவர்கள் கற்றல், கற்பித்தல் என்றுதான் இருப்பார்கள். பள்ளியில் படிக்கும்போதே நாலு பேருக்கு சொல்லிக் கொடுக்கவும் செய்வார்கள். முதல் பாதத்தில் பிறந்தவர்களுக்கு ஏறக்குறைய 14 வயதுவரை குரு தசை இருக்கும். அதனால் கூச்ச சுபாவத்தோடு இருப்பார்கள். எட்டாம் வகுப்பு வரை படிப்பிலும், ஒழுக்கத்திலும் உதாரண மாணவராக விளங்குவார்கள். 15லிருந்து 33 வயது வரை சனி தசை நடக்கும். பொதுவாக இந்த ராசிக்கே சனி யோககாரகன்தான். அப்படியிருந்தும் பாதகாதிபதியாக செவ்வாய் வருவதால், படிப்பில் கவனம் சிதறும். பள்ளிப் பருவத்திலிருந்தே காவல்துறை, ராணுவம், விமானப்படை என்று பல்வேறு விதமான துறைகளை சுட்டிக்காட்டி நம்பிக்கை கொடுங்கள். எஞ்சினியரிங்கில் எலெக்ட்ரிகல் அண்ட் எலக்ட்ரானிக்ஸ், கெமிக்கல் போன்றவை முன்னேற்றத்தைக் கொடுக்கும். கெமிஸ்ட்ரி, மைக்ரோ பயாலஜி, ஜெனிடிக் எஞ்சினியரிங் போன்றவையும் சிறப்பே.


இரண்டாம் பாதத்தில் பிறந்தவர்கள் வசீகரமாக இருப்பார்கள். முதல் பத்து வருடங்கள் குரு தசை நடக்கும். விளையாட்டும் இருக்கும்; விஷயமும் இருக்கும் என்பதாகத்தான் வலம் வருவார்கள். பள்ளியில் பாட்டு, நடிப்பு என வெளுத்து வாங்குவார்கள். ஏதேனும் போட்டிக்கு பெயரைக் கொடுத்தபடி இருப்பார்கள். 11 வயதிலிருந்து 29 வரை சனி தசை நடைபெறும். சனியும், இவர்களது பாதத்தின் அதிபதியான சுக்கிரனும் நெருங்கிய சிநேகிதர்கள். அதனால் மிகுந்த சுறுசுறுப்புடன் திகழ்வார்கள். கலைகளில் ஆர்வம் காட்டுவார்கள். பள்ளி முடித்ததும் திரைத்துறை சார்பான தொழில் நுட்பம் சார்ந்த கல்வியை தாராளமாகப் படிக்கலாம். விஸ்காம், ஃபேஷன் டெக்னாலஜி, ஆட்டோமொபைல் எஞ்சினியரிங் போன்றவையும் சிறந்தது. இசைக் கல்லூரியில் சேர்ந்து படித்தால், பெரிய அங்கீகாரம் கிடைக்கும்.

மூன்றாம் பாதத்தின் அதிபதியாக புதன் வருகிறார். ராசியாதிபதியாகவும் அவரே இருக்கிறார். நட்சத்திரத் தலைவர் குரு என்பதைப் பார்த்தோம். ஏறக்குறைய 6 வயது வரை குரு தசை நடப்பதால் சிறுவயதில் அவ்வப்போது உடல்நலம் பாதிக்கும். கிட்டத்தட்ட மூன்றாம் வகுப்பிலேயே பள்ளி மாறி படிக்கும் சூழல் உருவாகும். ஆனால், அது நல்லதாகவே அமையும். கணக்கு பாடத்தில் நல்ல மதிப்பெண் பெறுவீர்கள். அறிவியல்தான் கொஞ்சம் அலைக்கழிக்க வைக்கும். கிட்டத்தட்ட கல்லூரி முடியும் வரை சனி தசை நடைபெறுவதால் சிறப்பாகவே இருக்கும். புள்ளியியல், சட்டம், அக்கவுன்ட்ஸ், பொலிட்டிகல் சயின்ஸ், சி.ஏ. போன்ற படிப்புகள் சிறப்பு தரும். ஆர்க்கிடெக்ட், கம்ப்யூட்டர் அனிமேஷன், கேட்டரிங் டெக்னாலஜி போன்றவை கிடைத்தால் விடாது படியுங்கள். நிச்சயம் சாதிக்கலாம்.

புனர்பூசத்தின் நான்காம் பாதத்தை சந்திரன் ஆள்கிறார். சந்திரனின் இரட்டிப்புச் சக்தி இவர்களிடம் இணைந்து இருக்கும். இதனால் சவாலான வாழ்க்கையை விரும்புவார்கள். மிதமிஞ்சிய கற்பனை வளம் இருக்கும். சிறுவயதில் தந்தை மற்றும் தாயாரை விட்டுப் பிரியும் சூழ்நிலை ஏற்படலாம். அதனால் இந்த நேரத்தில் ஆரண்யம், காடு என்று முடியும் தலத்திற்குச் சென்று ஈசனை வணங்க வேண்டும். உதாரணமாக வேதாரண்யம், திருவெண்காடு, திருவாலங்காடு போன்ற தலங்களில் வணங்கலாம். ஏறக்குறைய 3 வயதுவரை குரு தசை இருக்கும். பிறகு 22 வயது வரை சனி தசை நடைபெறும். 8 வயதில் கல்வியில் தடை ஏற்பட்டு, வேறு பள்ளி அல்லது ஊருக்கு செல்ல நேரும். பொருளாதார நெருக்கடியை சிறிய வயதிலேயே பார்த்து விடுவதால், கல்லூரிப் பருவத்தில் வேலைக்கும் செல்வார்கள். இவர்களுக்கு எப்போதும் மேஷம், ரிஷபம், விருச்சிகம், தனுசு ஆகிய ராசிகளில் பிறந்தவர்கள் ஆதரவாக இருப்பார்கள். மெரைன் எஞ்சினியரிங், ஐ.டி., மருத்துவத்தில் இ.என்.டி., மனநோய் மருத்துவம் போன்ற துறைகளில் ஏற்றம் உண்டு. ஃபேஷன் டெக்னாலஜி, எம்.பி.ஏ. படிப்பில் பைனான்ஸ் போன்றவை ஏற்றது. தமிழ் இலக்கியம் படித்தால், சமூக அங்கீகாரம் நிச்சயம் கிடைக்கும்.

புனர்பூசம் குருவின் நட்சத்திரமாக வருவதாலும், செவ்வாயும் புதனும் இவர்களை திணறடிப்பதாக இருப்பதாலும் திருப்புலிவனம் எனும் தலத்திலுள்ள வியாக்ரபுரீஸ்வரரையும் சிம்ம குரு தட்சிணாமூர்த்தியையும் தரிசித்தால் கல்வியில் மேன்மை பெறலாம். வியாக்ரபுரீஸ்வரர் எனும் குருவே புலி வடிவம் கொண்டு இத்தல ஈசனை பூஜித்திருக்கிறார். உத்திரமேரூர் - காஞ்சிபுரம் பாதையில் உத்திரமேரூரிலிருந்து 5 கி.மீ. தொலைவில் இத்தலம் உள்ளது.
அனுபவங்களை அதிகமாகக் கொடுத்து வாழ்க்கையை செப்பனிடும் சனி பகவானே பூசம் நட்சத்திரத்தை ஆள்கிறார். சனியை அதிபதியாகக் கொண்ட சக்தி வாய்ந்த நட்சத்திரம் இது. இது கடக ராசிக்குள் வரும் நட்சத்திரம். சந்திரனை அதிபதியாகக் கொண்ட ராசி இது. இப்படி சந்திரனும் சனியும் சேர்ந்து ஆள்வதால், சந்திரனுடைய கலா தத்துவமும், கற்பனையும், சனியின் கடின உழைப்பும், தைரியமும் ஒன்றாக இவர்களிடத்தில் வெளிப்படும்.

பூச நட்சத்திரத்தின் முதல் பாதத்தில் பிறந்த குழந்தைகள் எப்படி என்று பார்ப்போம். ராசியாதிபதி சந்திரன், நட்சத்திரத்தை ஆளும் சனி, முதல் பாதத்தின் அதிபதி சூரியன் என மூவரும் சேர்ந்து இவர்களை ஆட்சி செய்கின்றனர். இவ்வாறு மூன்று முக்கிய கிரகங்கள் ஆள்வதால், சிறிய வயது முதலே வித்தியாசமாக இருப்பார்கள். ‘‘சின்னப் பையனா இருந்தாலும், அவன் சொல்றதுலயும் விஷயம் இருக்கு’’ என ஆச்சரியப்பட வைப்பார்கள். முதல் பாதத்தை சூரியன் ஆட்சி செய்வதால், சிறிய வயதிலேயே சிலருக்கு கண்ணாடி போட வேண்டியிருக்கும். கொஞ்சம் முன்கோபத்தோடு இருப்பார்கள். தன்னை விட வயதில் மூத்தவர்களோடு நட்பு கொள்வார்கள். ஏறக்குறைய 17 வயது வரை சனி தசை நடைபெறுகிறது.

கொஞ்சம் கடினமாகத்தான் இருக்கும். ஆனால், சனி தசை முடிகிற காலமாதலால் பன்னிரெண்டாம் வகுப்பில் நல்ல மதிப்பெண்கள் பெறுவார்கள். கல்லூரி வாழ்க்கையும் சிறப்பானதாக அமையும். யாருமே எளிதில் விரும்பாத துறையைத் தேர்ந்தெடுத்துப் படித்து வெற்றி பெறுவார்கள். ஆங்கில இலக்கியம், பொலிட்டிகல் சயின்ஸ், வரலாறு போன்ற படிப்புகளைத் தேர்ந்தெடுத்தால் பேராசிரியராகும் வாய்ப்புண்டு. ஏரோநாட்டிகல் எஞ்சினியரிங், மருத்துவத்தில் கண், கால், நரம்பு அறுவை சிகிச்சை நிபுணராக வாய்ப்புண்டு. எம்.பி.ஏ. படிக்கும்போது ஹெச்.ஆர். துறையைத் தேர்ந்தெடுத்துப் படித்தல் நல்லது.

இரண்டாம் பாதத்தை கன்னி புதன், சந்திரன், சனி என மூவரும் முறையே ஆட்சி செய்கின்றனர். பாதத்தின் அதிபதியாக புதன் வருவதால், சூட்சுமமான புத்தியோடு திகழ்வார்கள். விளையாட்டுகளில் மாநில அளவில் வெற்றி பெறும் வாய்ப்பும் உண்டு. இவர்கள் பேசினால், அதில் யோசிக்க பத்து விஷயங்கள் இருக்கும். கணிதத்தில் புலியாகப் பாய்வார்கள். கிட்டத்தட்ட 13 வயது வரை சனி தசை இருக்கும். வைட்டமின் சி குறைபாடு, சரும நோய் போன்றவை வந்து நீங்கும். ஐந்தாம் வகுப்பு வரை ஒரு பள்ளியில் படித்து, பின்னர் வேறு பள்ளிக்கு மாறும் சூழ்நிலை ஏற்படும். 14 வயதிலிருந்து 30 வயது வரை புதன் தசை நடைபெறுவதால், பாதத்தின் அதிபதியான புதனின் ஆசியோடு திட்டமிட்டு வெற்றி பெறுவார்கள். இவர்களில் பலரும் சி.ஏ., ஏ.சி.எஸ் எனப் படித்து பிரகாசமடைகிறார்கள். பி.இ. கெமிக்கல், புள்ளியியல் படிப்பில் நிபுணத்துவம் என்று சிறப்படைவார்கள். மெரைன் எஞ்சினியரிங் படிப்பிற்கும் முயற்சிக்கலாம். 

மூன்றாம் பாதத்தை சனி, சந்திரன், சுக்கிரன் என்று மூவரும் ஆள்கிறார்கள். மூன்றுமே நட்புக்கிரகங்கள். ஏறக்குறைய 8 வயது வரை சனி தசை இருக்கும். அதில் இரண்டு வருடங்கள் கொஞ்சம் படுத்தினாலே அதிகம். 9 வயதிலிருந்து 24 வரை புதன் தசை வரும்போது படிப்பைத் தாண்டி, கலை சம்பந்தமான போட்டிகள், விளையாட்டு என்று ஈடுபடுவார்கள். போட்டிகளிலும் பங்கேற்பார்கள். படிப்பிலும் குறை சொல்ல முடியாது. இவர்களில் பலரும் தங்களுக்குப் பிடித்தமான ஆங்கில இலக்கியம் படித்துவிட்டு, பிறகு தொழில் சார்ந்த கல்வியை கற்பார்கள். ஃபேஷன் டெக்னாலஜி, கேட்டரிங், விஸ்காம் போன்ற படிப்புகள் இவர்களுக்கு ஏற்றவை. அதில் பெரிதாக சாதிக்கலாம். ஏரோநாட்டிகல் எஞ்சினியரிங், ஆட்டோமொபைல் எஞ்சினியரிங், எலக்ட்ரானிக்ஸ் என்று படித்தால் நல்ல எதிர்காலம் உண்டு. 

நான்காம் பாதத்தை செவ்வாய் ஆள்வதால், இளம் வயதிலேயே பேச்சு சாதுர்யம் இருக்கும். 4 வயது வரை சனி தசை இருக்கும். செவ்வாய் இங்கு பாதத்தின் அதிபதியாக வருவதால் ஏதேனும் சிறு அறுவை சிகிச்சை நடக்கலாம். 5 வயதிலிருந்தே புதன் தசை தொடங்கி 20 வரை நடைபெறும். இந்த நட்சத்திரத்தில் இந்த நான்காம் பாதத்தைச் சேர்ந்தவர்கள்தான் கொஞ்சம் சோதனைக்கு ஆளாவார்கள். கல்லூரிவரை ஏனோதானோ என்று படித்து முடிப்பார்கள். ஆனால், வாழ்க்கையில் ஜெயிப்பார்கள். பள்ளியில் படிக்கும்போது சுளீரென்ற கோபத்தால் நிறைய பேரை பகைத்துக் கொள்ள நேரிடும். 21 வயதிலிருந்து 27 வரை கேது தசை நடைபெறும்போதும் படிப்பு பற்றிய விஷயங்கள் சுமாராகத்தான் இருக்கும். பள்ளியில் சுமாராகப் படித்தாலும், கல்லூரி என்று வரும்போது கெமிஸ்ட்ரி, புவியியல், மண்ணியல், விலங்கியல் போன்ற படிப்புகளை எடுத்தால் நல்லது. பி.இ. எலெக்ட்ரிகல் அண்ட் எலக்ட்ரானிக்ஸ், ஐ.டி. என்று படித்தால் வெற்றி பெறுவார்கள். பலர் ராணுவம் அல்லது காவல்துறை வேலைக்குச் செல்வார்கள்.

பூசம் நட்சத்திரம் கடக ராசிக்குள் இருக்கிறது. சந்திரன் இங்கு உச்சமாகிறார். மேலும், மனதிற்கு உரியவனும் சந்திரன்தான். ஆகவே எப்படிப் பார்த்தாலும் சந்திரன் பூஜித்து சக்தி பெற்ற கோயில்கள்தான் இவர்களுக்கு அதீத நன்மையைத் தரும். அப்படிப்பட்ட ஒரு தலம்தான் திருமாந்துறை ஆகும். தேய்ந்த சந்திரனை ஈசனின் அருளால் முழுமையாக ஒளிரச் செய்த தலம் இது. அதனாலேயே அட்சயநாதர் என்று இத்தல நாயகருக்குப் பெயர். சந்திரனுக்கு வந்த க்ஷயம் எனும் குஷ்டநோயைத் தீர்த்தவரும் இந்த அட்சயநாதரே. இவரை வணங்கி கல்வியில் சிறக்கலாம். கும்பகோணத்தை அடுத்த சூரியனார்கோவிலுக்கு 2 கி.மீ. தூரத்தில் உள்ளது இந்தத் தலம்.

கடக ராசிக்குள் உடல் வலிமையும் மன உறுதியும் அதிகம் கொண்டவர்கள் ஆயில்யம் நட்சத்திரத்தில் பிறந்தவர்கள். ஆயில்ய நட்சத்திரத்தை வித்யாகாரகனான புதன் ஆள்கிறார். சிறிய வயதிலிருந்தே இவர்கள் தனித்துத் தெரிய வேண்டுமென விரும்புவார்கள். அதனாலேயே பல சோதனைகளையும் எதிர்கொள்வார்கள். எல்லா விஷயங்களையும் தெரிந்து கொள்ளத் துடிப்பார்கள். வயதுக்கு மீறிய சிந்தனைகள் இருக்கும். இதனால் பல புறக்கணிப்புகளையும் எதிர்கொள்வார்கள். மதிப்பெண்ணுக்காக படிக்காமல், உலக விஷயங்களைத் தெரிந்து கொள்ள படிப்பார்கள். ஆயில்ய நட்சத்திரத்தில் பிறந்த பலருக்கு வெளிநாடுகளில் சென்று படிக்கும் யோகம் கிட்டும்.

ஆயில்யம் முதல் பாதத்தை தனுசு குரு ஆள்கிறார். ஏறக்குறைய 15 வயது வரை புதன் தசை நடைபெறும். கடக ராசிக்கு புதன் பகைதான். அதனால் கொஞ்சம் வீசிங் தொல்லை வந்து நீங்கும். படிப்பில் கவனம் குறைந்து விளையாட ஓடுவார்கள். முதல் பாதத்தில் பிறந்த குழந்தைகளில் சிலர், வெகு நாட்கள் பேசாமல் இருந்து பேசுவார்கள்; அல்லது கிட்டத்தட்ட 12 வயது வரை கூச்ச சுபாவத்தோடு இருப்பார்கள். அடுத்து 16 வயதிலிருந்து 22 வரை கேது தசை நடக்கும். இது புதன் தசையைவிட நன்றாக இருக்கும். பத்தாம் வகுப்பு வரை சுமாராகப் படித்தவர்கள், பிளஸ் 2வில் நினைத்த மதிப்பெண்கள் பெறுவார்கள். வெளிநாடு சென்று படிக்கும் வாய்ப்பு கிடைக்கும். ஐ.டி. துறை இவர்களுக்கு மிகுந்த சிறப்பைத் தரும். மேலும் சட்டம், பொலிட்டிகல் சயின்ஸ் போன்றவையும் எளிதாக வரும். மொழித்திறன் அதிகமாக இருப்பதால், வேலைக்குச் சென்று கொண்டே பிரெஞ்ச், ஜெர்மன் என்று பயின்றால் சிறப்பு கூடும். 

இரண்டாம் பாதத்தின் அதிபதியாக மகரச் சனி வருகிறார். புதனும், சந்திரனும் சேர்ந்து மகரச் சனியின் தோளில் கைபோட்டு அமர்க்களமாக செல்வார்கள். 12 வயது வரை படிப்பில் சுமாராகத்தான் இருப்பார்கள். அதற்குப் பிறகு 13 வயதிலிருந்து 19 வரை நடைபெறும் கேது தசையிலும் தடங்கல்கள் இருக்கத்தான் செய்யும். ஆனாலும் பிளஸ் 2 முடித்து திடீரென்று கல்லூரியில் சம்பந்தமேயில்லாத படிப்பிற்கு இடம் கிடைத்து ஜெயிப்பார்கள். கேட்டரிங் டெக்னாலஜி, விஸ்காம், ஆட்டோமொபைல் துறைகளில் சாதிப்பார்கள். இவர்கள் பி.காம்., பி.எஸ்சி. பிசிக்ஸ், தத்துவம் என்று படிக்கும்போது அதில் தனித்துவமிக்க நபராக விளங்குவார்கள். பைலட் ஆவதற்கான முயற்சிகளையும் மேற்கொள்ளலாம். 20 வயதிலிருந்து 39 வரை சுக்கிர தசை நடைபெறும்போது, இவர்கள் சுமாராக படித்த படிப்பே அதிகளவில் உதவிகரமாக இருக்கும். அதனால் அதற்கு முன்பே கஷ்டப்பட்டு படித்து விட்டால் நல்ல எதிர்காலம் கிடைக்கும். இவர்களில் பலர் டி.எஃப்.டி. படித்து திரைப்படத் துறையினுள் நுழைவார்கள்.

மூன்றாம் பாதத்தை கும்பச் சனி, புதனோடும் சந்திரனோடும் சேர்ந்து ஆட்சி செலுத்துகிறார். கொஞ்சம் சாத்வீகமான அமைப்பு இது. 7 வயது வரை புதன் தசை நடைபெறும். குழந்தைகளுக்குரிய துறுதுறுப்பும் முதிர்ச்சியும் சேர்ந்தே இருக்கும். திடீரென்று மூன்றாம் வகுப்பிலிருந்தே வேறு பள்ளியில் சேர்ந்து படிக்க வேண்டியிருக்கும். 8 வயதிலிருந்து 14 வயது வரை கேது தசை நடைபெறும். ஒன்பதாம் வகுப்பு வரை சுமாராகப் படிப்பார்கள். 15 வயதிலிருந்து 34 வரை சுக்கிர தசை வரும். கல்லூரிக்கே காரில் செல்லும் வாய்ப்புகள் அதிகமுண்டு. திடீரென்று எல்லா சப்ஜெக்ட்டும் புரியத் தொடங்கும். அசாதாரணமாக படித்து விடுவார்கள். ஆர்க்கிடெக்ட், கன்ஸ்ட்ரக்ஷன், இன்டீரியர் டெக்கரேஷன் என்று துறைகளைப் பிடித்து பரபரவென முன்னேறலாம். கிட்டத்தட்ட இரண்டாம் பாதத்தில் பிறந்தவர்களுக்கான எல்லா பலன்களும் இவர்களுக்கு பொருந்தும். 
நான்காம் பாதத்தை மீன குருவோடு, புதனும், சந்திரனும் ஆட்சி செலுத்துகிறார்கள். மூன்று வயது வரை ஏதாவது நோய்கள் வந்து நீங்கியபடி இருக்கும். 4 வயதிலிருந்து 10 வரை நடைபெறும் கேது தசையில், உள்ளரங்க விளையாட்டுகளில் ஆர்வம் காட்டுவார்கள். 11 வயதிலிருந்து சுக்கிர தசை தொடங்கி 30 வயது வரை இருப்பதால் வீட்டில் என்ன சொல்கிறார்களோ, அதன்படி படிப்பார்கள். சமூகத்தில் எந்த துறையில், எந்த படிப்பிற்கு மதிப்பு இருக்கிறதோ, அதை சாதாரணமாகப் படிப்பார்கள். சட்டத் துறையில் நிபுணராகும் வாய்ப்புகள் அதிகமுண்டு. பொருளாதார மேதையாகும் யோகமும் உண்டு.

கல்லூரியில் எந்தத் துறையைத் தேர்ந்தெடுக்கிறார்களோ, அதில் பிஎச்.டி. வரை முடித்து விட்டு அங்கேயே பேராசிரியராக பணியாற்றும் வாய்ப்புகள் உண்டு. பி.இ. ஆட்டோமொபைல் எஞ்சினியரிங், மெக்கானிகல் என்று சேரலாம். மருத்துவத் துறையில் வயிறு, உளவியல் சம்பந்தமான துறையில் எளிதாக வெற்றி பெறலாம். 

பூச நட்சத்திரத்திற்கு எப்படி சந்திரனோ, அதுபோல ஆயில்ய நட்சத்திரத்திற்கு சூரியன்தான் கல்வியைத் தீர்மானிக்கிறார். எனவே சூரிய பகவானின் சிறப்புக்குரிய தலங்களுக்குச் சென்று வணங்கினால், கல்வியில் உச்சம் பெறலாம். அப்படிப்பட்ட தலங்களில் ஒன்றுதான் சூரியனார்கோவில். இத்தலத்தில் மூலவராகவே சூரிய பகவான் அருள் பாலிக்கிறார். ஜாதகத்தில் சூரியனின் பலம் குன்றியோர்கள் நிச்சயம் இத்தலத்தை தரிசிக்க வேண்டும். கும்பகோணத்திலிருந்து 14 கி.மீ. தொலைவில் இத்தலம்
உள்ளது.
‘வாழ்க்கை என்பது என்ன... கடவுள் இருக்கிறாரா இல்லையா...’ போன்ற கேள்விகளை உருவாக்கி, தேடலைத் துவக்கும் ஞானகாரகனான கேதுதான் மகம் நட்சத்திரத்தை ஆள்கிறார். சிம்ம ராசிக் கூட்டினில் இருப்பதால் சிம்ம ராசியின் அதிபதியான சூரியனும் கேதுவும் வலிமையோடு இந்த நட்சத்திரத்தை ஆட்சி செய்கிறார்கள். இதனால் சூட்சுமமான புத்தியோடு சேர்ந்த ஆளுமையும் இருக்கும். எதையுமே தைரியமாக அணுகுவார்கள்.

மகம் நட்சத்திரத்தின் முதல் பாதத்தின் அதிபதி செவ்வாய். இவரோடு ராசியாதிபதி சூரியனும், நட்சத்திரத் தலைவராக கேதுவும் ஆள்கிறார்கள். இப்படி இரண்டு ராஜகிரகங்கள் ஒன்றாக இருப்பதால், கல்வியில் நல்ல அடித்தளம் அமையும். மிகச் சிறந்த பள்ளியில் படிக்க முடியும். 6 வயது வரை கேது தசை நடைபெறும். அப்போது மட்டும் கொஞ்சம் உடம்பு படுத்தியெடுக்கும். 7 வயதிலிருந்து 26 வரை சுக்கிர தசை நடைபெறும். தோற்றப் பொலிவு அப்படியே மாறி விடும். படிப்பில் கவனம் இருந்தாலும், கலைகளுக்கும் இடம் தருவார்கள். இந்த நல்ல மாற்றங்கள் 13 வயதுக்குப் பிறகுதான் வரும். அதுவரையிலும் கூச்சமும் தடுமாற்றமும் இருக்கும். பள்ளியில் எந்தப் போட்டி நடந்தாலும் பங்கேற்பார்கள். முதல் பாதத்தில் பிறந்தவர்கள் எஞ்சினியரிங்கில் எலெக்ட்ரிகல், கெமிக்கல் எடுத்தால் நல்லது. விலங்கியல், தத்துவம், வரலாற்றுத்துறை ஆழமாக ஈர்க்கும். பி.காம். படிப்பதை விட இவர்கள் பி.பி.ஏ. படிப்பது நல்லது. மருத்துவத்தில் டென்டல் சர்ஜன், ஆர்த்தோ என்ற துறைகளைத் தேர்ந்தெடுக்கும்போது மிகச் சிறந்த நிபுணராக வருவர். தாய்மொழியில் அதிக கவனம் செலுத்துவார்கள்.

இரண்டாம் பாதத்தின் அதிபதியாக ரிஷப சுக்கிரன் வருகிறார். பொதுவாகவே கேது சொந்த ஜாதகத்தில் நன்றாக இல்லாத பட்சத்தில், பிறக்கும்போது வரும் கேது தசை ஏதேனும் சிறுசிறு தொந்தரவுகள் கொடுக்கும். 4 வயது வரை இப்படித்தான் இருக்கும். 5லிருந்து 24 வயது வரை சுக்கிர தசை நடைபெறும். முதல் பாதத்தை விட பெரிய அளவிலான நன்மைகளை சுக்கிரன் செய்வார். பாட்டு, நடனம், இசை என ஏதேனும் ஒரு கலையைக் கற்றுக் கொள்வார்கள். 25லிருந்து 30 வயது வரை சூரிய தசை வரும். அதற்கு முன்னதாகவே கல்வியில் பெரும் பகுதியை முடித்துவிடுவது நல்லது. கல்லூரியில் தாவரவியல், பயோ டெக்னாலஜி போன்ற படிப்புகளைத் தேர்ந்தெடுக்கலாம். பொறியியல் என்றால் ஆர்க்கிடெக்ட், சிவில் சேரலாம். பி.காம். படிக்கலாம். ஏரோநாட்டிகல்தான் லட்சியம் என்று சிலர் படிப்பார்கள்.


மூன்றாம் பாதத்தை புதன் ஆள்வதால் சூட்சும புத்தி நிரம்பியிருக்கும். அண்டமே சிதறினாலும் அசராத மனநிலை கொண்டிருப்பார்கள். முதல் இரண்டு வருடங்கள் கேது தசை வழக்கம்போல் உடல் உபாதையைக் கொடுக்கும். 3 வயதிலிருந்து 22 வரை சுக்கிர தசை நடைபெறும்போது அறிவுக்கூர்மை கூடும். பிளஸ் 2 படிக்கும்போது பள்ளியில் முதல் மதிப்பெண்ணுக்கு முயற்சிப்பார்கள். வாழ்க்கை பற்றிய தேடல் கிட்டத்தட்ட 15 வயதில் தொடங்கும். எழுத்தாளர்கள், பத்திரிகை ஆர்வம் என்று இறங்குவார்கள். படிப்பில் படு சுட்டியாக இருந்து, விருப்பப்பட்ட கல்லூரியில் படிப்பார்கள். 23 வயதிலிருந்து 28 வரை சூரிய தசை வரும்போது தர்க்கம் செய்வதில் கைதேர்ந்தவர் ஆவார்கள். இந்த பாதத்தில் பிறந்த பலர் ஆங்கில இலக்கியம் படித்து விட்டு, பிறகு தொழிலுக்காக வேறு ஏதேனும் படிப்பார்கள். இயற்பியல், தாவரவியல் படிப்பில் தனி கவனம் செலுத்துவார்கள். புதன் ஆள்வதால் டிசைனிங், ஆர்க்கிடெக்ட் என்று படித்தால் நல்ல எதிர்காலம் உண்டு.

நான்காம் பாதத்தின் அதிபதி சந்திரன். இவர்களுக்கு மொழியறிவு அதிகம் இருக்கும். பிறக்கும்போதே கேது தசை சில மாதங்கள் இருக்கலாம். 2 வயதிலிருந்து 20 வரை சுக்கிர தசை நடைபெறும்போது, எத்தனை வசதி இருந்தாலும் ஏதோ ஒன்றை இழந்ததுபோல வாடுவார்கள். என்னதான் சுக்கிர தசை நடந்தாலும், பள்ளி வாழ்க்கை எப்போது முடியும் என்று அலுப்பு வரும். சிலர் குடும்பச் சூழ்நிலை காரணமாக விடுதியில் தங்கி படிப்பார்கள். 21 வயதிலிருந்து 26 வரை நடக்கும் சூரிய தசை வாழ்க்கையை சட்டென்று மேலேற்றும். சுக்கிர தசையை விட இந்த சூரிய தசைதான் நன்றாக இருக்கும். பொறியியலில் எலெக்ட்ரானிக் அண்ட் கம்யூனிகேஷன், ஆர்க்கிடெக்ட், ஆட்டோமொபைல் படிக்கலாம். விஸ்காம் படித்தால் எதிர்காலம் உண்டு. சி.ஏ. படிப்பை எளிதாகத் தாண்டுவார்கள். மருத்துவத்தில் இ.என்.டி, ரேடியாலஜி, அனஸ்தீஸியா போன்ற துறைகளைத் தேர்ந்தெடுக்கலாம்.

மகம் நட்சத்திரத்திற்கு அதிபதியாக கேது இருப்பதால், ஞானியர்களையும் மகான்களையும் வணங்குவது நலம். ஜீவ சமாதிகள் இருக்கும் பழமையான தலங்களை தரிசிக்கும்போது கல்வியில் முன்னேற்றம் காணலாம். அப்படிப்பட்ட தலமே நெரூர் ஆகும். இங்குள்ள சிவாலயத்துக்கு பின்புறத்தில்தான் சதாசிவ பிரம்மேந்திரர் எனும் மகாஞானி ஜீவ சமாதி அடைந்தார். கரூரிலிருந்து 10 கி.மீ. தொலைவில் உள்ளது நெரூர்.

பூரத்தில் பிறந்தவர்கள் இனிமையாகப் பேசுவார்கள். எல்லோரையும் வசீகரிக்கும் திறமை பெற்றிருப்பார்கள். நட்சத்திர அதிபதியாக சுக்கிரன் வருவதால், பெற்றோரின் ஆசைப்படி கல்வி கிடைக்கும். படிக்கிறார்களோ இல்லையோ, நல்ல கல்வி நிறுவனத்தில் சேர்வார்கள். கல்வியைக் கூட கலையாகத்தான் பார்ப்பார்கள். ‘படிப்பைத் தாண்டி சாதிக்க நிறைய இருக்கு’ என்பதை பள்ளியிறுதிக்குள்ளாகவே புரிந்து கொள்வார்கள். அதேசமயம் படிப்பிலும் குறை வைக்க மாட்டார்கள். பொதுவாகவே இவர்களுக்கு சுக்கிர தசை முதலிலேயே வந்து விடுவதால், கல்வியில் தடையோ பிரச்னைகளோ எதுவும் வராது.

பூரம் நட்சத்திரத்தின் அதிபதியாக சூரியனே வருகிறார். முதல் பாதத்தில் பிறந்தவர்கள் இரட்டை சூரிய சக்தியை தன்னிடத்தே கொண்டவர்கள். 19 வயது வரை சுக்கிர தசை நடக்கும். சிறிய வயதில் துடுக்குச் சுக்கிரனாக இவர்களிடத்தில் சுக்கிரன் செயல்படுவார். ஆசிரியர்களை கேலி செய்து மாட்டிக் கொள்வதும் உண்டு. ஒருவித பிரமிப்பை தன்னைச் சுற்றிலும் உருவாக்கியபடி இருப்பார்கள். நன்றாகப் படிக்கும் மாணவர்களோடுதான் நட்பு வைத்திருப்பார்கள். மரியாதைக்குரிய மதிப்பெண் எடுப்பார்கள். 19 வயதுக்குள் காதல் அரும்பி, உதிரும். இதனால் படிப்பில் தடை ஏற்படும். முக்கியமாக பிளஸ் ஒன், பிளஸ் 2 படிக்கும்போது எச்சரிக்கை வேண்டும். பெரும்பாலானவர்கள் பத்தாம் வகுப்பில் பள்ளியில் முதல் மூன்று இடங்களுக்குள் வந்துவிட்டு, பிளஸ் 2வில் பாஸ் ஆனாலே போதும் என்று இருப்பார்கள். 20 வயதிலிருந்து 25 வரை ராசிநாதனான சூரிய தசையே நடைபெறும். சிலர் ராணுவத்தில் சேர ஆசைப்படுவார்கள். கல்லூரியில் அரசியல், நிர்வாகம் சார்ந்த படிப்புகளை தேர்ந்தெடுக்கலாம். மருத்துவத் துறையில் கண் மற்றும் நரம்பு சம்பந்தமான துறை சரியாக வரும். எம்.பி.ஏ. படிப்பில் ஹெச்.ஆர். துறை ஏற்றது. பொறியியல் எனில் சிவில் நல்ல எதிர்காலத்தைக் கொடுக்கும்.

இரண்டாம் பாதத்தை அதன் அதிபதியான புதனும், சூரியனும், சுக்கிரனும் சேர்ந்தே ஆள்வர். 14 வயது வரை சுக்கிர தசை இருப்பதால், புதன் அந்த வயதிலேயே நுணுக்கமாக யோசிக்க வைப்பார். அறிவுபூர்வமான வழியில் செலுத்துவார். இன்டோர் கேம்ஸில் அதிக ஈடுபாடு காட்டுவார்கள். 15 வயதிலிருந்து 20 வரை சூரிய தசையில், சுக்கிர தசை கொடுத்த அலட்சியப்போக்கு கொஞ்சம் மாறும். கல்லூரிகளில் கௌரவம் பெறுவார்கள். ஆராய்ச்சி சார்ந்த கல்வியில் ஆர்வம் செலுத்துவார்கள். 21 வயதிலிருந்து 30 வரை சந்திர தசை நடைபெறும். ஜாதகத்தில் சந்திரன் குருவின் பார்வை பெற்றிருந்தாலோ, சேர்க்கை பெற்றிருந்தாலோ விபரீத ராஜயோகம் உண்டாகும். முன்னேற்றத்திற்கான எல்லா வழிகளும் திறக்கும். பொருளாதாரம், புள்ளியியல் போன்ற படிப்புகளைத் தேர்ந்தெடுக்கலாம். அதேபோல கட்டிடத் திட்ட வரைபடம், ஆர்க்கிடெக்ட், விஸ்காம் போன்ற படிப்புகள் இயல்பாகவே நன்றாக வரும். மருத்துவத்தில் வயிறு, நரம்பு, கண் போன்ற பிரிவுகளில் நிபுணத்துவம் பெறலாம்.

மூன்றாம் பாதத்தை துலாச் சுக்கிரன் ஆட்சி செய்கிறார். கிட்டத்தட்ட 8 வருடம் சுக்கிர தசை நடைபெறும்போது தந்தையார் மிகப்பெரிய பதவிகளில் அமர்வார். 9 வயதிலிருந்து 14 வரை நடைபெறும் சூரிய தசையில் அடிக்கடி தலைவலி வரும். ஓரளவிற்கே மதிப்பெண்கள் எடுப்பார்கள். 15 வயதிலிருந்து 24 வரை சந்திர தசை நடக்கும்போது கலைகளில் ஆர்வம் காட்டுவார்கள். இவர்களுக்கு பெரும்பாலும் நுணுக்கமான படிப்பில் ஆர்வம் இருக்காது. மருத்துவத்தில் சரும நோய், உடல் பொலிவுக்கான படிப்புகள் ஏற்றவை. ஃபேஷன் டெக்னாலஜியை மறக்க வேண்டாம். விஸ்காம், டி.எஃப்.டெக். போன்ற படிப்புகள் எதிர்காலத்தை பிரகாசமாக்கும். இசை சார்ந்த கல்வியும் பயனுள்ளதே!


நான்காம் பாத அதிபதியாக விருச்சிக செவ்வாய் வருவதால், முதல் நான்கு வருட சுக்கிர தசை சுகவீனங்களை தரும். 5 வயதிலிருந்து 10 வரையிலான சூரிய தசையில் புத்திக் கூர்மை அதிகரிக்கும். கலெக்டர் கையால் பரிசு வாங்குவதெல்லாம் இப்போதுதான். 11 வயதிலிருந்து 20 வரையிலும் சந்திர தசை நடைபெறும்போது சுமாராகத்தான் படிப்பார்கள். பள்ளித் தேர்வுகளில் நிறைய மதிப்பெண் எடுத்து விட்டு, அரசாங்கத் தேர்வுகளில் கோட்டை விடுவார்கள். சந்திரன் சொந்த ஜாதகத்தில் வலிமையாக இல்லாவிடில், இக்கட்டான தருணங்களில் மறதியைத் தருவார். பெற்றோர் பிள்ளைகளை உற்சாகப்படுத்த வேண்டியது அவசியம். 21 வயதிலிருந்து 27 வரை செவ்வாய் தசை நடைபெறும்போது கல்வியில் உச்சம் தொடுவார்கள். இவர்கள் சிவில், எலெக்ட்ரானிக்ஸ் எடுத்துப் படிக்கலாம். ஐ.ஏ.எஸ். தேர்வுக்கு நிச்சயம் முயற்சிக்கலாம். மருத்துவத்தில் ஆர்த்தோ, பல், பிளாஸ்டிக் சர்ஜரி போன்ற படிப்புகளில் சாதிப்பார்கள். நிர்வாகம் சார்ந்த இளங்கலை படிப்பு பெரிய பதவிக்கு கொண்டு போகும்.

பூரத்தில் பிறந்தவர்களுக்கு பாடத்தில் முதன்மை தருபவர், பரிமுகக் கடவுள் எனும் திருவந்திபுரம் ஹயக்ரீவர். ஸ்ரீமந்நாராயணன் அர்ச்சா ரூபியாய் எழுந்தருளி, ஆழ்வார்களால் மங்களசாசனம் செய்யப்பட்டுள்ள 108 வைஷ்ணவத் திருத்தலங்களில் இது குறிப்பிடத்தகுந்தது. வேதாந்த தேசிகன் எனும் ஞானி இத்தல ஹயக்ரீவரை பூஜித்ததாக வரலாறு கூறுகின்றது. தமிழகத்திலேயே ஹயக்ரீவருக்கு முதன்முதலில் கோயில் அமையப் பெற்றது இங்குதான். இங்கு சிறு மலை மேல் பரிமுகப் பெருமாள் லட்சுமி தேவியுடன் லட்சுமி ஹயக்ரீவராகத் திருக்காட்சி அளிக்கின்றார். கடலூரிலிருந்து 6 கி.மீ. தொலைவில் இத்தலம் அமைந்துள்ளது.
‘என்ன படிச்சாலும் சரிதான்... எப்படியாவது அரசாங்க வேலையில போய் உட்கார்ந்துடணும்’’ என்று சிம்ம ராசிக்காரர்கள் பள்ளி இறுதியிலேயே முடிவெடுப்பார்கள். அதற்கேற்றபடி எல்லாவித அரசுத் தேர்வுகளிலும் கலந்து கொள்வார்கள். உத்திரத்தின் முதல் பாதம் சிம்ம ராசிக்குள் வருகிறது. மீதி மூன்று பாதங்கள் கன்னி ராசிக்குள் வருகின்றன. சிம்ம ராசிக்குள் இருக்கும் முதல் பாதத்தைப் பற்றிப் பார்ப்போம். முதல் பாதத்தின் அதிபதியாக குரு வருகிறார். சிம்மத்திற்கு அதிபதி சூரியன். உத்திர நட்சத்திரத்தை ஆள்வதும் சூரியன்தான். இவ்வாறு சூரியனின் இரட்டிப்பு சக்தியோடு குரு சேருவதை சிவராஜ யோகம் என்பார்கள். இவர்கள் பல்துறை அறிஞராக பிரகாசிப்பார்கள். எதையுமே சொல்லிப் புரிய வைக்காது, அவர்களாகவே புரிந்து கொள்ளட்டும் என்று நினைப்பார்கள்.

ஐந்து வயது வரை சூரிய தசை நடைபெறுகிறது. 6 வயதிலிருந்து 15 வரை சந்திர தசை நடக்கும்போது, பள்ளி வாழ்க்கை கொஞ்சம் சவாலாகவே இருக்கும். சந்திரன் விரய ஸ்தானாதிபதியாகவும், பன்னிரெண்டுக்கு உரியவனாகவும் வருவதால் எதிர்மறைப் பலன்கள் நிறைய நடைபெறும். 12 வயது வரை, ‘‘பையன் படிக்கவே மாட்டேங்கறான். என்ன பண்ணப் போறானோ’’ என்று கவலைகள் சூழும். ஆனால் அதன்பிறகும், 16 வயதிலிருந்து 22 வரை நடைபெறும் செவ்வாய் தசையிலும் சிறப்பாக இருக்கும். பத்தாம் வகுப்பிலிருந்து மதிப்பெண் உயரும். கல்லூரியில் அரசியல், நிர்வாகம். எலெக்ட்ரானிக்ஸ் சார்ந்த படிப்புகளைத் தேர்ந்தெடுங்கள். மருத்துவத் துறையில் எலும்பு, கண், மூளை தொடர்பான துறைகள் சரியாக வரும். எம்.பி.ஏ. படிப்பில் ஹெச்.ஆர்., பைனான்ஸ் துறைகள் ஏற்றவை. பொறியியலில் சிவில் நல்ல எதிர்காலத்தைக் கொடுக்கும்.

உத்திரத்தின் இரண்டாம் பாதத்தை சூரியன், புதன், மகரச் சனி ஆட்சி செய்கின்றனர். அதேபோல மூன்றாம் பாதத்தை சூரியன், புதன், கும்பச் சனி அதிபதியாக அமைந்து ஆள்கின்றனர். எனவே, இரு பாதங்களுக்கும் ஒட்டுமொத்தமான பெரிய மாற்றங்கள் இருக்காது; ஒரே மாதிரி பலன்கள்தான் இருக்கும். 4 வயது வரை சூரிய தசை நடைபெறும். சூரியன் விரயாதிபதியாக இருந்தாலும், நட்சத்திரத்தின் அதிபதியாக வருவதால் தந்தைக்கு இடமாற்றத்தைக் கொடுப்பார். எல்.கே.ஜி., யு.கே.ஜி. ஒரு பள்ளியிலும், ஒன்றாம் வகுப்பிலிருந்து வேறு பள்ளியிலும் படிப்பார்கள். 5 முதல் 14 வயது வரை சந்திர தசை நடைபெறும். சந்திரன் லாபாதிபதியாக வருகிறது. எனவே, வளர்பிறை சந்திரனில் பிறந்தவர்களுக்கு முதல் தர ராஜயோகம் உண்டு. இவர்களின் 6, 8, 12 வயதுகளில் பெற்றோருக்கு பொருளாதார நெருக்கடி ஏற்பட்டு, பின்பு மறையும். எட்டாம் வகுப்பு படிக்கும்போது மட்டும் நண்பர்களின் சகவாசத்தில் கவனம் வேண்டும். மொழிப் பாடங்களை மிகுந்த ஆர்வத்தோடு படிப்பார்கள். கணக்கு கசக்கும்.


15லிருந்து 22 வயது வரை செவ்வாய் தசை நடைபெறும். படிப்பைவிட அதிகமாக விளையாட்டு, ராணுவம் என்று சேரத்தான் ஆசைப்படுவார்கள். பொருளாதாரம், புள்ளியியல் போன்ற படிப்புகள் பலன் தரும். அதேபோல கட்டிடத் திட்ட வரைபடம், ஆர்க்கிடெக்ட், விஸ்காம் போன்ற படிப்புகள் சிறந்த எதிர்காலம் தரும். கலைத்துறை எனில் ஓவியம் மிக நன்று. விஸ்காம், டி.எஃப்.டெக். படிப்புகள் எதிர்காலத்தைப் பிரகாசமாக்கும். ஐ.ஏ.எஸ். தேர்வின் மீது உத்திர நட்சத்திரக்காரர்கள் ஒரு கண் வைப்பது நல்லது. நான்காம் பாதத்தை சூரியன், புதன், குரு போன்றோர்கள் ஈடு இணையற்ற வகைகளில் ஆள்கிறார்கள். இவர்களுக்கு எல்லாவற்றிலும் ஒரு சாதுர்யம் இருக்கும். கல்வியும் ஞானமும் சேர்ந்து பிரகாசிக்க வைக்கும். 1 வயது வரை சூரிய தசை நடைபெறும். 2 வயதிலிருந்து 11 வயது வரை சந்திர தசை நடைபெறும். நான்காம் பாதத்தின் அதிபதி குருவோடு சந்திரன் சேர்ந்து, குரு சந்திர யோகமாக மாற்றம் பெறும். 3 அல்லது 4ம் வகுப்பு படிக்கும்போதே கவிதை, கட்டுரை என்று எழுதி பரிசுகளை அள்ளுவார்கள். ஏறக்குறைய 8ம் வகுப்பிலிருந்து கல்லூரி வரையிலான காலகட்டங்களில் செவ்வாய் தசை வருவதால், படிப்பில் எந்தத் தடையும் இருக்காது. விரும்பிய கல்வி நிறுவனத்தில் இடம் கிடைக்கும். குருவும் செவ்வாயும் நண்பர்களாக இருப்பதால், திடீர் திருப்பங்கள் நிகழும். நிர்வாகம் சார்ந்த படிப்பை கொஞ்சம் விரும்புவார்கள். குரு கூடவே இருப்பதால், தற்போதைய காலகட்டத்திற்கு எந்த படிப்பிற்கு மகத்துவம் உள்ளதோ அதைத் தேர்ந்தெடுத்து படிப்பார்கள். சிவில், எலக்ட்ரானிக்ஸ் நல்ல எதிர்காலம் தரும். மருத்துவத்தில் ஆர்த்தோ, பல், பிளாஸ்டிக் சர்ஜரி போன்ற படிப்புகள் ஏற்றவை. நிர்வாகம் சார்ந்த இளங்கலை படிப்பு பெரிய பதவி வரை கொண்டு போய் நிறுத்தும்.

உத்திர நட்சத்திரத்தின் அதிபதியாக சூரியனும், 2, 3 பாதங்களின் அதிபதியாக மகரச் சனியும், கும்பச் சனியும் வருகின்றன. 4ம் பாதத்தின் அதிபதியாக மீன குரு வருகிறது. பெரும்பாலும் சூரியனும், சனியும் இணைந்த அம்சமாகவே வரும். இந்த இரண்டினுடைய இணைவுதான் இவர்களின் வாழ்க்கையைத் தீர்மானிக்கிறது. எனவே, சூரியனும் சனியும் இணைந்த அம்சமான ஈசனை வழிபடுதலே இந்த நட்சத்திரத்திற்கு ஏற்றதாகும். சனி என்றாலே பிரமாண்டத்தைக் குறிக்கிறது. லிங்கத்திலேயே மகாலிங்கம் என்றழைக்கப்படும் தலமே திருவிடைமருதூர். கோயிலும் பிரமாண்டமானது; லிங்கத்தின் அம்சமும் பிரமாண்டமானது. மகாலிங்கேஸ்வரரை வணங்குங்கள். கல்வியில் ஏற்றம் பெறுங்கள். கும்பகோணம் - மயிலாடுதுறை பாதையில் 8 கி.மீ. தொலைவில் இத்தலம் அமைந்துள்ளது. 


கன்னி ராசியில் இருக்கும் மூன்று நட்சத்திரக்காரர்களில், எதையுமே எளிதாக எடுத்துக் கொள்பவர்கள் ஹஸ்தம் நட்சத்திரத்தில் பிறந்தவர்கள்தான். இவர்களுக்கு சிறிய வயதிலிருந்தே நகைச்சுவை உணர்வு மிகுந்திருக்கும். ஹஸ்தம் நட்சத்திரத்தின் முதல் பாதத்தை செவ்வாய் ஆள்கிறார். ராசிக்கு அதிபதியாக புதன் வருகிறார். ஆனால், இவர்கள் இருவரும் பகைவர்கள். அதனால் ஏதேனும் ஒரு சப்ஜெக்ட்டில் நூற்றுக்கு நூறு எடுத்துவிட்டு, இன்னொரு சப்ஜெக்ட்டில் பார்டரில் பாஸ் செய்வார்கள். 10 வயதிலிருந்து 16 வரை செவ்வாய் தசை வருவதால், கிட்டத்தட்ட ஐந்தாம் வகுப்பு படிக்கும்போது திடீரென்று பள்ளி மாற வேண்டி வரும். செவ்வாய் தசை தொடங்குவதால் சிறிய வயதிலேயே ராணுவம், காவல்துறையில் சேர ஆசை இருக்கும். ஆசிரியர்களிடம் நற்பெயர் எடுப்பார்கள். பள்ளி வாழ்க்கையில் பெரிய மாற்றங்கள் இருக்காது. ஆனால், 17 வயதிலிருந்து 35 வரை ராகு தசை நடைபெறப் போகிறது. 17 வயது என்பது பள்ளியிலிருந்து கல்லூரிக்கு நகரும் தருணம். பிளஸ் 2வில் படித்ததற்கு சம்பந்தமில்லாது வேறொரு சப்ஜெக்ட்டை எடுத்துப் படிப்பார்கள். எப்போதுமே ஷார்ட் டைம் கோர்ஸில் படித்து ஜெயிப்பார்கள். ராகு தசையில் பல மொழிகளில் வல்லமை வரும். கெமிக்கல், எலெக்ட்ரிகல், விவசாயம், சிவில், அஸ்ட்ரானமி என்று படிப்பது பலன் தரும். மருத்துவத்தில் மூச்சுக்குழல், நுரையீரல், எலும்பு, பல் சம்பந்தமான துறை கிடைத்தால் உடனே சேரலாம்.


இரண்டாம் பாதத்திற்கு அதிபதியாக சுக்கிரன் வழிநடத்துகிறார். ஏற்கனவே ராசியாதிபதியான புதனும், நட்சத்திரத்திற்கு தலைவரான சந்திரனும் கலவையாக இவர்கள் வாழ்வை செலுத்துவார்கள். ஏறக்குறைய 6 வயது வரை சந்திர தசை நடக்கும். 7 வயதிலிருந்து 13 வரை நடக்கும் செவ்வாய் தசையில் அதிர்ஷ்டக் காற்று பெற்றோர் மீது வீசும். சுக்கிரன் பாதத்திற்கு அதிபதியாக இருப்பதாலும், செவ்வாயும் பூமிக்குரியவராக இருப்பதாலும், நல்ல பள்ளியில் இடம் கிடைத்து நன்றாகப் படிப்பார்கள். 14 வயதிலிருந்து 31 வரை ராகு தசை நடைபெறும்போது, ‘‘நல்லா படிப்பானே... இப்போ ஏன் இப்படி ஆகிட்டான்’’ என்று விசாரிக்கும் அளவுக்கு தடுமாறுவார்கள். சந்திரனுடைய நட்சத்திரத்தில் ராகு தசை வருகிறது. இது ஒரு கிரகணச் சேர்க்கை. புத்தியில் சூட்சுமம் இருந்தாலும் அந்த நேரத்திற்குண்டான விஷயங்களில் ஜெயிக்க முடியாது போகும். பொதுவாகவே ராகு தசையில் பிள்ளைகள் கொஞ்சம் பேலன்ஸ் செய்துதான் செல்ல வேண்டும். எலெக்ட்ரானிக்ஸ், விஸ்காம், ஃபேஷன் டெக்னாலஜி, பிரின்டிங் டெக்னாலஜி போன்றவை ஏற்றது. மருத்துவத் துறையில் நியூராலஜிஸ்ட், தண்டுவடம் சார்ந்த துறைகளில் வெகு எளிதாக நிபுணராகும் வாய்ப்பு உண்டு. நிறைய மொழியறிவு இருப்பதால் சமஸ்கிருதம், ஜெர்மன், பிரெஞ்சு போன்ற மொழிகளைப் படித்தால் நல்ல அங்கீகாரமுள்ள வேலை கிடைக்கும். 

மூன்றாம் பாதத்தை புதன் ஆள்வதால், புத்தியில் தீட்சண்யம் அதிகமாக இருக்கும். சிறு வயதிலிருந்தே மாறுபட்ட சிந்தனையால் அனைவரையும் வியப்பில் ஆழ்த்துவார்கள். கிட்டத்தட்ட 4 வயது வரைதான் சந்திர தசை நடக்கும். 5 வயதிலிருந்து 11 வரை செவ்வாய் தசை இருப்பதால் சுமாராகப் படிப்பார்கள். பெற்றோருக்கு கொஞ்சம் கவலை கொடுப்பார்கள். 12 வயதிலிருந்து 29 வரை ராகு தசை நடக்கும்போது எதற்கெடுத்தாலும் தயங்குவார்கள். ஆனால், இரட்டை புதனின் சக்தியோடு, ராகு தசை நடக்கும்போது அபரிமிதமான படைப்பாற்றல் வெளிப்படும். பள்ளியிலிருந்து கல்லூரிக்கு செல்லும்போது ஆராய்ச்சி படிப்புகளைத் தேர்ந்தெடுப்பது நல்லது. இந்த பாதத்திற்கு அதிபதியாக புதன் வருவதால், புள்ளியியல், சி.ஏ., சட்டம், எம்.பி.ஏ. கம்பெனி நிர்வாகம் சார்ந்த படிப்புகள் எல்லாமுமே ஏற்றவை. மருத்துவத் துறையில் இ.என்.டி, நரம்பு, வயிறு சம்பந்தப்பட்ட படிப்புகளில் தனித்துவம் பெற முடியும். 

நான்காம் பாதத்தை சந்திரன் ஆள்கிறார். நட்சத்திர அதிபதியாகவும் சந்திரன் வருவதால், சந்திரனின் இரட்டிப்புத் திறன் இவர்களிடம் செயல்படும். பிறந்த சில மாதங்கள் சந்திர தசை இருக்கும். அதன்பிறகு 1 வயதிலிருந்து 8 வரை செவ்வாய் தசை நடக்கும். மிகச் சிறிய வயதிலிருந்தே கலையுணர்வும், நுண்ணறிவும் இழையோடும். 9 வயதிலிருந்து 24 வயது வரை ராகு தசை நடக்கும். இந்த நேரத்தில், சிறிய விஷயத்திற்கெல்லாம் பெரிதாகக் குழம்புவார்கள். திடீரென்று தொண்ணூறு மார்க் எடுப்பார். அடுத்ததில் ஐம்பதுதான் வரும். தியரியைவிட பிராக்டிகலில் நல்ல மதிப்பெண் எடுப்பார்கள். கிட்டத்தட்ட ஹஸ்த நட்சத்திரக்காரர்கள் அனைவருமே இந்த ராகு தசையில் கொஞ்சம் சிக்குவார்கள். அப்போதெல்லாம் புற்றுள்ள அம்மன் கோயில் அல்லது அங்காளபரமேஸ்வரி ஆலயத்தில் வழிபட்டால் போதுமானது. மாஸ் கம்யூனிகேஷன், மெரைன், ஆங்கில இலக்கியம், சட்டம் என்று திட்டமிட்டுப் படித்தால் போதும். மனநல மருத்துவமும் பிரகாசமான எதிர்காலம் தரும். ஆர்க்கிடெக்ட், எலக்ட்ரானிக்ஸ் அண்ட் கம்யூனிகேஷன், புவியியல், மண்ணியல் சார்ந்த படிப்புகள் நல்ல அங்கீகாரம் கொடுக்கும்.

ஹஸ்தம் நட்சத்திரத்தில் கன்னி ராசியில் பிறந்தவர்களின் ராசியாதிபதியான புதனுக்கு அதிபதியே பெருமாள்தான். நான்கு பாதங்களிலும் கிட்டத்தட்ட முழு ஆதிக்கத்தோடு புதன்தான் ஆட்சி செய்கிறார். எனவே இவர்கள் கல்வியில் சிறப்பு பெற வழிபட வேண்டிய தலம், நாகை சௌந்தரராஜப் பெருமாள் ஆலயமே ஆகும். ஆழ்வார்களால் ஆராதிக்கப்பட்ட மூர்த்தி இவர். தாயாரையும் பெருமாளையும் வழிபட்டு வர, அறிவும் ஆற்றலும் கூடும். நாகப்பட்டினம் நகரின் மையத்திலேயே இந்த ஆலயம் அமைந்துள்ளது.
சித்திரை நட்சத்திரத்தின் முதல் இரண்டு பாதங்கள் கன்னி ராசியிலும், 3 மற்றும் 4ம் பாதங்கள் துலாம் ராசியிலும் இடம்பெறுகின்றன. கன்னி ராசியிலேயே சித்திரை 1, 2 பாதங்களில் பிறந்தவர்கள் மாணவப் பருவத்திலிருந்தே கொஞ்சம் சாமர்த்தியமாக இருக்க வேண்டும். அறிவு ஜீவியாக இருந்தாலும், எளிதில் அங்கீகாரம் கிடைக்காமல் திணறுவார்கள்.

சித்திரையின் முதல் பாதத்தை சூரியன் ஆள்கிறார். எதிர்காலம் பற்றிய கணிப்புகளும், கவலைகளும் ஏறக்குறைய 14 வயதிலிருந்தே தொடங்கி விடும். அதற்கு முன்பு பொது அறிவுத்திறனை வளர்த்துக் கொள்வார்கள். ஆறு வயது வரையிலான செவ்வாய் தசையின்போது சாதாரணமாகத்தான் இருக்கும். 7 வயதிலிருந்து 24 வரை ராகு தசை நடக்கும்போது பெற்றோருக்கு பண நெருக்கடி ஏற்படும். அதனால் தந்தை அங்கும் இங்கும் என்று பல்வேறு தொழில்கள் மாறும்போதெல்லாம், கல்வியும் அலைக்கழிப்பாகும். பிள்ளைகளின் 13 வயதில் தாய் - தந்தை சண்டை போட்டுக் கொண்டிருக்கக் கூடாது. அப்புறம் பிள்ளைகள் வீட்டில் ஒட்டாமல் நட்பு வட்டத்தை பெருக்கிக் கொள்வார்கள். இந்த வயதுகளில் ஏழரைச் சனியோ, அஷ்டமச் சனியோ தொடங்கினால் ரெசிடென்ஷியல் ஸ்கூலில் சேர்ப்பது நல்லது. 24 வயதுக்குள் நல்லது, கெட்டதுகளை புரிந்துகொள்ளும் பக்குவம் பெறுவார்கள். பகை வீட்டில் ராகு இருந்தால், ராகுவை குரு பார்த்தால், கெடுபலன்கள் குறையும். 25 முதல் 40 வயது வரை குரு தசை. நட்சத்திர நாயகனான செவ்வாய்க்கு குரு நட்பாக இருப்பதால் முன்னேறுவார்கள். பள்ளியைவிட கல்லூரி வாழ்வு சிறப்பாக இருக்கும். கல்லூரியில் எந்தப் பாடத்தை எடுக்கிறார்களோ, அதில் டாக்டரேட் செய்து முடிப்பார்கள். பொலிட்டிகல் சயின்ஸ், எம்.பி.ஏ. படிப்பில் ஹெச்.ஆர்., அஸ்ட்ரானமி போன்றவை நல்ல எதிர்காலம் தரும். மருத்துவத்தில் நரம்பு, மயக்க நிபுணர் படிப்புகளில் சிறப்பான எதிர்காலம் உண்டு.

இரண்டாம் பாதத்தில் பிறந்தவர்களை புதன் ஆட்சி செய்கிறார். இரட்டை புதனின் சக்தி சேர்வதால் அதிபுத்திசாலியாக இருப்பார்கள். ‘‘இவ்ளோ சின்ன வயசுல இப்படியொரு அறிவா’’ என்று வியப்பார்கள். நாலு வயது வரையிலான செவ்வாய் தசையின்போது இ.என்.டி. டாக்டரிடம் போக வேண்டியிருக்கும். வீசிங், காதில் சீழ் வடிதல் இருக்கும். 5 வயதிலிருந்து 22 வரை ராகு தசை நடைபெறுவதால் வகுப்பறையில் தனித்துவம் மிக்க மாணவராக சுடர்விடும் அறிவோடு விளங்குவார்கள். ஆசிரியரின் அறிவுரையும், ஊக்கமும் இருந்தால் அந்த சப்ஜெக்ட்டில் நல்ல மதிப்பெண் பெறுவார்கள். எட்டாம் வகுப்பில் படிப்பு கொஞ்சம் தடைபடும். ஆனால், 12ம் வகுப்பில் நல்ல மதிப்பெண்கள் எடுப்பார்கள். அக்கவுன்டன்சி, விஸ்காம், பேங்கிங் சம்பந்தமான படிப்புகள் நல்லது. மருத்துவத்தில் நரம்பு, வயிறு, கண் சம்பந்தமாக படித்தால் பெரிய அளவில் புகழ் பெறலாம். எலக்ட்ரானிக்ஸை விட எலக்ட்ரிகல் நல்லது. 23 வயதிலிருந்து 38 வரை குரு தசை நடைபெறும்போது வாழ்க்கை இன்னும் சிறப்பாகும்.

துலாம் ராசியில், சித்திரை நட்சத்திரத்தின் மூன்றாம் பாதத்தில் பிறந்தவர்களை சுக்கிரன் ஆள்கிறார். இரண்டரை வயது வரை செவ்வாய் தசை நடைபெறும். வயிற்றோட்டமும், செவ்வாயின் உஷ்ணத்தால் அடிக்கடி ஜுரமும் வந்து நீங்கும். 3 வயது முதல் 20 வரை ராகு தசை இருப்பதால் உயர்ந்த கல்வி நிறுவனத்தில் தந்தை சேர்த்து விடுவார். 8 வயதிலிருந்து 9 வரை தலையில் அடிபடாமல் பார்த்துக் கொள்ள வேண்டும். ஒன்பதாம் வகுப்பு வரை சுமாராக படித்தவர்கள், பத்தாம் வகுப்பில் வெளுத்துக் கட்டுவார்கள். இதையடுத்து குரு தசை ஏறக்குறைய 21 வயதிலிருந்து 36 வரை நடைபெறும். குரு இவர்களுக்கு கெடுதல் செய்யக் கூடியவராக இருப்பதால், பளிச்சென்று வெற்றிகளும், முன்னேற்றமும் இருக்காது. எலக்ட்ரானிக்ஸ் அண்ட் கம்யூனிகேஷன், விஸ்காம், ஆர்க்கிடெக்ட், ஃபேஷன் டெக்னாலஜி, சி.ஏ., எக்னாமிக்ஸ் போன்ற படிப்புகள் எளிதாக வெற்றி பெறச் செய்யும். மருத்துவத்தில் சர்க்கரை நோய் நிபுணராக வர வாய்ப்புள்ளது.


நான்காம் பாதத்திற்கான பலன்களை பார்ப்போம். இவர்களின் நட்சத்திர அதிபதி செவ்வாய், ராசியாதிபதி சுக்கிரன், 4ம் பாதத்தின் அதிபதியும் செவ்வாய்தான். செவ்வாய் இரண்டு மடங்கு சக்தியோடு இருப்பார். ஏறக்குறைய ஒரு வயதுவரை செவ்வாய் தசை இருக்கும். 2 வயதிலிருந்து 19 வரை ராகு தசை இருக்கும். 4 வயதில் பாலாரிஷ்டம் என்று சொல்வது போல உடம்பு படுத்தும். பொதுவாக ராகு தசை கொஞ்சம் போராட்டமாகத்தான் இருக்கும். இதுபோன்ற நேரங்களில் அருகிலுள்ள அம்மன் கோயிலுக்குச் செல்வது நல்லது. தேர்வின்போது உடம்பு சரியில்லாமல் போவது, படித்த எதுவும் தேர்வில் வராது போவது என்று திணறுவார்கள். பள்ளிக்கு அருகிலேயே வீடு இருந்தால் இவர்களுக்கு நல்லது. 20 வயதிலிருந்து 35 வரை குரு தசை நடைபெறும். மூன்றாம் பாதத்து அன்பர்களை கொஞ்சம் ஏமாற்றிய குரு, இங்கு பலன்களை வாரி வழங்குவார். கல்லூரியில் கலக்குவார்கள். பொருளாதாரம், அக்கவுன்டன்சி போன்ற பட்டங்கள் நல்லது. மைக்ரோபயாலஜி, கெமிக்கல், ஆட்டோமொபைல், எலக்ட்ரிகல், கேட்டரிங் டெக்னாலஜி போன்றவையும் சிறந்த எதிர்காலம் தரும்.

சித்திரை நட்சத்திரத்தில் பிறந்தவர்கள் கல்வியில் சிறக்க, காஞ்சிபுரம் அஷ்டபுஜப் பெருமாளை வணங்குங்கள். 108 திவ்ய தேசங்களில் ஒன்றான இத்தலத்தில், ஆஜானுபாகுவாக நின்ற கோலத்தில் பெருமாள் சேவை சாதிக்கிறார். எட்டு கைகள். வலப்புற நான்கு கரங்களும் சக்கரம், வாள், மலர், அம்பு என ஏந்தியிருக்க, இடப்புற நான்கு கரங்களும் சங்கு, வில், கேடயம், தண்டாயுதம் என பற்றியிருக்கின்றன. அஷ்புஜப் பெருமாளை வணங்க புத்தியில் பிரகாசம் கூடும்.

துலாம் ராசியிலேயே அதிக ஒளிமிக்க இளமையான நட்சத்திரம் சுவாதி. இளம் வயதிலிருந்தே எதையும் சீக்கிரம் புரிந்து கொள்பவராகவும், கூர்மையாக ஆராய்ந்து கேள்விகளால் துளைத்தெடுப்பவராகவும் இருப்பார்கள்.


சுவாதி முதல் பாதத்தில் பிறந்தவர்களை, துலாம் ராசியின் அதிபதியான சுக்கிரனும், நட்சத்திர ஆட்சியாளர் ராகுவும், முதல் பாதத்தின் அதிபதியான குருவும் சரிசமமாக வழிநடத்துவார்கள். ஏறக்குறைய 15 வயது வரை ராகு தசை நடக்கும். சிறுவயதிலிருந்தே இவர்களின் குறுக்குக் கேள்விகளுக்கு பதில் சொல்லி மீள முடியாது. மேஜிக், மாயாஜாலம் என்று ஆர்வம் காட்டுவார்கள். வெவ்வேறு யோசனைகள் குறுக்கிடுவதால், மதிப்பெண்கள் சற்று ஏற்றஇறக்கமாகத்தான் இருக்கும். 16 வயதிலிருந்து 31 வரை குரு தசை வரும்போது எல்லா விஷயங்களிலும் தீவிரமாக இருப்பார்கள். ராகு தசையில் நடந்த சிறுசிறு தவறுகள் இங்கு சரியாகும். மார்க் குறைந்து அசிங்கப்பட்டதெல்லாம் மாறும். குரு ஆறாம் வீட்டுக்கு அதிபதியாக இருப்பதால், கெட்ட நண்பர்களின் சகவாசம் வரும். எச்சரிக்கையாக இருக்க வேண்டும். கல்லூரிப் பருவத்தில் சரியாகப் படித்து மேலே வருவார்கள். ராகுவின் ஆதிக்கம் அதிகமாக உள்ளதால், ஆராய்ச்சிக் கல்வியை விரும்புவார்கள். கேம்பஸ் இன்டர்வியூவில் செலக்ட் ஆனாலும், இவர்களில் சிலர் வேலை வேண்டாம் என்று படிப்பைத் தொடர்வார்கள். வழக்கறிஞர், ஆசிரியர், ஆடிட்டர் என்று போனால் சிறப்பாக வருவார்கள். அனிமேஷன், ஆர்க்கிடெக்ட் போன்றவையும் ஏற்றம் தரும்.

இரண்டாம் பாதத்தை மகரச் சனி ஆட்சி செய்கிறார். ஏறக்குறைய 12 வயது வரை ராகு தசை நடைபெறும். 4 வயது வரை தோல் பாதிப்புகள் அவஸ்தைப்படுத்தும். பெரும்பாலும் விளையாட்டில்தான் ஆர்வம் காட்டுவார்கள். மகரச்சனி என்பதால் எதிலும் பரபரப்பு இருக்கும். எது செய்தாலும் நான்கு பேருக்கு உபயோகப்படும்படி செய்வார்கள். 13 வயதிலிருந்து 28 வரை குரு தசை நடைபெறும். பத்தாம் வகுப்பு மற்றும் பன்னிரெண்டாம் வகுப்புகளில் கஷ்டப்பட்டுத்தான் படிக்க வேண்டும். பள்ளியிறுதி படிக்கும்போதே ஸ்பேஸ்கிராப்ட், பைலட் ஆவது பற்றிய விஷயங்களை காதில் போட்டு வையுங்கள். கனிம வளங்கள், மண்ணியல், புவியியல் சம்பந்தமான படிப்புகள் சிறப்பு தரும். மருத்துவத்தில் எலும்பு, சரும நோய் துறைகளில் மிகச் சிறந்த நிபுணராக விளங்குவார்கள்.

மூன்றாம் பாத அன்பர்களின் அதிபதியாக கும்பச் சனி வருகிறார். எனவே சமயோசித புத்தி அதிகமாக இருக்கும். ஏறக்குறைய 7 வயது வரை ராகு தசை நடக்கும். ஓவியம், கீ போர்ட், இசை என்றுதான் பள்ளி வாழ்க்கையின்போது இறங்குவார்கள். படிப்பில் அவ்வளவு ஆவல் இருக்காது. 8 வயதிலிருந்து 23 வரை குரு தசை நடக்கும். ராசிநாதனுக்கு குரு பகைவராக இருந்தாலும், நல்லதுதான் செய்வார். ஏனெனில், கும்பச் சனிக்கு தனம், லாபாதிபதியாக குரு வருகிறார். இதனால் கல்லூரி வரை ஸ்காலர்ஷிப்பிலேயே படிப்பார்கள். பதக்கமும், பாராட்டும் பெறுவார்கள். சிறிய வயதிலேயே சட்டென்று பெரிய வேலை கிடைக்கும். ரயில்வே தேர்வு எழுதி செலக்ட் ஆவார்கள். 24 வயதிலிருந்து 42 வரை சனி தசை, யோக தசையாக மாறும். இந்தப் பாதத்தில் பிறந்த பலர் தொழிற்சாலை வைக்குமளவுக்கு பெரிய ஆளாவார்கள். இவர்களின் நட்பு வட்டத்தை மென்மையாக கண்காணித்தல் நல்லது. கால்நடை மருத்துவம், விலங்கியல், தாவரவியல் போன்ற துறைகள் சிறப்பு தரும். மருத்துவத்தில் எலும்பு, மயக்க மருந்து நிபுணர் போன்றவை எனில் நல்லது. சி.ஏ. தேர்வில் எளிதாக வெற்றி பெறுவார்கள்.

ஒன்றாம் பாதத்திற்கும், 4ம் பாதத்திற்கும் அதிபதியாக குருவே வருகிறார். ஆனால் 4ம் பாதத்திற்கு அதிபதியாக மீன குரு வருகிறார். சுக்கிரன், ராகு, மீன குரு மூவரும் இணையும்போது வேகமும், விவேகமும் இருக்கும். 4 வயது வரை ராகு தசை நடக்கும். வயிறு சம்பந்தமான பிரச்னைகள் இருக்கும். 5 வயதிலிருந்து 19 வரை குரு தசை வரும்போது கற்பூர புத்தியாக இருப்பார்கள். கவிதை, கட்டுரை என்று வகுப்பில் எல்லாவற்றுக்கும் கை தூக்குவார்கள். 20 வயதிலிருந்து 38 வரை சனி தசை நடக்கும்போது முதல் பாதி சறுக்கும்; அதாவது 30 வயது வரை தடுமாறுவார்கள். ‘‘கஷ்டப்பட்டு படிச்சோம். ஆனா, திருப்தியான வேலை கிடைக்கலையே’’ என மனம் வெதும்புவார்கள். மனதுக்குப் பிடித்த வேலையைத் தேடி அலைந்துவிட்டு கிடைத்த வேலையில் அமர்வார்கள். பத்தாம் வகுப்பு தாண்டும்போதே ஐ.ஏ.எஸ். தேர்வு பற்றி காதில் போட்டு வையுங்கள். நிர்வாகம் சார்ந்த படிப்புகள் சிறப்பு தரும். எஞ்சினியரிங்கில் ஐ.டி., கெமிக்கல் போன்றவை ஏற்றதாகும். மருத்துவத்தில் இரப்பை, சிறுநீரகம் தொடர்பான நிபுணராக விளங்கும் வாய்ப்பு உண்டு. குருவின் பூரண ஆதிக்கம் இருப்பதால் தத்துவம், உளவியல் படிக்கும்போது சமூகத்தில் நல்ல அடையாளம் கிடைக்கும். 

சுவாதியில் பிறந்தவர்கள் கும்பகோணத்திலிருந்து 15 கி.மீ. தொலைவிலுள்ள அம்மன்குடி அஷ்டபுஜ துர்க்கையை தரிசிக்க வேண்டும். மிகப்பழமையான ஆலயத்தில் தனி சந்நதியில் துர்க்கை அருள்பாலிக்கிறாள். சிம்ம வாகனத்தில் எண்கரங்களோடு அமர்ந்திருக்கும் இந்த தேவியின் பாதம் பணிந்தால் கல்வியில் சிறக்கலாம்.
தனுசு ராசியின் பூராட நட்சத்திரத்தில் பிறந்தவர்கள் எப்போதுமே ஜாலியாக இருக்க விரும்புவார்கள். அதேசமயம் ‘பூராடம் போராடும்’ என்ற கூற்றுக்கு ஏற்ப, எப்பாடுபட்டேனும் நினைத்ததைப் படித்து விடுவார்கள். ‘‘எல்லாரும் படிச்சுத்தான் பெரிய ஆளா ஆகுறாங்களா’’ என்பதுதான் இவர்கள் எல்லோரிடமும் கேட்கும் அடிப்படையான கேள்வி. எது பிடிக்கறதோ, அதில் தயக்கமில்லாமல் இறங்குவார்கள். 

இவர்களின் ராசியாதிபதி குரு. பூராட நட்சத்திரத்தின் அதிபதி சுக்கிரன். முதல் பாதத்தின் அதிபதியாக சூரியன் வருகிறார். பூராடத்திற்கு சுக்கிர தசையில் வாழ்க்கை துவங்கும். பிறந்ததிலிருந்து 18 வருடங்கள் சுக்கிர தசை நடக்கும். இதை துடுக்குச் சுக்கிரன் என்று சொல்லலாம். பாதத்தின் அதிபதியான சூரியன் யோகாதிபதியாகவும் பாக்யாதிபதியாகவும் வருவதால், இவர்கள் பிறக்கும்போதே தந்தையின் வெற்றிக் கணக்கு துவங்கிவிடும். பொதுவாகவே சுக்கிரனின் நட்சத்திரத்தில் பிறப்பவர்கள் கல்வியை விட கலைக்குத்தான் முக்கியத்துவம் தருவார்கள். ஆனால் சமூகத்தில் எந்த படிப்பிற்கு முக்கியத்துவம் இருக்கிறதோ, அதைத்தான் படிப்பார்கள். பத்தாம் வகுப்பிற்குப் பிறகு கவனச் சிதறல் அதிகம் இருக்கும். 19 வயதிலிருந்து 24 வரை பாதத்தின் அதிபதியான சூரியனின் தசையே நடைபெறும். சுக்கிர தசையை விடவும் இது நன்றாக இருக்கும். கல்லூரி வாழ்க்கை மற்றும் வேலையைப் பற்றி கவலைப்படவே தேவையில்லை. எதில் ஈடுபட்டாலும் வெற்றிதான். அரசியல், நிர்வாகம் சார்ந்த படிப்புகள் நல்லது. மருத்துவத் துறையில் கண், மூளை, முகம் சம்பந்தமான துறைகள் சரியாக வரும். எம்.பி.ஏ. படிப்பில் ஹெச்.ஆர்., மற்றும் சோஷியாலஜி துறை ஏற்றது. எஞ்சினியரிங்கில் சிவில் நல்ல எதிர்காலத்தைக் கொடுக்கும்.

இரண்டாம் பாதத்தை அதன் அதிபதியான கன்னி புதனும், குருவும், சுக்கிரனும் சேர்ந்தே ஆள்வர். எல்லாம் தெரிந்து வைத்திருந்தும் மார்க் மட்டும் திருப்தியாக வராது. ‘‘இவங்க கேட்கற சின்ன கேள்விகளுக்கெல்லாம் பதில் சொல்ல முடியாது’’ என்பார்கள் ஆசிரியர்கள். 14 வயது வரை சுக்கிர தசை இருப்பதால், புதன் அந்த வயதிலேயே நுணுக்கமாக யோசிக்க வைப்பார். தூக்கத்தில் அதிகமாகப் பேசுவது, நடப்பது, சிறுநீர்த் தொந்தரவுகள் ஐந்து வரை இருக்கும். 15 வயதிலிருந்து 20 வரை நடைபெறும் சூரிய தசையில் சமூகத்தோடு எதிலும் ஒட்டாமல் இருப்பார்கள். ஒன்பதாம் வகுப்பு படிக்கும்போதே பள்ளியை மாற்றும் சூழல் வந்துபோகும். கொஞ்சம் குழப்பமான காலகட்டமாக அது அமையும். சொந்த ஜாதகத்தில் புதன் அதீத பலத்தோடு இருந்தால் கணக்கில் புலியாக வருவார்கள். 21 வயதிலிருந்து 30 வரை சந்திர தசை நடைபெறும் காலகட்டத்தில்தான் பணம் குறித்தும், வாழ்க்கையை குறித்தும் யோசிக்கவே தொடங்குவார்கள். புத்திசாலித்தனத்தை ஆக்கபூர்வமாக வெளிப்படுத்துவார்கள். சைக்காலஜி, தத்துவம், பொருளாதாரம் மற்றும் புள்ளியியல் படிப்புகள் ஏற்றம் தரும். அதேபோல கட்டிடத் திட்ட வரைபடம், ஆர்க்கிடெக்ட், விஸ்காம் போன்ற படிப்புகள் எதிர்காலத்தை வளப்படுத்தும். இவர்களில் நிறையப் பேர் சி.ஏ., ஐ.சி.டபுள்யூ.ஏ. என்று படிப்பார்கள்.

மூன்றாம் பாதத்தை துலாச் சுக்கிரன் ஆட்சி செய்கிறார். கிட்டத்தட்ட 8 வருடம் சுக்கிர தசை நடைபெறும்போது சுகமாக வலம் வருவார்கள். 9 வயதிலிருந்து 14 வரை நடைபெறும் சூரிய தசையில் தலைவலி வந்து நீங்கும். மூன்றாம் பாதத்தில் பிறந்த இவர்கள் சுக்கிரனின் இரட்டைச் சக்தியோடு இருப்பதால் குடும்பத்தில் பணவரவு அதிகமாக இருக்கும். ஏதேனும் ஒரு கலையை பயின்று விடுவார்கள். பின்னாளில் கலைத்துறையில் சாதிக்கும் வாய்ப்புகள் அதிகமுண்டு. 15 வயதிலிருந்து 24 வரை சந்திர தசை நடக்கும்போது, எப்படியேனும் கலைத்துறையில் அங்கீகாரம் பெற வேண்டுமென்று அலைவீர்கள். 25 வயதிலிருந்து 31 வரை செவ்வாய் தசை நடைபெறும்போது கூடுதல் அதிகாரம் வந்து சேரும். ஃபேஷன் டெக்னாலஜியை மறக்க வேண்டாம். விஸ்காம், டி.எஃப்.டெக். போன்ற படிப்புகள் எதிர்காலத்தை பிரகாசமாக்கும். இசைப்பள்ளியில் படித்து அங்கேயே ஆசிரியராகும் வாய்ப்பும் உண்டு. இந்து அறநிலையத்துறை சார்ந்த அரசு வேலையும் கிடைக்கும்.

நான்காம் பாத அதிபதியாக விருச்சிக செவ்வாய் வருவதால், முதல் நான்கு வருட சுக்கிர தசை சுகவீனங்களைத் தரும். ஆனால் 5 வயதிலிருந்து 10 வரையிலான சூரிய தசையில், பிறர் வியக்குமளவுக்கு புத்திக் கூர்மை அதிகரிக்கும். குருவும் செவ்வாயும் நண்பர்கள் என்பதால் எல்லாமே திட்டமிட்டபடி நடக்கும். 11 வயதிலிருந்து 20 வரையிலும் சந்திர தசை நடைபெறும்போது கொஞ்சம் சறுக்கும். ஆனால், பெரிய அளவில் பாதிப்புகள் இருக்காது. மேற்படிப்புக்கு போராடித்தான் சீட் வாங்க வேண்டியிருக்கும். சந்திரன் வலிமையாக இல்லாவிடில், இக்கட்டான தருணங்களில் மறதியைத் தருவார். சிறிய துரதிர்ஷ்டம் துரத்துவதாக எண்ணச் செய்வார். 21 வயதிலிருந்து 27 வரை செவ்வாய் தசை நடைபெறும்போது வாழ்க்கை அப்படியே மாறும். விட்டதையெல்லாம் பிடித்து விடுவார்கள். நிர்வாகம் சார்ந்த படிப்பை எடுத்தால் நிச்சயம் வெற்றிதான். எஞ்சினியரிங்கில் சிவில், எலெக்ட்ரானிக்ஸ் எடுத்துப் படிக்கலாம். மருத்துவத்தில் ஆர்த்தோ, பல், பிளாஸ்டிக் சர்ஜரி படிப்புகள் நல்ல எதிர்காலம் தரும். நிர்வாகம் சார்ந்த இளங்கலை படிப்பு பெரிய பதவி வரை கொண்டு போய் நிறுத்தும்.

பூராடத்தில் பிறந்தவர்களுக்கு வாக்காதிபதி எனும் கல்விக்கு அதிபதியாக மகரச் சனி வருகிறது. எனவே பள்ளி கொண்ட பெருமாளை வழிபட்டாலே போதும்; கல்வியில் சிறக்கலாம். ஆதிதிருவரங்கம் தலத்தில், நின்று பார்த்தாலே ஒரே சமயத்தில் பார்க்க முடியாத அளவுக்கு நீளமான கோலத்தில் காட்சி தருகிறான் அரங்கன். இத்தலம், திருவண்ணாமலையிலிருந்து மணலூர்பேட்டை வழியாக 32 கி.மீ தூரத்தில் உள்ளது. விழுப்புரம் மாவட்டம் திருக்கோவிலூரிலிருந்து மணலூர்பேட்டை வழியாக 20 கி.மீ சென்றாலும் ஆதிதிருவரங்கத்தை அடையலாம்.

‘உத்திராடத்தில் பிள்ளையும் ஊரோரத்தில் கழனியும்’ என்றொரு பழமொழி உண்டு. இந்த பழமொழிக்கேற்ப ஊருக்கு அருகில் எப்போதும் சொத்து வாங்கும் யோகம் பலருக்கு உண்டு. உத்திராடத்தின் முதல் பாதம் தனுசு ராசியில் இடம்பெறும். மீதியுள்ள மூன்று பாதங்களும் மகர ராசியில் இடம்பெறுகின்றன.

முதல் பாதத்தில் பிறந்தவர்களை, நட்சத்திர அதிபதியாக சூரியனும், ராசியாதிபதியாக குருவும், பாதத்தின் அதிபதியாக குருவும் சேர்ந்து ஆட்சி செய்கிறார்கள். இதனால் கம்பீரப் பொலிவும் தெளிவும் இவர்களிடம் மிகுந்து காணப்படும். ஐந்து வயது வரை சூரிய தசை நடைபெறும். நட்சத்திர நாயகனின் சொந்த தசையாக இருப்பதால் சிறிய வயதிலேயே முதிர்ச்சியோடு இருப்பார்கள். இவர்கள் கேட்கும் சில யதார்த்தமான கேள்விகளைக் கேட்டு பெற்றோர்கள் பிரமிப்பார்கள். 6 வயதிலிருந்து 15 வரை சந்திர தசை நடக்கும்போது படிப்பில் கவனம் குறையும். இந்த நிலைமை பத்தாம் வகுப்பு வரை நீடிக்கத்தான் செய்யும். சந்திரன் அஷ்டமாதிபதியாக இருப்பதால், சில வீடுகளில் பெற்றோருக்குள் கருத்து மோதலும் பிரிவும் இருக்கக்கூடும். மேலும், இந்த தசையில் கற்பனையும் கனவுகளும் அதிகம் நிறைந்திருக்கும். படிப்பில் அதிகமாக கவனம் செலுத்தத்தான் வேண்டும். 16 வயதிலிருந்து 22 வரை செவ்வாய் தசை நடைபெறும்போது, சந்திர தசையில் எதிர்கொண்ட பிரச்னைகளெல்லாம் தீரும். மாநில அளவில் ஏதேனும் ஒரு பாடத்தில் முதல் மதிப்பெண் பெறக்கூட முயற்சிப்பார்கள். ஐ.ஏ.எஸ். போன்ற படிப்புகளின் மீது ஒரு கண் இருக்கும். பத்தாம் வகுப்பிலிருந்து கல்லூரி முடிக்கும் வரை எல்லாவற்றிலும் முதலிடம்தான். நிர்வாகம், அரசியல், சிவில் எஞ்சினியரிங், எலக்ட்ரிகல், விண்வெளி ஆராய்ச்சி குறித்த படிப்புகள் எல்லாமுமே நன்றாக வரும்.

உத்திராடம் இரண்டாம் பாதத்தை சூரியன், மகரச் சனி, மகரச் சனியே ஆளும். அதாவது இரட்டை சனியின் சக்தி மிகுந்திருக்கும். ஏறக்குறைய 4 வயது வரை சூரிய தசையில் கொஞ்சம் உடம்பு படுத்தும். அப்பாவுக்கு அலைச்சல் இருக்கும். 5 வயதிலிருந்து 14 வரை சந்திர தசை நடக்கும். சூரியனின் நட்சத்திரத்தில் சந்திர தசை வருவதால் பெற்றோர் சண்டை இவர்களை பாதிக்கும். தனிமையை அதிகமாக விரும்புவார்கள். 15 வயதிலிருந்து 21 வரை செவ்வாய் தசை நடைபெறும்போது தலைமைப் பண்பு மேலோங்கியிருக்கும். சாகச விளையாட்டுகளில் ஈடுபடுவார்கள். படிப்பை விட விளையாட்டுத்துறையில்தான் கவனம் திரும்பும். இவர்களுக்கு பொதுவாக நிர்வாகம், அக்கவுன்ட்ஸ் போன்ற படிப்புகள் ஏற்றவை. பதினொன்றாம் வகுப்பிலிருந்து கல்லூரி முடியும் வரை செவ்வாய் தசை இருப்பதால் கெமிக்கல், சிவில், எலெக்ட்ரானிக்ஸ், எம்.பி.ஏ. போன்றவை மிகச் சிறந்த வாழ்க்கையை அமைத்துத் தரும். கேட்டரிங் டெக்னாலஜி தேர்ந்தெடுத்தால், ஒரு ஓட்டலுக்கே அதிபராகலாம்.

மூன்றாம் பாதத்தில் பிறந்தவர்களை சூரியன், சனி, கும்பச் சனி என்று மூவரும் வழிநடத்திச் செல்வார்கள். 2 வயது வரை சூரிய தசை இருக்கும். 3 வயதிலிருந்து 12 வரை சந்திர தசை நடைபெறுவதால் படிப்பைவிட விளையாட்டில் அதிக ஆர்வம் இருக்கும். ஏழாம் வகுப்பு படிக்கும்போது திடீரென்று வேறு பள்ளிக்கு மாறுவார்கள். 13 வயதிலிருந்து 19 வரை செவ்வாய் தசை நடைபெறுவதால், பளு தூக்குதல், ஓட்டப் பந்தயம் என விளையாட்டுகளில் கவனம் செலுத்துவார்கள். அறிவியல் பாடத்தில் மாநில அளவில் முதல் மதிப்பெண் எடுக்கும் வாய்ப்புண்டு. கல்லூரியிலும் அறிவியல், கனிம வளம் மற்றும் ஆராய்ச்சித்துறை சார்ந்த படிப்புகளை எடுப்பதே நல்லது. 20 வயதிலிருந்து 37 வரை ராகு தசை நடைபெறும் காலகட்டத்தில் வாழ்க்கை சட்டென்று மாறும். நியூக்ளியர் எஞ்சினியரிங், பயோ மெடிக்கல், மைனிங் எஞ்சினியரிங் போன்ற துறைகள் நல்ல எதிர்காலம் தரும். மருத்துவத்தில் நரம்பு, ஆர்த்தோ, கண் சம்பந்தப்பட்ட படிப்புகளில் நிபுணத்துவம் பெறலாம்.

இருப்பதிலேயே உத்திராடம் நான்காம் பாதத்தில் பிறந்தவர்கள்தான் பல துறைகளில் சாதிக்கும் வல்லமை பெற்றவர்களாக இருப்பார்கள். சூரியன், மகரச் சனி, குரு ஆகிய மூன்று கிரகங்களும் சேர்வதால் தோற்றத்தில் வசீகரம் மிகுந்திருக்கும். அதிகாரம், பணிவு, கற்றுக் கொடுத்தல் என்ற மூன்று குணங்களும் சமமாக இருக்கும். சூரிய தசை ஒரு வருடமோ அல்லது சில மாதங்களோ இருக்கும்... அவ்வளவுதான். அடுத்து 11 வயது வரை சந்திர தசையில் ஆசிரியர்களால் அடிக்கடி பாராட்டப்படுவார்கள். 12 வயதிலிருந்து 18 முடிய படிப்பில் முதலிடம் பெறுவார்கள். இவர்களில் சிலருக்கு அரசு வேலை சிறிய வயதிலேயே கிடைத்து விடும். அதற்குப் பிறகு வரும் 36 வயது வரையிலான ராகு தசையில் வியாபாரத்தில் இறங்கி விடுவார்கள். அசாதாரணமான ஆளுமைத் திறன் இருக்கும். ஏனெனில், எல்லாமே ராஜ கிரகங்களாக இருப்பதால் ஒன்றையொன்று விஞ்சித்தான் செயல்படும். அரசாங்கத்தால் நடத்தப்படும் அனைத்துத் தேர்வுகளையும் எழுதுவார்கள். பலருக்கு வேலையும் கிடைத்து விடும். ஐ.ஏ.எஸ்., மருத்துவத்துறையில் வயிறு, இ.என்.டி. போன்ற படிப்புகளில் சிறப்பு பெறலாம். படித்த கல்லூரியிலேயே பேராசிரியராக வரும் வாய்ப்புகள் அதிகமுண்டு.

உத்திராடத்தின் வாக்குக்கு அதிபதியாக அதாவது கல்வியைத் தருபவராக கும்பச் சனி வருகிறார். இந்த அமைப்பிற்கு விநாயகர் வழிபாடு ஏற்றம் தரும். பொதுவாகவே கும்ப ராசிக்காரர்கள் விநாயகரை வணங்குவது வாழ்க்கையில் உயர்ந்த இடத்தில் அமர வைக்கும். திருப்புறம்பியம் சாட்சிநாதர் ஆலயத்தில் அருளும் பிரளயம் காத்த விநாயகரை வணங்கி, உத்திராடம் நட்சத்திரக்காரர்கள் கல்வியில் வெல்லலாம். இத்தலம் கும்பகோணத்திலிருந்து 12 கி.மீ. தூரத்தில் உள்ளது.
கேட்டை நட்சத்திரத்தில் பிறந்தவர்கள் எதையுமே அணு அணுவாகத் திட்டமிடுவார்கள். புத்திக்குரிய கிரகமான புதனை அதிபதியாகக் கொண்ட நட்சத்திரம் இது. இவர்களின் ராசியாதிபதி, செயல்படுத்தும் கிரகமான செவ்வாய் என்பதால், தந்திரத்தோடு செயலாற்றுவார்கள். எந்த ஆசிரியர், எப்படி எழுதினால் மதிப்பெண் போடுவார் என்பதை பள்ளி வயதிலேயே தெரிந்து வைத்திருப்பார்கள். கௌரவமான மதிப்பெண்களை பெற்றுத் தப்பித்துக் கொள்வார்கள்.

கேட்டையின் முதல் பாதத்தை தனுசு குரு ஆட்சி செய்கிறார். ராசியாதி பதியாக செவ்வாயும், நட்சத்திர அதிபதியாக புதனும், முதல் பாதத்தை ஆட்சி செய்பவராக குருவும் வருகிறார்கள். இந்த மூவரும்தான் வாழ்வினை நடத்திச் செல்வார்கள். 14 வயது வரை புதன் தசை நடக்கும். புதன் நரம்புகளுக்கு உரியவனாக இருப்பதால், இந்த தசையில் அவ்வப்போது நரம்புக் கோளாறு வந்து நீங்கும். கணக்கு எப்போதும் இவர்களுக்கு ஆமணக்குதான். கிட்டத்தட்ட எட்டாம் வகுப்பு வரை கணக்குப் பாடத்தில் திணறுவார்கள். சொந்த ஜாதகத்தில் புதன் நன்றாக இருந்தால், கணக்கில் புலியாக வலம் வருவார்கள். இவர்களில் சிலர் தாய்மாமன் வளர்ப்பில் சில காலம் இருப்பார்கள். 15 வயதிலிருந்து 21 வரை கேது தசை நடைபெறும். முக்கிய காலகட்டமான பிளஸ் 2 வரையும், அதற்குப் பிறகு கல்லூரி முடிய இந்த தசை நடப்பதால் கஷ்டப்பட்டுத்தான் படிக்க வேண்டி வரும். ஆசைப்பட்டதை படிக்க முடியாமல் கிடைத்ததைப் படித்து கேது தசை முடியும்போது மிகச் சிறந்த நிறுவனத்தில் வேலைக்கு அமர்ந்து விடுவார்கள். 22 வயதிலிருந்து 41 வரை சுக்கிர தசை நடைபெறும்போது பட்டியலிட்டு ஆசைகளை நிறைவேற்றிக் கொள்ளலாம். ஐ.டி. துறை இவர்களுக்கு மிகுந்த சிறப்பு தரும். மேலும் சட்டம், பொலிட்டிகல் சயின்ஸ் போன்றவையும் எளிதாக வரும். மொழித்திறன் அதிகமாக இருப்பதால் பகுதிநேரமாக பிரெஞ்சு, இத்தாலி என பயின்றால் சமூக அங்கீகாரம் கிடைக்கும். மருத்துவத்தில் இ.என்.டி., மனநல மருத்துவர், வயிறு, நரம்பு தொடர்பான துறைகளில் கவனம் செலுத்தினால் நிபுணராகலாம். 

இரண்டாம் பாதத்தின் அதிபதி மகரச் சனி. புதனும், சனியும் சேர்ந்து அமர்க்களமாக ஆள்வார்கள். பத்து வயது வரை புதன் தசை நடைபெறும். ஒவ்வாமை, வீசிங் போன்ற தொந்தரவுகள் இருக்கும். 11 வயதிலிருந்து 17 வரை நடைபெறும் கேது தசையில், எதிலுயும் ஒரு தடை இருக்கும். பள்ளி மாற்றி படிக்க வைப்பார்கள். இதனால் கொஞ்சம் படிப்பில் மந்தம் ஏற்படும். சனிக்கு கேது கொஞ்சம் பகையாக இருப்பதால், கவனச் சிதறல் அதிகமாக இருக்கும். இந்த சமயத்தில்தான் பலருக்கு தாழ்வு மனப்பான்மை தலைதூக்கும். பள்ளியிறுதி வரை ஏனோதானோ என்றிருந்தாலும், கல்லூரி சென்றதும் கலக்க ஆரம்பிப்பார்கள். 18 வயதிலிருந்து 37 வரை சுக்கிர தசை நடைபெறும்போது வாழ்க்கை ரம்மியமாக இருக்கும். கேட்டரிங் டெக்னாலஜி, விஸ்காம், ஆட்டோமொபைல் துறைகளில் சாதிக்கலாம். இவர்கள் பி.காம்., பி.எஸ்சி. பிசிக்ஸ், தத்துவம் என்று படிக்கும்போது அதில் தனித்துவமிக்க நபராக விளங்குவார்கள். பள்ளியிறுதி படிக்கும்போதே பைலட் ஆவதற்கான முயற்சிகளையும் மேற்கொள்ளலாம். சீக்கிரமே வரும் சுக்கிர தசையில், இவர்கள் சுமாராக படித்த படிப்பே மிகுந்த உதவியைத் தரும். சிலர் டி.எஃப்.டி. படித்து திரைத் துறையில் நுழைவார்கள்.


மூன்றாம் பாதத்தை கும்பச் சனி ஆள்கிறார். இவர்கள் கொஞ்சம் சாத்வீகமாகத்தான் இருப்பார்கள். ஏறக் குறைய 7 வயது வரை புதன் தசை நடைபெறும். 8 வயதிலிருந்து 14 வரை கேது தசை நடைபெறும்போது யார் பேச்சையும் கேட்க மாட்டார்கள். பத்தாம் வகுப்பில் கொஞ்சம் பொறுப்புணர்வு வந்து படிக்கத் தொடங்குவார்கள். அடுத்ததாக 15 வயதிலிருந்து 34 வரை சுக்கிர தசை வரும். தோற்றப் பொலிவு கூடும். பத்தாம் வகுப்பில் சுமாராகப் படித்தாலும் அடுத்தடுத்த வகுப்புகளில் மிக நன்றாகப் படிப்பார்கள். கேட்டை நட்சத்திரக்காரர்களுக்கு கிட்டத்தட்ட மத்திம வயதிற்குள்ளேயே சுக்கிர தசை வருவதால் எச்சரிக்கையோடு இருக்க வேண்டும். நிறைய பணம், நண்பர்கள் சேர்க்கை கிடைக்கும். ஆர்க்கிடெக்ட், கன்ஸ்ட்ரக்ஷன், இன்டீரியர் டெக்கரேஷன் என்று துறைகளைப் பிடித்து பரபரவென மேலேறலாம். இவர்கள் மருத்துவத்தில் புற்றுநோய் ஆராய்ச்சியில் ஈடுபடலாம். விஸ்காம், விலங்கியல், ஏரோநாட்டிகல் எஞ்சினியரிங் என்றும் படிக்கலாம்.

நான்காம் பாதத்தை மீன குருவோடு, புதனும், செவ்வாயும் சேர்ந்து ஆட்சி செய்கிறார்கள். மூன்று வயது வரை நடக்கும் புதன் தசையில் பாலாரிஷ்டம் என்று சொல்லப்படும் ஏதாவது நோய்கள் வந்து நீங்கியபடி இருக்கும். 4 வயதிலிருந்து 10 வரை நடைபெறும் கேது தசையில், இவர்களை விளையாட்டுப் பக்கமும் கொஞ்சம் விட்டால் பின்னால் தேசிய அளவில் சாதனை புரிவார்கள். சிறிய வயதிலேயே, அதாவது 11 வயதிலிருந்து சுக்கிர தசை தொடங்கி 30 வரை இருப்பதால் கலைகளில் ஈடுபாடு அதிகரிக்கும். இந்த சுக்கிர தசை பெற்றோருக்கு அதிக பணவரவைத் தரும். 25, 27, 29 வயதில் பணத்தை தண்ணீராக செலவழிப்பார்கள். இவர்கள் கல்லூரியில் எந்த துறையை தேர்ந்தெடுக்கிறார்களோ அதில் பிஎச்.டி. செய்து பேராசிரியராகும் வாய்ப்புகள் உண்டு. பி.இ. சீட் கிடைத்தால் ஆட்டோமொபைல், மெக்கானிக்கல் என்று சேரலாம். மருத்துவத் துறையில் முக சீரமைப்பு, வயிறு, உளவியல் சம்பந்தமான துறையில் ஜெயிப்பார்கள். இந்தப் பாதத்தில் பிறந்த பலர் ஆசிரியப் பணியில் அமர்வார்கள்.

கேட்டை நட்சத்திரக்காரர்கள் காஞ்சிபுரம் அருகேயுள்ள 108 திவ்ய தேசங்களில் ஒன்றான திருப்புட்குழி எனும் தலத்தில் அருள்பாலிக்கும் விஜயராகவரை வணங்குவது நலம். இவர்களுக்கு வாக்கின் அதிபதியாகவும், கல்விக்குரியவராகவும் கோதண்ட குரு வருவதால், வெற்றி பெற்ற கோலத்தில் அருளும் விஜயராகவரை தரிசிப்பது நன்மை தரும். இத்தலம் காஞ்சிபுரம் வேலூர் பாதையில் அமைந்துள்ளது.


தனுசு ராசியில் மூலம் நட்சத்திரத்தில் பிறந்தவர்களிடம் கேதுவின் ஆதிக்கம் இருக்கும். பள்ளிப் பருவத்திலேயே சூட்சுமமான விஷயங்களை அறிந்துகொள்ளத் துடிப்பார்கள். மதிப்பெண்களுக்காக படிக்காமல் அறிவுத்திறனை வளர்த்துக் கொள்வதற்காகவே நிறைய படிப்பார்கள். முதல் பாதத்தின் அதிபதியாக செவ்வாயும், ராசியாதிபதியாக குருவும், நட்சத்திர தலைவராக கேதுவும் இருக்கிறார்கள். இரு ராஜ கிரகங்கள் ஒன்றாக இருப்பதால், வகுப்பறையில் புத்திசாலி மாணவனோடு மட்டுமே பழகுவார்கள். 6 வயது வரை கேது தசை நடைபெறும். கொஞ்சம் உடம்பு படுத்தி எடுக்கும். அதன்பின் 26 வயது வரை சுக்கிர தசை நடைபெறும். கலைகளுக்கு நாயகன் சுக்கிரன் என்பதால் ஆடல், பாடல், இசை என்று ஏதேனும் ஒன்றில் தனித்திறமை பெறுவார்கள். எஞ்சினியரிங்கில் எலெக்ட்ரிகல், கெமிக்கல் எடுத்தால் நல்லது. மண் சம்பந்தப்பட்ட படிப்பும், அறிவியலில் விலங்கியல் துறையும் இவர்களுக்கு ஏற்றது. பி.காம். படிப்பதை விட பி.பி.ஏ. படிப்பது நல்லது. எம்.பி.ஏ.வில் பைனான்ஸ், ஹெச்.ஆர். என்று போவது நல்லது. மருத்துவத்தில் டென்டல் சர்ஜன், ஆர்த்தோ, மனநலம் போன்ற துறைகளைத் தேர்ந்தெடுக்கும்போது கிரகங்களின் அலைவரிசை எளிதாக வெற்றி பெறச் செய்யும்.

இரண்டாம் பாதத்தின் அதிபதி சுக்கிரன். பொதுவாகவே கேது சொந்த ஜாதகத்தில் நன்றாக இருந்தால், பிறக்கும்போது நடைபெறும் கேது தசையில் எந்த பிரச்னையும் இருக்காது. 4 வயது வரை ஜாதகத்தில் கேதுவின் நிலைப்படி உடல்நிலை அமையும். ஆனால் பொதுவாக ஒவ்வாமை வந்து நீங்கும். 5 வயதிலிருந்து 24 வரை சுக்கிர தசை நடைபெறும். முதல் பாதத்திற்கு சொல்லும்படியான பெரிய நன்மைகள் செய்யாத சுக்கிரன், இங்கே வாரி வழங்குவார். சிறுவயதிலே நல்ல பள்ளி, வீட்டுச் சூழல் என்று ரம்மியமாக வாழ்க்கை நகரும். பொதுவாகவே சுக்கிர தசை எல்லோரையும் கவரும் கலைகளைத்தான் அதிகம் கொடுக்கும். ஆனாலும், கல்லூரி வரை மரியாதையான மதிப்பெண்களை எடுத்து விடுவார்கள். தாவரவியல், பயோடெக்னாலஜி போன்ற படிப்புகளைத் தேர்ந்தெடுக்கலாம். பொறியியல் என்றால் ஆர்க்கிடெக்ட், சிவில் நன்று. பி.காம். படிக்கலாம். எகனாமிக்ஸ் சரி வராது. ஏரோநாட்டிகல் கிடைத்தால் நிச்சயம் வெற்றி பெறுவார்கள். மருத்துவத்தில் பிளாஸ்டிக் சர்ஜனாக வரும் வாய்ப்பு அதிகம்.

மூன்றாம் பாதத்தை புதன் ஆள்வதால் சூட்சும புத்தி அதிகமிருக்கும். 2 வருடங்கள் கேது தசையில் உடல் உபாதைகள் படுத்தும். ஆனால், பயப்பட வேண்டாம். 3 வயதிலிருந்து 22 வரை சுக்கிர தசை நடைபெறும்போது புத்தியில் பிரகாசம் கூடும். வாழ்க்கை பற்றிய தேடல் 15 வயதிலேயே தொடங்கும். பொதுவாகவே மூல நட்சத்திரக்காரர்களுக்கு கல்லூரி வரை படிப்பில் எந்த பிரச்னையும் இருக்காது. ராசிக்குரிய அதிபதியாக குரு வருவதால் சட்டம், பொலிட்டிகல் சயின்ஸ், இயற்பியல், தத்துவம், சமயம் போன்ற துறைகளைத் தேர்ந்தெடுப்பது நல்லது. வானவியல் தொடர்பான பட்டமும் வெற்றி தரும். வரலாறு இவர்களுக்கு இனிக்கும். இந்த பாதத்தில் பிறந்த பலர் ஆங்கில இலக்கியம் படிப்பார்கள். புள்ளியியல், ஏ.சி.எஸ். போன்ற படிப்புகளில் ஈடுபாடு காட்டினால் நிச்சயம் வெற்றி உறுதி. பொறியியலில் சிவில், எலெக்ட்ரானிக்ஸ் நல்லது. மருத்துவத்தில் மூளை, சிறுநீரகம் சார்ந்த துறைகள் எனில் நிபுணராகும் வாய்ப்பு உண்டு.

நான்காம் பாதத்திற்கு அதிபதியாக சந்திரன் வருகிறார். பிறக்கும்போதே கேது தசை சில மாதங்கள் இருக்கலாம். அதிகபட்சமாக இரண்டு வருடங்கள் வரை நடக்கலாம். பிறகு 20 வயது வரை சுக்கிர தசை நடைபெறும்போது செல்வ வளத்தோடு சுகபோகமாக வாழ்வார்கள். கவிதைகளை எழுதிக் குவித்து இலக்கிய ஈடுபாடு காட்டுவார்கள். அறிவியலில் நல்ல மதிப்பெண் பெறுவார்கள். இவர்களில் நிறைய பேர் சயின்டிஸ்ட் ஆவார்கள். முக்கியமாக அஸ்ட்ரானமி போன்ற படிப்பெனில் சாதனையாளராகத்தான் வலம் வருவார்கள். 21 வயதிலிருந்து 26 வரையிலும் நடக்கும் சூரிய தசை வாழ்க்கையை சட்டென்று மேலேற்றும். பெரிய மனிதர்களின் நட்பு கிடைக்கும். பொறியியலில் எலெக்ட்ரானிக்ஸ் அண்ட் கம்யூனிகேஷன், ஆர்க்கிடெக்ட், ஆட்டோமொபைல் படிக்கலாம். விஸ்காம் படித்தால் எளிதாக ஜெயிக்கலாம். சி.ஏ. நல்ல எதிர்காலம் தரும். மருத்துவத்துறை எனில் இ.என்.டி, மயக்கவியல் போன்ற துறைகளில் வல்லவர் ஆகலாம்.

மூல நட்சத்திரக்காரர்களின் வாக்குக்கு அதாவது கல்விக்கு அதிபதியாக மகரச் சனி வருவதால் பள்ளிகொண்ட கோலத்தில் அருளும் ஈசனை வணங்குவது நன்மை பயக்கும். சாதாரணமாக பெருமாளைத்தான் பள்ளிகொண்ட கோலத்தில் தரிசித்திருப்போம். ஆனால், ஆலகால விஷத்தை உண்டு சற்றே மயங்கிக் கிடக்கும் ஈசனை சுருட்டப்பள்ளி கோயிலில் தரிசிக்கலாம். சென்னையை அடுத்து, திருவள்ளூர் மாவட்டம் ஊத்துக்கோட்டைக்கு அருகே உள்ளது சுருட்டப்பள்ளி.
ஞான சொரூபனான குருவின் ஆதிக்கத்தில் வரும் நட்சத்திரங்களிலேயே விசாகத்தார்தான் கொஞ்சம் அப்பாவியாக இருப்பார்கள். ‘‘நல்லாதான் படிச்சாரு. ஆனா, அதுமட்டும் போதுமா. சாமர்த்தியமா வேலை தேட வேண்டாமா. இவன் கூட படிச்சு கம்மியான மார்க் எடுத்தவனெல்லாம் இன்னிக்கு எங்கயோ இருக்கானே’’ என்று சொல்லும்படியாக இருக்கும். விசாகத்தின் முதல் மூன்று பாதங்கள் துலாம் ராசியிலும், நான்காம் பாதம் மட்டும் விருச்சிக ராசியில் இடம் பெறும். முதல் பாதத்தில் பிறந்தவர்களுக்கு நட்சத்திர அதிபதியாக குருவும், ராசியாதிபதியாக சுக்கிரனும், முதல் பாதத்தின் அதிபதியாக செவ்வாயும் வருகிறார்கள். ஏறக்குறைய 14 வயது வரை குரு தசை இருக்கும். குருவும் செவ்வாயும் நண்பர்களாக இருப்பதால் பரபரப்பாக இருப்பார்கள். நன்றாகவும் படிப்பார்கள். எட்டாம் வகுப்பு வரை நன்றாகப் போகும் பள்ளி வாழ்க்கை, அதன்பின் சரிவை சந்திக்கும். ஏனெனில், 15 வயதிலிருந்து 32 வரை சனி தசை நடக்கும். இந்த ராசிக்கே சனி யோககாரகன்தான். அப்படியிருந்தும் பாதகாதிபதியாக முதல் பாதத்திற்கு அதிபதியாக செவ்வாய் வருவதால், திடீரென்று படிப்பில் கவனம் சிதறும். இந்த சமயங்களில் சிவாலய பிரதோஷ வழிபாடு பலன் தரும். பள்ளியிலிருந்தே காவல்துறை, ராணுவம், விமானப்படை என்று பல்வேறு விதமான துறைகளை சுட்டிக் காட்டி ஈடுபாடு கொள்ளச் செய்யுங்கள். இதுதவிர எலெக்ட்ரிகல் அண்ட் எலெக்ட்ரானிக்ஸ், மெக்கானிகல், பி.பார்ம் போன்ற படிப்புகள் முன்னேற்றத்தைக் கொடுக்கும். கெமிஸ்ட்ரி, மைக்ரோ பயாலஜி, ஜெனிடிக் எஞ்சினியரிங் படிப்புகளை ஆர்வத்தோடு படிப்பார்கள். மருத்துவத்தில் ரேடியோலஜி, ஆர்த்தோ படிக்கலாம். 

இரண்டாம் பாதத்தை சுக்கிரன் ஆள்கிறார். இரண்டு சுக்கிர சக்திகள் வருவதால், படிக்கிறார் களோ இல்லை யோ... எல்லோரையும் கவர்ந்து நல்ல பெயர் வாங்குவார்கள். கூடவே நட்சத்திர அதிபதியாக குருவும் வருவதால், சுற்று வட்டாரம் அவ்வப்போது அடக்கி வைக்கும். ஏறக்குறைய 10 வருடம் குரு தசை நடக்கும். குழந்தைப் பருவத்தில் மஞ்சள் காமாலை இருந்தால் உடனடியாக சரி செய்து விடவேண்டும். ஐந்தாம் வகுப்பு வரை ஒரு பள்ளியிலும் அதற்குப்பிறகு வேறு பள்ளியிலும் படிக்க நேரும். 11 வயதிலிருந்து 29 வரை சனி தசை. சனி இவர்கள் ராசிக்கு 4, 5க்கு உரியவராக வருவதாலும், சுக்கிரனுக்கு நட்பாக இருப்பதாலும் முன்பை விட நன்றாகவே படிப்பார்கள். பள்ளியில் நடைபெறும் எல்லா போட்டிகளுக்கும் கைதூக்குவார்கள். என்னதான் சனி இவர்களுக்கு நல்லது செய்தாலும் வாலிபத்தில் பாதை மாற்றி படிப்பை கெடுப்பார், எச்சரிக்கை! பத்தாம் வகுப்பில் நிறைய மதிப்பெண்கள் வாங்கிவிட்டு பிளஸ் 2வில் கோட்டை விட்டுவிடக் கூடாது. விஸ்காம், ஃபேஷன் டெக்னாலஜி, ஆட்டோமொபைல் எஞ்சினியரிங் போன்றவை சிறந்தது. இசை படித்தால் பெரிய அங்கீகாரம் கிடைக்கும். மருத்துவத்தில் சரும நோய், புற்றுநோய் மருத்துவர் ஆகும் வாய்ப்பு உண்டு.

மூன்றாம் பாதத்தின் அதிபதியாக புதன் வருகிறார். இந்த அமைப்பில் பிறந்தவர்கள் புலம்பித் தள்ளுவார்கள். ‘‘ராத்திரியும் பகலுமா படிச்சாக் கூட மார்க் எழுவதை தாண்ட மாட்டேங்குது’’ என்பார்கள். மறதி அதிகமாக இருக்கும். முதல் எட்டு வருடங்கள் குரு தசையில் மயக்கம் வந்து நீங்கும். பயப்பட வேண்டாம். 8 வயதிலிருந்து 20 வரை சனி தசை நடக்கும்போது உடம்பு தேறும். கிட்டத்தட்ட நான்காம் வகுப்பிலிருந்து கல்வியின் பக்கம் கொஞ்சம் திரும்புவார்கள். படிப்பைவிட கவிதையில் ஈர்ப்பு இருக்கும். எல்லா சப்ஜெக்டிலும் நல்ல மதிப்பெண்கள் எடுக்க மாட்டார்கள். ஏதேனும் ஒன்றிரண்டில் பள்ளியின் முதல் மாணவராக வருவார்கள். புள்ளியியல், சட்டம், அக்கவுண்ட்ஸ், பொலிடிகல் சயின்ஸ், சி.ஏ. போன்ற படிப்புகள் சிறந்தது. ஆர்க்கிடெக்ட், கம்ப்யூட்டர் அனிமேஷன், கேட்டரிங் டெக்னாலஜியும் படிக்கலாம்.


துலாம் ராசியில் இடம்பெறும் விசாகத்தின் மற்ற மூன்று பாதங்களைக் காட்டிலும் விருச்சி கத்தில் வரும் நான்காம் பாதம் வேறானது. இந்த பாதத்தில் பிறந்த குழந்தையின் 8வது மாதத்திலிருந்து 3 வயது முடியும் வரை உடல்நலக் கோளாறுகள் வந்து நீங்கும். அதன்பிறகு 4 வயதிலிருந்து 22 வரை நடைபெறும் சனி தசையில் நரம்புக் கோளாறு, ஒவ்வாமை தொந்தரவுகள் இருக்கும். ஆனால், படிப்பில் அசத்துவார்கள். ஆசிரியரையே குறுக்குக் கேள்வி கேட்டு திகைக்க வைப்பார்கள். கிட்டத்தட்ட 4 வயதிலிருந்து 13 வரை சிலர் விடுதியில் தங்கிப் படிக்க நேரும். அதன்பின் 22 வயது வரை எல்லா விஷயங்களிலும் ஆர்வம் செலுத்துவார்கள். முதல் பகுதியைவிட இரண்டாம் பகுதிதான் சிறப்பாகத் தொடரும். மரைன் எஞ்சினியரிங், ஐ.டி., மருத்துவத்தில் இ.என்.டி., மனநோய் மருத்துவம் போன்ற துறைகளில் நிச்சயம் ஏற்றம் உண்டு. ஃபேஷன் டெக்னாலஜி, எம்.பி.ஏ. படிப்பில் பைனான்ஸ் போன்றவை ஏற்றது. தமிழ் இலக்கியம் படித்தால், சமூக அங்கீகாரம் கிடைக்கும்.

விசாகம் குருவின் நட்சத்திரமாக வருவதாலும், செவ்வாயும், புதனும் கொஞ்சம் திணறடிப்பதாக இருப்பதாலும் ஞானியரின் ஜீவ சமாதியை வணங்கினால் கல்வி சிறக்கும். சென்னையை அடுத்த திருவொற்றியூரின் கடலோரத்தில் அருள்பரப்பியிருக்கும் பட்டினத்தாரின் ஜீவ சமாதியை தரிசித்தால் கல்வியிலும் வேலையிலும் ஜெயிக்கலாம். 

அனுஷ நட்சத்திரத்தை செவ்வாயும், சனியும் சேர்ந்து ஆட்சி செய்கின்றனர். இது முரண்பாட்டை உருவாக்கும் அமைப்பாகும். இதனால் அவ்வப்போது சர்ச்சைகள் எழுந்து அடங்கிய வண்ணம் இருக்கும். மனோகாரகனான சந்திரன் நட்சத்திரத்தில் நீச்சமாகிறான். இதனால் ஒரு முடிவை எடுத்தபிறகு, ‘இது தவறா... சரியா...’ என்று யோசித்தபடி இருப்பார்கள். அடுத்தவர் விஷயங்களை எளிதில் தீர்த்தாலும் தன் விஷயத்தில் தடுமாற்றம் இருக்கும்.

முதல் பாதத்தில் பிறந்தவர்களை சூரியன் ஆள்கிறார். நட்சத்திர அதிபதியாக சனி வருவதாலும், அவர் சூரியனுக்குக் கொஞ்சம் பகைவராக இருப்பதாலும் 17 வயது வரை கடினமான பாதையில் செல்ல வேண்டியிருக்கும். உடல்நலக் கோளாறுகளும் வறுத்தெடுக்கும். பத்தாம் வகுப்பில் நிறைய மதிப்பெண்கள் எடுக்க முடியும் என்ற எதிர்பார்ப்பு இருந்தாலும், நினைத்த மதிப்பெண்கள் எடுக்க முடியாது. கிட்டத்தட்ட பிளஸ் 2 வரை கடனே என்றுதான் பள்ளி செல்வார்கள். 18 வயதிலிருந்து 34 வரை புதன் தசை நடைபெறும். இந்த தசையில்தான் உருப்படியாகப் படிப்பார்கள். சனி தசையைவிட இது நன்றாக இருக்கும். அலைய வைத்து ஆதாயம் தரும் தசையாக இருக்கும். யாருமே எளிதில் விரும்பாத துறையைத் தேர்ந்தெடுத்துப் படித்து வெற்றி பெறுவார்கள். ஆங்கில இலக்கியம், பொலிடிகல் சயின்ஸ், வரலாறு என தேர்ந்தெடுத்தால், பேராசிரியர்களாக அமரும் வாய்ப்புண்டு. ஏரோநாட்டிகல் எஞ்சினியரிங், மருத்துவத்தில் கண், கால், தலை அறுவை சிகிச்சை நிபுணராக வாய்ப்புண்டு. எம்.பி.ஏ. படிக்கும்போது ஹெச்.ஆர். துறையைத் தேர்ந்தெடுத்துப் படிப்பது நல்லது. 

இரண்டாம் பாதத்தில் பிறந்தவர் களை புதன் ஆள்கிறார். 13 வயது வரை சனி தசை இருக்கும். பள்ளியில் நன்றாகப் படிப்பார்கள். ஆசிரியர் போர்டில் கணக்கை எழுதும்போதே விடையை நோட்டில் போடுவார்கள். 14 வயதிலிருந்து 30 வரை புதன் தசை நடக்கும்போது பெற்றோருக்கு கண்டம் வரும். எதையும் சிந்திக்காமல், படிப்பில் கவனம் செலுத்த வேண்டும். கௌரவமான மதிப்பெண்கள் பெறலாம். இவர்களில் பலர் வேலைக்குப் போய்க்கொண்டே படிப்பவராக இருப்பார்கள். திடீரென்று ஒரு நட்பு உங்கள் வாழ்க்கையையே புரட்டிப் போடும். படிப்பைவிட இன்டோர் கேம்ஸில் ஈடுபாடு காட்டுவார்கள். இவர்களில் பெரும்பாலானோர் சி.ஏ., ஐ.சி.டபிள்யு., ஏ.சி.எஸ் எனப் போகலாம். பி.இ கெமிக்கல், புள்ளியியல் படிப்பில் நிபுணத்துவம் என்று சிறப்படைவார்கள். மரைன் எஞ்சினியரிங் படிப்பிற்கு முயற்சிக்கலாம். 

மூன்றாம் பாதத்திற்கு அதிபதியாக சுக்கிரன் வருகிறார். கிட்டத்தட்ட 8 வயது வரை சனி தசை நடைபெறும். சிறிய வயதிலிருந்தே எல்லோரையும் கவர்வார்கள். 3 வயது முதல் 5 வரை வீசிங், ஈஸ்னோபீலியா தொந்தரவுகள் வந்து நீங்கும். படிப்பில் நன்றாக இருந்தாலும் கலைத் துறையில்தான் ஆர்வம் செலுத்துவார்கள். 9 வயதிலிருந்து 25 வரை புதன் தசை நன்றாக இருக்கும். எவ்வளவு கற்றுக் கொள்ள முடியுமோ அவ்வளவையும் கற்றுக் கொள்வார்கள். நிறையப் பேர் மெரிட்டில் பாஸ் செய்வார்கள். சகல கலைகளையும் கற்றுக் கொள்ளத் துடிப்பார்கள். ஆங்கில இலக்கியம் படித்துவிட்டு, பிறகு தொழில் சார்ந்த கல்வியைக் கற்பார்கள். ஃபேஷன் டெக்னாலஜி, கேட்டரிங் டெக்னாலஜி, விஸ்காம் போன்ற படிப்புகள் இவர்களுக்கு ஏற்றவை. மேலும், சமஸ்கிருத படிப்பில் ஆவல் காட்டுவார்கள். ஏரோநாட்டிகல் எஞ்சினியரிங், ஆட்டோமொபைல் எஞ்சினியரிங், எலக்ட்ரானிக்ஸ் என்று படித்தால் நல்லது. 

நான்காம் பாதத்தில் பிறந்தவர்கள் செவ்வாயின் ஆதிக்கத்தில் வருவார்கள். கோபக்காரர்களாக இருப்பார்கள். 4 வயது வரை சனி தசை நடைபெறும். 5 வயதிலிருந்து 21 வரை புதன் தசை நடைபெறும்போது அடிப்பது, அடிவாங்குவது என்று திரிந்து கொண்டிருப்பார்கள். இந்த பாதத்தில் பிறந்தவர்களிடம் நண்பர்கள் போல பெற்றோர் பழகிப் படிக்கச் சொல்ல வேண்டும். இல்லையெனில் கேட்க மாட்டார்கள். கொஞ்சம் எமோஷனலாக அலைவார்கள். காட்டாற்று வெள்ளம் போல சக்தியைக் கொண்டிருப்பார்கள். அதனால் எதில் ஆர்வம் இருக்கிறதோ, அதை உறுதிப்படுத்திவிட்டு படிக்க வையுங்கள். 22 வயதிலிருந்து 28 வரை நடைபெறும் கேது தசையில் 24 வயதில்தான் கொஞ்சம் விழிப்புணர்வு வரும். பள்ளியில் சாதாரணமாகப் படித்தாலும், கல்லூரி என்று வரும்போது கெமிஸ்ட்ரி, புவியியல், மண்ணியல், விலங்கியல் போன்ற படிப்புகள் சாதகமாக இருக்கும். எஞ்சினியரிங்கில் எலெக்ட்ரிகல் அண்ட் எலெக்ட்ரானிக்ஸ், ஐ.டி. என்று படித்தால் வெற்றி பெறுவார்கள். பெரும்பாலும் ராணுவம் அல்லது காவல்துறை வேலைக்குச் செல்வார்கள்.

ராசியாதிபதியாக செவ்வாயும், கல்வியைத் தருபவராக குருவும் வருவதால், குருவும் செவ்வாயும் சேர்ந்த அம்சமான ஐயன் சுவாமிமலை முருகனை தரிசிப்பது நல்லது. தந்தைக்கு உபதேசம் செய்த தலமான, கும்பகோணத்திலிருந்து 10 கி.மீ. தொலைவிலுள்ள சுவாமிமலை சுவாமிநாத சுவாமியை தரிசிக்க, இவர்களின் கல்வித் திறன் உயரும்.
மகர ராசியில் திருவோண நட்சத்திரத்தின் நான்கு பாதங்களும் இடம் பெறுகின்றன. திருவோணத்தின் அதிபதி சந்திரன். எனவே இவர்களுக்கு இளம் வயதிலிருந்தே அநாயாசமான கற்பனைத்திறன் இருக்கும். அடுக்கடுக்கான யோசனைகள் வந்து கொண்டே இருக்கும். ‘ஓணத்தில் பிறந்தவர் கோணத்தை ஆள்வார்’ என்கிற பழமொழி வேறு இருக்கிறது.

திருவோணத்தின் முதல் பாதத்தை மேஷச் செவ்வாய் ஆள்கிறார். ஏறக்குறைய 9 வயது வரை சந்திர தசை இருக்கும். சிறிய வயதிலேயே திறமைகள் வெளிப்படத் தொடங்கும். 10 வயதிலிருந்து 16 வரை செவ்வாய் தசை நடைபெறும்போது கொஞ்சம் எச்சரிக்கை தேவை. ராசிநாதனான சனிக்கு செவ்வாய் பகையாக வருவதால், பள்ளி மாற்றம், அலைச்சல் என வாழ்க்கை நகரும். இப்படி பல காரணங்களால் சரியாகப் படிக்காமல் இருப்பார்கள். ஃபுட்பால் போன்ற விளையாட்டுகளில்தான் ஆர்வம் அதிகமிருக்கும். பத்தாம் வகுப்பில் மரியாதையான மதிப்பெண்கள் எடுப்பதே பெரிய விஷயம்.

17 வயதிலிருந்து 35 வயது வரை ராகு தசை நடைபெறும். பிளஸ் 2வில் அறிவியல் படித்து விட்டு, ‘‘என்னை பி.பி.ஏ. சேர்த்து விடுங்கள்’’ என்பார்கள். ஏதேனும் குறுகிய கால கோர்ஸ் படிப்பார்கள். அதுதான் அவர்களுக்கு உதவும்படியாக அமையும். ராகு தசையில் பல மொழிகளில் வல்லமை வரும். கெமிக்கல், எலெக்ட்ரிகல், விவசாயம், சிவில் என்று சேர்வது நல்லது. மருத்துவத்தில் எலும்பு, பல் சம்பந்தமான துறை கிடைத்தால் உடனே சேரலாம். இவர்களிடம் மிதமிஞ்சிய நிர்வாகத்திறன் இருப்பதால் மார்க்கெட்டிங் மேலாண்மை, செகரட்டரியல், வங்கி மேலாண்மை எனவும் முயற்சிக்கலாம்.

இரண்டாம் பாதத்தை ரிஷபச் சுக்கிரன் ஆள்கிறார். யானை பலத்தோடு இருப்பார்கள். பொதுவாகவே திடீர் அதிர்ஷ்டம் இருக்கும். ஏறக்குறைய 6 வயது வரை சந்திர தசை நடக்கும். 7 வயதிலிருந்து 13 வரை நடக்கும் செவ்வாய் தசையில் இவர்களின் அதிர்ஷ்டக்காற்று பெற்றோர் மீது வீசும். சிறிய வயதிலேயே ஓவியப் போட்டி, மாற்றுடைப் போட்டி, மேடை நாடகம் என்று ஈடுபடுவார்கள். சுக்கிரன் பாதத்தின் அதிபதியாக இருப்பதால், கஷ்டப்பட்டெல்லாம் படித்துக் கொண்டிருக்க மாட்டார்கள். குறை சொல்ல முடியாத அளவுக்கு மதிப்பெண்கள் எடுப்பார்கள். இதற்கடுத்து வரும் ராகு தசையும் நன்மை தரக் கூடியதாகவே இருக்கும். பாதத்தின் அதிபதியான சுக்கிரன் பிரபல யோகாதிபதியாக வருவதால், எது நடந்தாலும் அது நல்லதில் முடியும். 

14 வயதிலிருந்து 31 வரை ராகு தசை நடைபெறும். சந்திரனுடைய நட்சத்திரத்தில் ராகு தசை வருகிறது. புத்தியில் ஆழமும், அகலமும் இருக்கும். ஆனால், பத்தாம் வகுப்பு படிக்கும்போது ‘எப்போது பள்ளி வாழ்க்கை முடியும்’ என்கிற அளவுக்கு பிரச்னைகளில் சிக்குவார்கள். புற்றுள்ள அம்மனை வேண்டினால் பிரச்னை கரையும். 12ம் வகுப்பில் பொறுப்பு வந்துவிடும். இவையெல்லாமே அவரவர் சொந்த ஜாதகத்தில் ராகுவின் நிலையை வைத்தும் நடக்கும். எலெக்ட்ரானிக்ஸ், ஏரோநாட்டிகல், விஸ்காம், ஃபேஷன் டெக்னாலஜி, பிரின்டிங் டெக்னாலஜி, சோஷியாலஜி, சைக்காலஜி போன்றவற்றில் நல்ல எதிர்காலம் உண்டு. மருத்துவத் துறையில் நியூராலஜிஸ்ட், முதுகுத் தண்டுவடம் சார்ந்த துறைகளில் வெகு எளிதாக நிபுணராகும் வாய்ப்பு உண்டு. 

மூன்றாம் பாதத்தை மிதுன புதன் ஆள்வதால் புத்தியில் தீட்சண்யம் அதிகமாக இருக்கும். கிட்டத்தட்ட 4 வயது வரைதான் சந்திர தசை நடக்கும். 5 வயதிலிருந்து 11 வரை செவ்வாய் தசை இருப்பதால் தாழ்வு மனப்பான்மை தலை தூக்கும். பிறரோடு ஒப்பிட்டு இவர்களைப் பேசக்கூடாது. ஏதேனும் ஒரு சப்ஜெக்ட்டில்தான் கவனம் செலுத்துவார்கள். சிலர் அடிக்கடி பள்ளி மாறிக் கொண்டேயிருப்பார்கள். 12 வயதிலிருந்து 29 வரை ராகு தசை நடக்கும்போது, அபரிமிதமான படைப்பாற்றல் வெளிப்படும். கல்லூரியில் இவர்கள் ஆராய்ச்சி படிப்புகளைத் தேர்ந்தெடுப்பது நல்லது. 

30 வயதிலிருந்து 45 வரை குருவின் அருளால் புத்தியில் தெளிவும் செம்மையும் கூடும். பாதத்திற்கு அதிபதியாக புதன் வருவதால் புள்ளியியல், சி.ஏ, சட்டம், எம்.பி.ஏ. கம்பெனி நிர்வாகம் சார்ந்த படிப்புகள் எல்லாமுமே ஏற்றவை. உளவியலும் சிறந்ததாகும். மருத்துவத்தில் இ.என்.டி, நரம்பு, வயிறு, ஜெனிடிக்ஸ் துறைகளில் தனித்துவம் பெற முடியும். நான்காம் பாதத்தில் பிறந்தவர்களை சந்திரன் ஆள்கிறார். நட்சத்திர அதிபதியும் சந்திரனாக வருவதால் சந்திரனின் இரட்டிப்புத் திறன் இவர்களிடம் செயல்படும். சந்திரன் அழகைத் தருவார்; அதேநேரம் உணர்ச்சிப் பிழம்பாகவும் இருப்பார்கள். 1 வயதிலிருந்து 8 வரை செவ்வாய் தசை நடக்கும். சிறிய வயதில் பெற்றோர்களுக்கும் சரி, இவர்களுக்கும் பெரிய கஷ்டமெல்லாம் இருக்காது. 

9 வயதிலிருந்து 24 வரை ராகு தசை நடக்கும். பாதத்தின் அதிபதியான சந்திரனை ராகு கவ்வும். அதனால் சிறிய விஷயத்திற்கும் பெரிதாகக் குழம்புவார்கள். கொஞ்சம் தடுமாறி நிமிர்வார்கள். ராகு தசை நடைபெறுவதால் திடீரென்று 90 மார்க் எடுப்பார்; அடுத்த தடவை நாற்பதுதான் வரும். இப்படி ஏற்ற இறக்கங்கள் இருக்கத்தான் செய்யும். ஆனால், ஏதேனும் ஒரு சப்ஜெக்ட்டில் எப்போதுமே முதல் மாணவராக வருவார்கள். ஓரளவு நல்ல மதிப்பெண்களை எடுத்து 12ம் வகுப்பில் தேறுவார்கள். மாஸ் கம்யூனிகேஷன், மெரைன், ஆங்கில இலக்கியம், சட்டம், ஃபேஷன் டெக்னாலஜி என்று திட்டமிட்டு படித்தால் போதும். மருத்துவத்துறையில் பிளாஸ்டிக் சர்ஜரி படிக்க, நிபுணத்துவம் நிச்சயம். 

திருவோணக்காரர்களின் வாக்குக்கு அதிபதியாக சனி வருகிறது. எனவே பெருமாளை வணங்கினால் போதுமானது. அதிலும் ஊத்துக்காடு காளிங்கநர்த்தன கிருஷ்ணரை வணங்க, கல்வித் திறன் மேம்படும். கும்பகோணத்திலிருந்து 15 கி.மீ. தொலைவில் இத்தலம் அமைந்துள்ளது. அவிட்ட நட்சத்திரத்தின் முதல் இரண்டு பாதங்கள் மகர ராசியிலும், 3, 4 பாதங்கள் கும்ப ராசியிலும் இடம்பெறுகின்றன. ‘தவிட்டுப்பானையும் தங்கமாகும்’ அளவிற்கு கைராசி உள்ளவர்கள். அவிட்டம் நட்சத்திரத்தின் ராசியாதிபதி சனி; நட்சத்திர அதிபதி செவ்வாய்.

முதல் பாதத்தை அதன் அதிபதியான சூரியன், இவர்களோடு சேர்ந்து ஆட்சி செய்கிறார். மூவரும் தன்னளவில் அரசர்கள்; ஒன்றையொன்று விஞ்சி செயல்படுவார்கள். ஆறு வயது வரை செவ்வாய் தசை நடக்கும்போது உடல் பலம் அதிகம் இருக்கும். இந்த தசை சாதாரணமாக செல்லும். ஆனால், 7 வயதிலிருந்து 24 வரை ராகு தசை நடக்கும்போதுதான் குடும்பச் சூழ்நிலையால் படிப்பில் கவனம் சிதறும். ராகு பாதி கெடுக்கும்; பாதி கொடுக்கும். 16 வயது வரை கொஞ்சம் சிரமப்படுத்தி அதற்குப் பிறகு கொடுக்கும்.

அதாவது பத்தாம் வகுப்பில் கைவிட்ட ராகு, பன்னிரெண்டாம் வகுப்பில் நல்ல மதிப்பெண்கள் வாங்க வைப்பார். 24 வயதுக்குள் மற்ற எல்லோரையும் விட முதிர்ச்சியுள்ளவர்களாக இருப்பார்கள். கல்லூரியில் சொல்லி வைத்தாற்போல படிப்பை தேர்ந்தெடுத்துப் படிப்பார்கள். பொலிட்டிகல் சயின்ஸ், எம்.பி.ஏ. படிப்பில் ஹெச்.ஆர்., அஸ்ட்ரானமி, பயோ மெடிக்கல் ஜெனிடிக்ஸ், மைக்ரோ பயாலஜி போன்ற படிப்புகள் நல்ல எதிர்காலத்தை தரும். மருத்துவத்தில் தலை, மயக்க மருந்தியல் படிப்புகளில் சிறப்பான எதிர்காலம் உண்டு. 

இரண்டாம் பாதத்தில் பிறந்தவர்களை செவ்வாய், சனி, புதன் கிரகங்கள் ஆள்வதால், சிறிய வயதில் ஏமாளியாக இருந்து பிறகு சமாளித்துக் கொள்வார்கள். 5 வயதிலிருந்து 22 வரை ராகு தசை நடைபெறும்போது வகுப்பில் இவர்களுக்கென்று தனி அடையாளம் இருக்கும். கல்லூரி முடியும் வரை படிப்பு விஷயத்தில் எந்த தொந்தரவும் இருக்காது. புதன் ஆதிக்கம் மிகுந்திருப்பதால், மற்றவர்களிடமிருந்து தங்களை வித்தியாசப்படுத்திக் காட்டுவார்கள். 23 வயதிலிருந்து 38 வரை குரு தசை நடைபெறும். ஏழாம் வகுப்பில் படிப்பு கொஞ்சம் தடைபடும்; ஆனால், 12ம் வகுப்பில் நல்ல மதிப்பெண்கள் எடுப்பார்கள். 

கிரிமினாலஜி, சைபர் கிரைம் சம்பந்தமாக படிப்பது, இவர்களுக்குள் இருக்கும் சி.ஐ.டியை வெளிக்கொண்டு வரும். ரீடெயில் மார்க்கெட்டிங், அக்கவுன்டன்ஸி, விஸ்காம், பேங்கிங் சம்பந்தமான படிப்புகளும் நல்ல எதிர்காலம் தரும். மருத்துவம் எனில் நரம்பு, வயிறு, கண், செக்ஸ் சார்ந்த மருத்துவம் பெரிய அளவில் புகழ் தரும். எலெக்ட்ரானிக்ஸை விட எலெக்ட்ரிகல் நல்லது. அவிட்டம் மூன்றாம் பாதத்தின் அதிபதியாக சுக்கிரன் வருகிறார். இரண்டரை வருடம் வரை செவ்வாய் தசை நடைபெறும். 3 வயது முதல் 20 வரை ராகு தசை இருப்பதால் தாய், தந்தையின் வளர்ச்சி சட்டென்று மேலேறும். ராகு தசையின் ஆரம்பத்தில் ஏனோதானோ என்று இருந்தாலும், பிற்பகுதியில் நன்றாகப் படிப்பார்கள். 

கல்லூரியில் எல்லோரையும் திரும்பிப் பார்க்க வைப்பார்கள். எட்டாம் வகுப்பில் மட்டும் படிப்பில் கொஞ்சம் கவனம் சிதறும். 20 வயதில் ஏராளமான திறமைகளோடு வலம் வருவார்கள். தத்துவம், தாவரவியல், எலெக்ட்ரானிக்ஸ் அண்ட் கம்யூனிகேஷன், விஸ்காம், ஆர்க்கிடெக்ட், ஃபேஷன் டெக்னாலஜி, சி.ஏ., எக்னாமிக்ஸ், டி.எப்.டி. போன்ற படிப்புகள் எளிதாக வெற்றி பெறச் செய்யும். சிறந்த சர்க்கரை நோய் நிபுணராகவும், பிளாஸ்டிக் சர்ஜரி, கால்நடை மருத்துவராகவும் வர வாய்ப்புள்ளது. 

அவிட்டம் 4ம் பாதத்தின் அதிபதி செவ்வாய். ராசியாதிபதி சனி. நட்சத்திர அதிபதியும் செவ்வாயே வருகிறது. செவ்வாய் இரண்டு மடங்கு சக்தியோடு இருப்பார். ஒரு வயது வரை செவ்வாய் தசை இருக்கும். 2 வயதிலிருந்து 19 வரை ராகு தசை இருக்கும். 4 வயதில் பாலாரிஷ்டம் என்று சொல்வதுபோல் உடம்பு படுத்தும். பொதுவாக ராகுதசை நன்றாகத்தான் இருக்கும். ஓட்டப்பந்தயம், கால்பந்து போன்றவற்றில் மாநில, தேசிய அளவில் வருவதற்கு வாய்ப்புகள் அதிகமுண்டு. பள்ளிப் பருவத்திலேயே குழு அமைத்து எல்லாப் போட்டிகளிலும் பங்கெடுப்பார்கள். 

பள்ளிப் படிப்பை சிலர் கொஞ்சம் தடையோடுதான் முடிப்பார்கள். 20 வயதிலிருந்து 35 வரை குரு தசை நடைபெறும். இரட்டைச் சக்தியோடு விளங்கும் செவ்வாய்க்கு குரு எப்போதும் நண்பர்தான். பள்ளிகளில் கொஞ்சம் தளரவிட்ட படிப்பை கல்லூரியில் பிடித்து விடுவார்கள். பொருளாதாரம், அக்கவுண்டன்ஸி, மைக்ரோ பயாலஜி, கெமிக்கல், ஆட்டோமொபைல், எலெக்ட்ரிகல் போன்றவை வளம் தரும். மருத்துவத்துறையில் ஆர்த்தோ, லேப் டெக்னாலஜி, பிசியோதெரபியை மறக்க வேண்டாம். அதற்கு செவ்வாய் நிச்சயம் உதவுவார்.

இந்த நட்சத்திரக்காரர்கள் சற்று உக்கிரமான பெருமாளை தரிசிக்க வேண்டும். அப்படிப்பட்ட தலமான சிங்கப் பெருமாள் கோயிலில் அருளும் பாடலாத்ரி நரசிம்மரை தரிசித்தல் நல்லது. இங்கு நரசிம்மருக்கு ஈசனைப் போன்று நெற்றிக் கண் உண்டு. இவரை தரிசிக்க, கல்வித் திறன் நிச்சயம் கூடும். இக்கோயில் சென்னை - செங்கல்பட்டு தேசிய நெடுஞ்சாலையில் செங்கல்பட்டிற்கு அருகேயே உள்ளது
கும்ப ராசியில், ராகுவின் ஆதிக்கத்தில் வரும் வலுவான நட்சத்திரம் சதயம். இந்த நட்சத்திரத்தில் பிறந்தவர்கள் எதையுமே எளிதில் நம்ப மாட்டார்கள். பள்ளியை விட வாழ்க்கை அனுபவங்களில் அதிகம் படிப்பார்கள்.

முதல் பாதத்தின் அதிபதியாக தனுசு குரு வருகிறார். நட்சத்திர நாயகனான ராகுவும், கும்ப ராசியின் அதிபதியான சனியும் இவர்களை ஆட்சி செய்வார்கள். ஏறக்குறைய 15 வயது வரை ராகு தசை நடக்கும். எதையும் நுணுக்கமாகத் தெரிந்து கொள்வார்கள். மனப்பாடம் செய்து ஒப்பிப்பதில் இவர்களுக்கு நம்பிக்கை இருக்காது. படித்ததற்கு வித்தியாசமாக பதில் எழுதுவார்கள். எல்லோருக்கும் தெரிந்த விஷயத்தைவிட, யாருக்கும் தெரியாத விஷயத்தில்தான் ஆர்வம் காட்டுவார்கள். எட்டாம் வகுப்பு வரை சுமாராகப் படிப்பார்கள். அதன்பிறகுதான் இவர்களின் பலம் இவர்களுக்கே புரிய வரும். ஓட்டப்பந்தயம், கால்பந்து என மைதானங்களிலும் முதன்மை பெறுவார்கள். 16 வயதிலிருந்து 31 வரை குரு தசை வரும்போது இன்னும் வலிமையாக இருப்பார்கள். தொழிலுக்கு ஒரு கல்வி, ஆர்வத்திற்கு ஒரு படிப்பு என்று பிரித்து வைத்துக் கொண்டு படிப்பார்கள். ஆங்கில இலக்கியம், உலக மொழிகளை அறிந்து கொள்ளுதல் என்றிருப்பார்கள். ராகுவின் ஆதிக்கம் அதிகமாக உள்ளதால் ஆராய்ச்சிக் கல்வியை விரும்புவார்கள். சட்டம், ஆசிரியர் கல்வி, சி.ஏ., அனிமேஷன், ஆர்க்கிடெக்ட் போன்றவை ஏற்றம் தருவதாக அமையும்.

இரண்டாம் பாதத்தை மகரச் சனி ஆட்சி செய்யும். என்ன தவறு செய்தாலும் அதை நியாயப்படுத்துவார்கள். ஏறக்குறைய 12 வயது வரை ராகு தசை நடைபெறும். 4 வயது வரை மெல்லிய தேகத்தோடு இருப்பார்கள். அதன்பிறகுதான் முகம் தெளியும். மொழிப் பாடத்திலும், கணக்கிலும் அதிக மதிப்பெண்கள் எடுப்பார்கள். புரியவில்லை என்றால் ஆசிரியரைக் கேட்கத் தயங்க மாட்டார்கள். சனியினுடைய முழு ஆதிக்கமும் இவர்களிடத்தில் செயல்படும். ஐந்தாம் வகுப்பிலிருந்து வரலாற்றுப் பாடத்தின் மீது தனிக் கவனம் செலுத்துவார்கள். வகுப்பறை ஒழுக்கத்திற்கு அதிக முக்கியத்துவம் தருவார்கள். 13 வயதிலிருந்து 27 வரை குரு தசை வரும்போது எது முக்கியம், எதை முதலில் செய்ய வேண்டும் என்கிற தெளிவு தோன்றும். பொதுவாகவே குரு தசையில் நன்றாகப் படித்து விடுவார்கள். நல்ல நேரமே கிட்டத்தட்ட அப்போதுதான் துவங்கும். எரி நட்சத்திரம், செயற்கைக்கோள் என்று ஆர்வமாகப் படிப்பார்கள். விண்வெளித் துறை, கனிம வளங்கள், மண்ணியல், புவியியல், மருத்துவத்தில் ஆர்த்தோ, சரும நோய் போன்ற துறைகள் எனில் சிறப்பாக வருவார்கள். 

மூன்றாம் பாத அன்பர்களின் அதிபதியாக கும்பச் சனி வருகிறார். இந்த பாதத்தில் மட்டும் கும்பச் சனியின் சக்தி இரட்டிப்பாக செயல்படும். ஏறக்குறைய 7 வயது வரை ராகு தசை நடக்கும். ஏதேனும் ஒரு காரணத்தினால் தாய், தந்தையரை விட்டுப் பிரிந்து படிக்க வேண்டியிருக்கும். 8 வயதிலிருந்து 23 வரை குரு தசை நடைபெறும். குரு லாபாதிபதியாகவும், குடும்ப ஸ்தானத்திற்கு அதிபதியாகவும் வருவதால் பிரிந்த குடும்பம், சொந்த பந்தங்கள் ஒன்று சேருவார்கள். கூடா நட்புகள் வந்தால் உடனே விலக்கவும். இல்லையெனில் போதைப் பழக்கத்திற்கு அடிமையாகும் சூழல் வரும். கொஞ்சம் மறதியால் அவஸ்தைப்படுவார்கள். பெற்றோர் கொஞ்சம் கூடுதலாகக் கண்காணிப்பது நல்லது. இந்த தசையில் முதல் வருஷ கல்லூரிப் படிப்பில் அரியர்ஸ் வைத்து மூன்றாம் வருடத்தில் முடிப்பார்கள். 24 வயதிலிருந்து 42 வரை சனிமகா தசை நடக்கும்போது சட்டென்று தவறுகளிலிருந்து வெளியே வருவார்கள். கால்நடை மருத்துவம், விலங்கியல், தாவரவியல், மருத்துவத்தில் எலும்பு, மயக்க மருந்து நிபுணர் போன்றவை எனில் நல்லது. தமிழ் அல்லது ஆங்கில இலக்கியத்தில் மிகுந்த ஈடுபாடு காட்டுவார்கள்.

நான்காம் பாதத்திற்கு அதிபதியாக மீன குரு வருகிறார். 1ம் பாதத்தை விட அதிர்ஷ்டக் காற்று கொஞ்சம் கூடுதலாகவே அடிக்கும். மரபு சார்ந்த விஷயங்கள், வேத வேதாந்தங்களில் ஆராய்ச்சி செய்வார்கள். 4 வயது வரை ராகு தசை நடக்கும். ராகு இவர்களுக்கு யோக ராகுவாக மாறுவார். 5 வயதிலிருந்து 20 வரை குரு தசை வரும்போது கல்லூரி வாழ்க்கை ரம்மியமாக நகரும். பெரும்பாலும் இந்த பாதத்தில் பிறந்தவர்களின் பெற்றோர் செல்வ வளத்திலும் சிறந்து விளங்குவர். பள்ளியிறுதியிலேயே ஐ.ஏ.எஸ்., ஐ.பி.எஸ். என்று இலக்கை நிர்ணயித்துக்கொண்டு படிப்பார்கள். 21 வயதிலிருந்து 39 வரை சனி தசை நடக்கும்போது கொஞ்சம் தடுமாற்றம் இருக்கும். அலுவலக நிர்வாக சார்ந்த படிப்புகள், எஞ்சினியரிங்கில் ஐ.டி., கெமிக்கல் போன்றவை ஏற்றது. மருத்துவத்தில் வயிறு, சிறுநீரகம் சம்பந்தமான துறைகளில் நிபுணராக விளங்கும் வாய்ப்பு அதிகமுண்டு. குருவின் பூரண ஆதிக்கம் இருப்பதால் தத்துவம், உளவியல் எடுத்துப் படிக்கும்போது சமூகத்தில் அடையாளம் காணப்படும் அளவுக்கு சாதிப்பார்கள்.

சதயத்தில் பிறந்தவர்களின் ராசியாதிபதியாக கும்பச் சனியும், நட்சத்திர அதிபதியாக ராகுவும் வருகிறார்கள். பொதுவாகவே இவர்கள் பெருமாளை வணங்குவது நல்லது. அதிலும் உபதேசப் பெருமாளாக இருப்பின் நல்லது. அப்படிப்பட்டவரே நாச்சியார்கோயில் ஸ்ரீநிவாசப் பெருமாள் ஆவார். இத்தலத்தில்தான் திருமங்கையாழ்வாருக்கு பஞ்ச சம்ஸ்காரங்கள் எனும் தீட்சைகளைக் கொடுத்தார். இங்கு வழிபட, நிச்சயம் கல்வித் திறன் கூடும். கும்பகோணத்திலிருந்து 15 கி.மீ. தொலைவில் இக்கோயில் அமைந்துள்ளது. 

பூரட்டாதி நட்சத்திரத்தின் முதல் மூன்று பாதங்கள் கும்ப ராசியில் அடங்குகின்றன. நான்காவது பாதம் மீன ராசியில் இடம் பெறுகிறது. இந்த நட்சத்திரத்திற்கு அதிபதி குரு பகவான் ஆவார். அதனால், ஆழமாக இருப்பார்கள். எதற்கும் அலட்டிக்கொள்ள மாட்டார்கள்.

முதல் பாதத்தின் அதிபதியாக மேஷச் செவ்வாயும், நட்சத்திர அதிபதியாக குருவும், ராசியாதிபதியாக சனியும் வருகிறார்கள். ஏறக்குறைய 14 வயது வரை குரு தசை இருக்கும். நட்சத்திர நாதனான குருவும், பாதத்தின் அதிபதியான செவ்வாயும் நண்பர்கள். எனவே சிறிய வயதிலேயே பொறுப்பாக இருப்பார்கள். சில மகான்களின் பார்வை படும். எட்டாம் வகுப்பு வரையிலும் நன்றாக நகரும் வாழ்க்கை, அதன்பிறகு கொஞ்சம் தடுமாறும். 15 வயதிலிருந்து 32 வரை சனி தசை நடக்கும். ராசிநாதனின் தசையாக இருப்பதால், ஓரளவு நன்றாக ஓடும். எதிலும் தொடக்கச் சிரமங்கள் அதிகமிருக்கும். இந்த தசை பாதி கொடுக்கும்; பாதி கெடுக்கும்படியாக அமையும். அரியர்ஸ் வைத்துத்தான் பாஸ் செய்யும்படியாக இருக்கும். 25 வயதிலிருந்து ஏற்றம்தான். காவல்துறை, ராணுவம், விமானப்படை என சிலர் போவார்கள். எஞ்சினியரிங்கில் எலெக்ட்ரிகல் அண்ட் எலெக்டானிக்ஸ், கெமிக்கல் படிப்புகள் முன்னேற்றத்தைக் கொடுக்கும். பி.பார்ம், கெமிஸ்ட்ரி, மைக்ரோ பயாலஜி, ஜெனடிக் எஞ்சினியரிங் போன்றவையும் எதிர்காலம் தரும். 

இரண்டாம் பாதத்தை சுக்கிரன் ஆள்வதால் வசீகரமும், கண்களில் காந்தப் பார்வையும் இருக்கும். ஏறக்குறைய 10 வருடம் குரு தசை நடக்கும். குருவும் சுக்கிரனும் சேர்ந்திருப்பதால் மந்திரமும் தெரியும்; தந்திரமும் தெரியும். 10 வயது வரை குரு தசை நடக்கும். சனியும், பாதத்தின் அதிபதியான சுக்கிரனும் நெருங்கிய நண்பர்கள். கும்பச் சனியின் மந்த புத்தி, காலம் தாழ்த்துதல் இவற்றை சுக்கிரன் அழித்து விடுவார். அதனால், முதல் பாதம் போல் இரண்டாம் பாதம் இருக்காது. அழகும் அறிவும் பொருந்தியவராக இருப்பார்கள். படிப்பில் படு சுட்டியாக விளங்குவார்கள். எந்தப் படிப்பிற்கு எதிர்காலம் என புரிந்து படிப்பார்கள். 11 வயதிலிருந்து 29 வயது வரை சனி தசை நடைபெறும். பிறவிக் கலைஞன் என்பதுபோல பெயரெடுப்பார்கள். பாடங்களில் கவனம் குறையும். ஆனாலும், படிப்பை விடமாட்டார்கள். திரைத்துறை சார்பான தொழில்நுட்பக் கல்வியை இவர்கள் தாராளமாகப் படிக்கலாம். விஸ்காம், ஃபேஷன் டெக்னாலஜி, ஆட்டோமொபைல் எஞ்சினியரிங் போன்றவை சிறந்தது. இசை பயின்றால் நிச்சயம் சமூகத்தில் பெரிய அங்கீகாரம் கிடைக்கும்.

மூன்றாம் பாதத்தின் அதிபதியாக புதன் வருகிறார். ராசியாதிபதியான சனிக்கு புதன் நட்பாகும். நட்சத்திரத் தலைவர் குரு என்பதைப் பார்த்தோம். இந்தக் கூட்டணியால் இவர்கள் நிறைகுடமாக இருப்பார்கள். ஏறக்குறைய 6 வயது வரை குரு தசை நடப்பதால், ப்ரைமரி காம்ப்ளக்ஸ் வந்து நீங்கும். 7 வயதிலிருந்து 25 வரை சனி தசை நடக்கும். சட்டென்று ஒரு மாற்றம் ஏற்படும். சிறிய வயதிலேயே ஆராய்ச்சி மனப்பான்மை இருக்கும். ஆசிரியருக்கே பல விஷயங்களை விளக்குவார்கள். படிப்பு, படித்ததை சொல்லிக் கொடுப்பது... என்று வாழ்க்கை நகரும். நினைவாற்றல் மிகுதியாக இருக்கும். கல்லூரி முடிந்தவுடன் வெளிநாடுகளுக்கு ஆராய்ச்சிக்குச் செல்வோர் அதிகமுண்டு. 26 வயதிலிருந்து 42 வரை புதன் தசை நடைபெறும்போது அந்தஸ்து உயரும். புள்ளியியல், சட்டம், அக்கவுன்ட்ஸ், பொலிடிகல் சயின்ஸ், சி.ஏ., ஆர்க்கிடெக்ட், அனிமேஷன், கேட்டரிங் டெக்னாலஜி போன்றவை நல்ல எதிர்காலம் தரும். 

கும்ப ராசியில் தனது மூன்று பாதங்களைப் பதித்த பூரட்டாதி நட்சத்திரம், கொஞ்சம் எட்டி தனது பக்கத்து வீடான மீன ராசியில் நான்காம் பாதத்தைப் பதிக்கிறது. மீன ராசியிலேயே குருவினுடைய நட்சத்திரத்தை உடையது இந்த நட்சத்திரம்தான். பாதத்தின் அதிபதியாக சந்திரன் வருவதால் அளவு கடந்த கற்பனை வளம் இருக்கும். ஏறக்குறைய 3 வயது வரை குரு தசை இருக்கும். 4 வயதிலிருந்து 22 வரை சனி தசை நடைபெறும். வியக்க வைக்கும் பொறுப்புணர்வு இவர்களுக்கு இருக்கும். புத்தகத்தின் அட்டையைக்கூட கிழிக்காது பத்திரமாக வைத்துக்கொள்வோர் இந்த பாதத்தில் அதிகம். எல்லாவற்றிலுமே சிஸ்டமேட்டிக்காக நடந்து கொள்வார்கள். முதலிடத்துக்கு நெருக்கமாகவே மதிப்பெண் எடுப்பார்கள். இந்த தசையில் அதிக நேரம் தனிமை, நிறைய படிப்பு என்று வாழ்க்கை நகரும். ஃபேஷன் டெக்னாலஜி, எம்.பி.ஏ. படிப்பில் பைனான்ஸ், மெரைன் எஞ்சினியரிங், மருத்துவத்தில் இ.என்.டி., மனநோய் மருத்துவம் போன்றவை படித்தால் நிச்சயம் ஏற்றம் உண்டு. 

சந்திரனின் சக்தியும், குருவின் இரட்டிப்பு அருளும் ஒன்று சேர்ந்த அமைப்பை பூரட்டாதி காட்டுகிறது. வடலூர் ராமலிங்க அடிகளாரின் சத்திய ஞானசபையை தரிசித்தால் இவர்களுக்கு கல்வி வளம் பெருகும். அருட்பெருஞ்ஜோதியாக இறைவன் இருக்கும் தத்துவத்தை வள்ளலார் எடுத்துரைத்தார். மேலும், குரு என்கிற தத்துவமும், சந்திரனின் ஒளி எனும் தத்துவமும் இணைந்திருக்கும் அமைப்பை இது காட்டுகிறது. வள்ளலாரின் சத்திய ஞானசபைக்குச் சென்று திருவருட்பாவை படிக்க, கல்வியில் ஏற்றம் கிடைக்கும். பண்ருட்டி - கும்பகோணம் சாலையில் இருக்கிறது வடலூர்.
உத்திரட்டாதியில் பிறந்தவர்கள், வாழ்க்கையின் இருவேறு துருவங்களையும் பால்யத்திலேயே பார்த்து விடுவதால் பக்குவம் பெற்றவர்களாக இருப்பார்கள். இந்த நட்சத்திரத்தை குருவும் சனியும் சேர்ந்து ஆட்சி செய்கின்றன. வாக்கு வன்மை உள்ளவர்களாக இவர்கள் விளங்குவார்கள். முதல் பாதத்தில் பிறந்தவர்களை சூரியன் ஆட்சி செய்கிறார். கறாராகப் பேசும் இவர்களை, நீக்கு போக்கு தெரியாதவர்கள் என சிறிய வயதிலேயே சொல்வார்கள். பிறந்தவுடனே நடைபெறும் சனி தசை சவாலாகவே இருக்கும். அதன்பிறகும் 17 வயது வரை சவாலாகத்தான் இருக்கும். வேலை மாற்றத்தால் தந்தையை அலைய வைக்கும். இதனால் பள்ளி மாறிப் படிக்க நேரும். படிப்பில் பெற்றோருக்கு பெரிய நம்பிக்கையை ஏற்படுத்தி விட்டு, பத்தாம் வகுப்பில் சுமாரான மதிப்பெண் பெறுவார்கள். அறிவியல், ஆங்கிலம் இரண்டிலும் எப்போதும் நல்ல மதிப்பெண்கள் எடுப்பார்கள்.

18 வயதிலிருந்து வாழ்க்கை அப்படியே மாறும். 34 வயது வரை புதன் தசை நடைபெறும். சனி தசையின் கஷ்டங்கள் இதில் இருக்காது. யாரும் அவ்வளவு எளிதில் விரும்பாத துறையைத் தேர்ந்தெடுத்துப் படித்து ஜெயிப்பார்கள். ஆங்கில இலக்கியம், பொலிடிகல் சயின்ஸ், வரலாறு, சட்டம் போன்ற படிப்புகளைத் தேர்ந்தெடுத்தால் பேராசிரியராகும் வாய்ப்புண்டு. எம்.பி.ஏவில் ஹெச்.ஆர், ஏரோநாட்டிகல் எஞ்சினியரிங், மருத்துவத்தில் கண், நரம்பு ஆகிய துறைகள் ஏற்றம் தரும். இரண்டாம் பாதத்தில் பிறந்தவர்களை புதன் ஆள்கிறார். கல்வி இவர்களுக்கு இளமையிலேயே வருமானம் தரும். பள்ளிக் காலத்திலேயே டியூஷன் எடுத்து சம்பாதிப்பவரும் உண்டு. 13 வயது வரை சனி தசை இருக்கும். 

சிறிய வயதிலிருந்தே உறவினர்கள், குடும்பத்தினரிடமிருந்து வித்தியாசப்படுவார்கள். விஷய ஞானம் உள்ளவர்கள்தான் தன்னுடன் பழக முடியும் என்பதாக மற்றவர்களை நினைக்க வைப்பார்கள். ஆசிரியர் போர்டில் கணக்கை எழுதும்போதே விடையை நோட்டில் போட்டு விடுவார்கள். 14 வயதிலிருந்து 30 வரை புதன் தசை நடக்கும்போது படிப்பில் கவனம் தேவை. சிலருக்கு போதைப் பழக்கம், கூடா நட்பு என்று வரும். ஜாக்கிரதையாக இருக்க வேண்டும். முதல் பாதம் அளவுக்குக் கஷ்டங்கள் இருக்காது. ஏனெனில் சனியும், புதனும் இணைந்து செயல்படும்போது ஒருவிதமான அனுசரிப்பு இருக்கும். இவர்களில் பலர் ஆடிட்டிங், அக்கவுன்ட்ஸ் துறைகளில் பிரகாசமடைகிறார்கள். பி.இ. கெமிக்கல், புள்ளியியல், எக்கனாமிக்ஸ் படிப்பிலும் நிபுணத்துவம் பெறலாம். மரைன் எஞ்சினியரிங், கேட்டரிங் டெக்னாலஜி படிப்பிற்கும் முயற்சிக்கலாம். 

மூன்றாம் பாதத்திற்கு அதிபதியாக சுக்கிரன் வருகிறார். கிட்டத்தட்ட 8 வயது வரை சனி தசை நடைபெறும். 3 வயது முதல் 5 வரை வீசிங், ஈஸ்னோபீலியா போன்ற தொந்தரவுகள் வந்து நீங்கும். விரும்பும் கோர்ஸிலேயே இவர்களைப் படிக்க வைப்பது நல்லது. 9 வயதிலிருந்து 25 வரை புதன் தசை நன்றாக இருக்கும். தன்னம்பிக்கை அதிகமிருந்தாலும், அலட்சியமும் கூடவே இருக்கும். சுக்கிரன் பாதத்திற்கு அதிபதியாக வருவதால் பெரிய இழப்புகளோ ஏமாற்றங்களோ இருக்காது. சம்பாதிக்க ஒன்று, ஆர்வத்திற்கென்று ஒன்று எனப் பிரித்து வைத்துப் படிப்பார்கள். இதை பள்ளியிறுதியிலேயே தெளிவாக முடிவெடுத்து விடுவார்கள். பி.இ. படித்து விட்டு அப்படியே கலைத்துறைக்கு தாவுவார்கள். ‘என்னால் அதுவும் முடியும், இதுவும் முடியும்’ என்பார்கள். 
ஃபேஷன் டெக்னாலஜி, கேட்டரிங் டெக்னாலஜி, விஸ்காம் போன்ற படிப்புகள் இவர்களுக்கு ஏற்றவை. தாவரவியல், விலங்கியல், ஏரோநாட்டிகல் எஞ்சினியரிங், ஆட்டோமொபைல் எஞ்சினியரிங், எலெக்ட்ரானிக்ஸ் என்று படித்தால் நல்லது. நான்காம் பாதத்தில் பிறந்தவர்கள் செவ்வாயின் ஆதிக்கத்தில் வருவார்கள். சிறுவயதிலிருந்தே யாரையும் சார்ந்திருப்பது பிடிக்காது. படிப்பைவிட விளையாட்டிற்குத்தான் முக்கியத்துவம் தருவார்கள். பதக்கங்களும் வெல்வார்கள். 4 வயது வரை சனி தசை நடைபெறும். 5 வயதிலிருந்து 21 வரை புதன் தசை நடைபெறுகிறபோது வம்பு தும்பெல்லாம் தேடிவரும். இதனால் படிப்பில் கவனம் செல்லாது. நட்பு வட்டத்தை கவனிக்க வேண்டும். கொஞ்சம் எமோஷனலாக இருப்பார்கள். கல்லூரியில் சட்டத்தைக் கையில் எடுத்துக் கொள்ளும் அளவுக்கு வளர்வார்கள். 

22 வயதிலிருந்து 28 வரை நடைபெறும் கேது தசையின்போதுதான் கொஞ்சம் விழிப்படைவார்கள். பள்ளியில் சாதாரணமாகப் படித்தாலும், கல்லூரி என்று வரும்போது கெமிஸ்ட்ரி, புவியியல், மண்ணியல், விலங்கியல் போன்ற படிப்புகள் சாதகமாக இருக்கும். எஞ்சினியரிங்கில் எலெக்ட்ரிகல் அண்ட் எலெக்ட்ரானிக்ஸ், ஐ.டி. என்று படித்தால் வெற்றி பெறுவார்கள். இவர்களில் பலர் ராணுவம் அல்லது காவல்துறை வேலைக்குச் செல்வார்கள். பைலட்டாக விரும்பினால், அதற்கான முயற்சியும் செய்யலாம். குருவும் சனியும் சேர்ந்திருப்பதால் நல்லது கெட்டதுகளில் உழன்று உழன்று புடமிட்ட தங்கமாக வாழ்க்கை மாறியிருக்கும். குருவோடு சனி சேர்ந்திருப்பதால் தேடித் திரிந்து ஆராய்ந்து அறிவதில் ஆர்வம் அதிகரிக்கும். 

மேலும், கல்வியைத் தரும் வாக்கிற்கு உரியவராக செவ்வாய் வருகிறார். எனவே முருகனை வழிபடுவது சிறப்பான பலன் தரும். அதிலும் திருவிடைக்கழி முருகனை வழிபட்டால் நிச்சயம் கல்விச் செல்வத்தை நிறைந்து அளிப்பார். சிதம்பரம் - நாகப்பட்டினம் நெடுஞ்சாலையில் திருக்கடையூர் தலத்திலிருந்து தென்மேற்கில் 6 கி.மீ தொலைவில் உள்ளது இந்தத் தலம். மயிலாடுதுறையிலிருந்து சங்கரன்பந்தல் வழியில் 4 கி.மீ தொலைவில் உள்ளது. இருபத்தேழு நட்சத்திரங்களிலேயே விளையாட்டுத்தனம் மிகுந்த நட்சத்திரம் ரேவதி. திட்டமிடும் கிரகமான புதனே ரேவதியை ஆட்சி செய்கிறது. முதல் பாதத்தை தனுசு குரு ஆட்சி செய்கிறார். ராசியாதிபதியாக மீன குருவும், நட்சத்திர அதிபதியாக புதனும் வருகிறார்கள். ஏறக்குறைய 14 வயது வரை புதன் தசை நடக்கும். 

புதன் நரம்புகளுக்கு உரியவனாக இருப்பதால், இந்த தசை நடக்கும்போது குழந்தைகளுக்கு நரம்புக் கோளாறு வந்து நீங்கும். பள்ளிப் பருவத்திலேயே கவிதை, கட்டுரை என்று எழுதுவார்கள். குழந்தையின் மழலைத்தனம் 14 வயது வரை இருக்கும். 15 வயதிலிருந்து 21 வரை கேது தசை நடைபெறும். இந்த வயதில் ரெசிடென்ஷியல் பள்ளியில் சேர்க்கலாம். படிக்கவில்லையெனில் கொஞ்சம் விட்டுப் பிடிக்க வேண்டும். நான்கு பேருக்கு முன் அவமானப்படுத்தக் கூடாது. ஐ.டி. துறை இவர்களுக்கு சிறப்பைத் தரும். சட்டம், பொலிடிகல் சயின்ஸ் போன்றவையும் எளிதாக வரும். மொழித்திறன் அதிகமாக இருப்பதால் வேலைக்கு சென்று கொண்டே பிரெஞ்சு, இத்தாலி மற்றும் ஆங்கில இலக்கியம் போன்றவற்றை பயின்றால் சமூக அங்கீகாரம் கிடைக்கும். மருத்துவத்தில் இ.என்.டி., மனநல மருத்துவர், வயிறு, நரம்பு சம்பந்தப்பட்ட துறைகளில் கவனம் செலுத்தினால் நிபுணராகலாம். 

இரண்டாம் பாதத்தின் அதிபதியாக மகரச் சனி வருகிறார். பள்ளிப் படிப்பை முடிப்பதில் கொஞ்சம் தடுமாற்றம் இருக்கும். பத்து வயது வரை புதன் தசை நடைபெறும். 11 வயதிலிருந்து 17 வரை நடைபெறும் கேது தசையில் எதிலேயும் ஒரு தடங்கல் இருக்கும். படிப்பதில் நாட்டமில்லாது கவனச் சிதறல்கள் அதிகமாக இருக்கும். சொந்த ஜாதகத்தில் சனி நன்றாக இருந்தால் பெரியளவில் கல்வித் தடைகள் வராது. 18 வயதிலிருந்து 37 வரை சுக்கிர தசை நடைபெறும்போது தெளிவான வாழ்க்கை தொடரும். கேட்டரிங் டெக்னாலஜி, விஸ்காம், ஆட்டோமொபைல் துறையில் சாதிப்பார்கள். பி.காம்., பி.எஸ்சி. பிசிக்ஸ், தத்துவம் படித்தாலும் ஜெயிக்கலாம். ஏனெனில், அடுத்து 18 வயதிலிருந்து 37 வரை சுக்கிர தசை நடைபெறும்போது இவர்கள் சுமாராக படித்த படிப்பே மிகுந்த உதவியைத் தரும்.

மூன்றாம் பாதத்தை கும்பச் சனி ஆள்கிறார். ஆரவாரமில்லாது வேலைகளை முடிப்பார்கள். 7 வயது வரை புதன் தசை நடைபெறும். குழந்தைகளுக்குரிய துறுதுறுப்புடன் கூடிய முதிர்ச்சியும் கலந்திருக்கும். 8 வயதிலிருந்து 14 வரை கேது தசை நடைபெறும்போது படிப்பெல்லாம் சுமார்தான். அடுத்ததாக 15 வயதிலிருந்து 34 வரை சுக்கிர தசை வரும். பத்தாம் வகுப்பில் நல்ல மதிப்பெண்கள் எடுப்பார்கள். முதல் இரண்டு பாதங்களை விட சுக்கிர தசை கூடுதலாகவே நல்ல பலன்களைத் தரும். கல்லூரியில் என்ன படிக்க வேண்டும் என்பதை பத்தாம் வகுப்பிலேயே முடிவு செய்துகொண்டு படிப்பார்கள். 

எந்தத் துறையில் பணம் கொட்டுகிறதோ அதைத்தான் படிப்பார்கள். இவர்களில் பலர் வெளிநாடு சென்று படிப்பார்கள். ஆர்க்கிடெக்ட், கன்ஸ்ட்ரக்ஷன், இன்டீரியர் டெகரேஷன் என்று துறைகளைப் பிடித்து பரபரவென மேலேறலாம். மருத்துவத்தில் புற்றுநோய் ஆராய்ச்சியில் ஈடுபடலாம். விஸ்காம், விலங்கியல், ஏரோநாட்டிகல் எஞ்சினியரிங் என்று படிக்கலாம். இவர்கள் அந்தந்த வருடத்தில் எந்த புதிய படிப்பு வந்தாலும் அதில் சேரத்தான் முயற்சிப்பார்கள். நான்காம் பாதத்தை மீன குருவோடு, நட்சத்திர அதிபதியான புதனும், ராசியாதிபதியான மீன குருவும் சேர்ந்து ஆட்சி செய்யும். மூன்று வயது வரை நடக்கும் புதன் தசையின்போது பாலாரிஷ்டம் என்று சொல்லப்படும் ஏதாவது நோய்கள் வந்து நீங்கியபடி இருக்கும். 

4 வயதிலிருந்து 10 வரை நடைபெறும் கேது தசையில் படிப்பை விடுத்து விளையாட்டில் ஆர்வம் காட்டுவார்கள். படிப்பிலும் பள்ளியின் முக்கிய மாணவராக இருப்பார்கள். மிகச் சிறிய வயதிலேயே -அதாவது 11 வயதிலிருந்து - சுக்கிர தசை தொடங்கி 30 வயது வரை இருப்பதால், பெற்றோரின் செல்வ நிலை உயரும். கல்லூரியில் எந்தத் துறையை தேர்ந்தெடுக்கிறார்களோ அதில் பிஎச்.டி. வரை முடித்து விட்டு அங்கேயே பேராசிரியராகும் வாய்ப்பு உண்டு. மாஸ் கம்யூனிகேஷன் படிப்பு இவர்களுக்கு மிகவும் உபயோகமாக இருக்கும். ஆட்டோமொபைல் எஞ்சினியரிங், மெக்கானிக்கல் என்றும் சேரலாம். மருத்துவத்தில் முகச் சீரமைப்பு, வயிறு, உளவியல் சம்பந்தமான துறையில் எளிதாக வெற்றி பெறலாம். ஆனால், இந்தப் பாதத்தில் பிறந்த பெரும்பாலானோர் ஆசிரியர் பணியில் அமர்வார்கள். ரேவதி நட்சத்திரத்தின் அதிபதியாக புதன் வருகிறார். அதனால் பெருமாள் வழிபாடு மிகவும் நல்லது. 

மேலும், ரேவதி நட்சத்திரத்தின் நான்கு பாதங்களையும் தனுசு குரு, மகரச் சனி, கும்பச் சனி, மீன குரு என்று ஆட்சி செய்கிறார்கள். குருவும், சனியும் சேர்ந்த ஆதிக்கமாக அமைகிறது. எனவே, விஸ்வரூபக் கோலத்தில் அருளும் பெருமாளை வழிபட்டால் மிகவும் நல்லது. அப்படிப்பட்ட தலமே திருக்கோவிலூர் ஆகும். இங்கு எம்பெருமான் உலகளந்த பெருமாளாக காட்சியளிக்கிறார். சிறிய வயதிலிருந்து - அதாவது வாமன வயதிலிருந்தே - இந்த ஆலயத்திற்கு சென்று வந்தால், அவனருளால் விஸ்வரூபம் எடுக்கலாம். இத்தலம் விழுப்புரத்திலிருந்து 38 கி.மீ. தூரத்தில் உள்ளது. திருவண்ணாமலையிலிருந்தும் செல்லலாம்.